Զիջումներ եղել են 90-ականներին. Վիտալի Բալասանյան

«Երբ խոսում են բանակցությունների մասին, դրանք պետք է պաշտոնական փաստաթղթի շուրջ արվի»,- այս մասին  այսօր «Եռաբլուր» պանթեոնում լրագրողների հետ զրույցում ասաց Արցախի անվտանգության խորհրդի քարտուղար Վիտալի Բալասանյանը՝ անդրադառնալով Հայաստանի և Ադրբեջանի ղեկավարների՝ Արցախի հարցի վերաբերյալ բանակցություններին:

Նրա խոսքով՝ այսօր բանակցությունները բանավոր են գնում։ «Նրանք, որոնք խոսում են, որ ժողովուրդներին պետք է պատրաստել խաղաղության, ես համոզված եմ, հորդորում և առաջարկում եմ, որ համապատասխան ինստիտուտները, համապատասխան երկրների ղեկավարները տարածաշրջանում կնքեն խաղաղության պայամանագիր։ Եթե մենք չունենք խաղաղության պայմանագիր, չունենք այդ փաստաթուղթը, որը կճանաչի միջազգային հանրությունը, ինչի՞ մասին է խոսքը՝ ժողովուրդներին պատրաստել խաղաղության։ Հիմա ես հարց եմ տալիս՝ ժողովուրդ, դուք պատրաստվո՞ւմ եք խաղաղության: Մենք հո կռվարար ժողովուրդ չենք, մենք միշտ էլ խաղաղության պատրաստ ենք եղել, չենք հրահրել»,- նշեց Վիտալի Բալասանյանը:

Նրա խոսքով՝ Հայաստանը և այն ժամանակ ԼՂԻՄ-ը պարտադրված մտել են պատերազմի մեջ, հայտնվել շրջափակման մեջ. «Մենք ընդունել ենք մեզ պարտադրված պատերազմը»:  

Ըստ նրա՝ փաստաթուղթ է պետք, որ Հայաստանում, Արցախում, Ադրբեջանում ապրող ժողովուրդը, Ռուսաստանում ապրող հայերն ու ադրբեջանցիները իմանան, թե ինչի մասին է խոսքը:  «Իհարկե, այստեղ որևէ մեկը չի ուզում, որ պատերազմ լինի, բայց պատրաստվելու համար մեզ փաստաթուղթ է պետք: Պետք է Մինսկի խմբի հովանու ներքո կնքվի խաղաղության այդ պայմանագիրը»,- ընդգծեց Վիտալի Բալասանյանը՝ հավելելով, որ բանավոր բոլոր խոսակցությունները բերելու են ամենավատ վիճակին, քաղաքականության մեջ բանավոր հարցեր չեն լուծում:

Հարցին, թե արդյոք Ստեփանակերտի համար կարող է ընդունելի տարբերակ լինել  Արցախի որևէ կարգավիճակի դիմաց տարածքային զիջումների գնալը, Արցախի ԱԽ քարտուղարը պատասխանեց. «Միանշանակ ասեմ՝ ոչ: Արցախի ժողովուրդը, համայն հայությունը պատրաստ  չէ որևէ տարածքային զիջումների ինչ-որ բանի դիմաց: Զիջումներ եղել են 90-ականներին,  մենք չենք զիջե՞լ 2016-ի ապրիլին , երբ հայկական կողմը պատրաստ էր հակահարձակողական օպերացիաների: Դա զիջում չէ՞ր»:

Դիտարկմանը, թե բանակցությունների ֆոնին ինչպիսի տրամադրություններ են Արցախում,  Վիտալի Բալասանյանն ասաց, որ Արցախում  որևէ լարվածություն չկա․ «Որևէ մեկը պետք չէ մտահոգվի, հերթական բանակցություններ են, դրանք պարտադիր են և պետք են, կարող է մի օր դրական, մի օր բացասական պատասխան լինեն, մտահոգվելու որևէ բան չկա։ Այնպես չէ, որ հայկական երկու հանրապետությունների Զինված ուժերը շատ թույլ են, այսօր, ավելի քան երբևէ, հայոց զինված ուժերը հարուստ են»։