Ձեր վստահելի աղբյուրը

«Նոր նախագահի լիազորությունները փոքր չեն: Նա կարող է նպաստել այնպիսի կառավարություն կազմելուն, որը լինի ավելի բարձր մակարդակի, ավելի արդյունավետ, որի աշխատանքները կլինեն ավելի թափանցիկ ու մաքուր»,- այսօր ԱԺՄ համագումարում խոսելով նոր ընտրվող նախագահի ԱԺ հանրապետական մեծամասնության հետ աշխատելու հնարավորության մասին, հայտարարեց կուսակցության նախագահ Վազգեն Մանուկյանը: Նրա խոսքով, եթե նոր նախագահը ընտրվի ժողովրդական ալիքի շնորհիվ և ունենա հասարակության վստահությունը, «ցանկացած պահի նա կարող է ժողովրդին ոտքի հանել ընդդեմ ԱԺ-ի ու կառավարության, եթե վերջիններս չեն անի այն, ինչ պետք է պետության համար: «Նախագահի լիազորությունները բավականացնում են նաև, որպեսզի արդեն գոյություն ունեցող կլանների անօրինական հիմքերը խարխլի, վերացնի մոլոպոլիաները»,- նշեց ԱԺՄ ղեկավարը, հավելելով, որ պետք է նաև հասարակական հանձնաժողով ստեղծել նախկինում կատարված հանցագործությունները պարզելու համար:

«Անպայման պետք է ստեղծել նոր Սահմանադրություն: Երկու Սահմանադրությունն էլ վատն են, կեղծված են և չեն ընդունվել ժողովրդի կողմից»,- կարծիք հայտնեց Վ. Մանուկյանը, ընդգծելով, որ ինքն անձամբ կողմնակից է պետության խորհրդարանական համակարգին: Նա այդ համատեքստում կարևորեց գործադիր իշխանությունից անկախ դատարանների գոյությունը, որը չի լինի կոռումպացված: Հաջորդ կարևոր խնդիրը, ըստ նրա, տեղական ինքնակառավարման մարմինների ինքնուրույնության մեծացումն է: «Մարզպետները պետք է լինեն ընտրովի: Մարզը պետք է կախման մեջ չլինի կենտրոնից, հորիզոնական կապերը պետք է մեծանան»,- ասաց Վ. Մանուկյանը, նշելով, որ ոչ պակաս կարևոր խնդիր է որոշ հարցերի վերաբերյալ ժողովրդի կողմից հանրաքվե կազմակերպելու իրավունքի ընձեռումը, այդ թվում իշխանություններին անվստահություն հայտնելու համար:

«Այս ամենը պահանջելու է ժամանակ` 2-3 տարի, որից հետո պարտադիր ձևով, նոր Սահմանադրությամբ պետք է տեղի ունենա նոր իշխանության ընտրություններ»,- նշեց ԱԺՄ նախագահը, կարծես կրկնելով առաջին նախագահի ընտրվելու դեպքում 3 տարի հետո նոր ընտրություններ անցկացնելու առաջարկը: