ՊԱՏԵՐԱԶՄԸ ՄՈԼԵԳՆՈՒՄ Է ՎՐԱՍՏԱՆԻ ՏԱՐԱԾՔՈՒՄ

Քաղաքական 11:06 09/08/2008

ՊԱՏԵՐԱԶՄԸ ՄՈԼԵԳՆՈՒՄ Է ՎՐԱՍՏԱՆԻ ՏԱՐԱԾՔՈՒՄ

ՎՐԱՑ-ՕՍԱԿԱՆ ՀԱԿԱՄԱՐՏՈՒԹՅԱՆ ԳՈՏՈՒՄ ԶՈՀԵՐԻ ԹԻՎՆ ԱՆՑԵԼ Է 1400-ԻՑ
Վրաց-օսական հակամարտության գոտում խաղաղ բնակիչների շրջանում զոհերի թիվը անցել է 1400-ից: Այս մասին հաղորդել է ՄԱԿ-ի ԱԽ-ում Ռուսաստանի մշտական ներկայացուցիչ Վիտալի Չուրկինը, հանդես գալով այդ հակամարտությանը նվիրված ՄԱԿ-ի ԱԽ նիստում: Նա ընդգծել է, որ Վրաստանը խախտում է միջազգային իրավունքը, կրակ բացելով խաղաղ բնակավայրերի ուղղությամբ: Չուրկինը բացատրել է, որ Վրաստանը զանգվածային կրակ է բացել ոչ միայն Ցխինվալիի, այլ նաև հակամարտության գոտուց դուրս գտնվող բնակավայրերի վրա, այդ թվում ոչնչացվում են նաև դպրոցներ ու հիվանդանոցներ, ինչը հումանիտար իրավունքի խախտում է:

ՌԴ ներկայացուցչի խոսքով, վրացական կողմը խոչընդոտում է տուժածներին օգնություն տրամադրելուն, մասնավորապես շտապօգնության մեքենաներին թույլ չի տալիս մոտենալ տուժած շրջաններին և խոչընդոտում է Կարմիր խաչի ներկայացուցիչներին, որոնք նախապես դիմել էին վիրավորներին, ինչպես նաև կանանց, երեխաներին ու ծերերին ռազմական գործողությունների գոտուց դուրս բերելու համար միջանց տրամադրելու խնդրանքով:

ՎՐԱՑԱԿԱՆ ԿՈՂՄԸ ԱՅՍ ԳԻՇԵՐ ԽՓԵԼ Է 3 ՌՈՒՍԱԿԱՆ ԿՈՐԾԱՆԻՉ

Անցած գիշեր վրացական հակաօդային ուժերը պաշտպանության ուժերը խփել են երեք ռուսական կործանիչ ինքնաթիռներ: Այս մասին այսօր հաղորդել է Վրաստանի պաշտպանության փոխնախարար Բատու Կուտելիան: Նրա խոսքով, դա տեղի է ունեցել Ցխինվալիի շրջանում: Ընդհանուր առմամբ,վերջին երկու օրերի ընթացքում խփվել է 6 ռուսական ինքնաթիռ, որոնք ռմբակոծում էին Վրաստանի տարբեր շրջանները:

ՌՈՒՍԱԿԱՆ ԲԱՆԱԿԸ ՕԳՆՈՒԹՅԱՆ Է ՀԱՍԵԼ ՑԽԻՆՎԱԼԻԻ ՌՈՒՍ ԽԱՂԱՂԱՊԱՀՆԵՐԻՆ

Ռուսական բանակի 58-րդ խմբավորումը ճեղքել է շղթան, հասել Ցխինվալիում տեղակայված ռուս խաղաղապահների ճամբար և միջոցներ է ձեռք առնում վիրավորներին տարհանելու ուղղությամբ: Այս մասին, ըստ ռուսական «ՌԲԿ» գործակալության, հայտնել է ռուսական ցամաքային զորքերի գլխավոր հրամանատար, գնդապետ Իգոր Կոնաշենկովը: Բացի այդ, 58-րդ խմբավորումը խաղաղապահներին հասցրել է լրացուցիչ զինամթերք և սննդամթերք: «58-րդ բանակի հակատանկային տեխնիկայի ստորաբաժանումների հրամանատարները ներկայումս բացահայտում են վրացական կրակակետերը, որտեղից կրակ է բացվում ռուս խաղաղապահների ճամբարի վրա, դրանք ոչնչացնելու նպատակով»,- ասել է Կոնաշենկովը:

Նա նաև նշել է, որ ներկայումս Ցխինվալիի արվարձաններում Ռուսաստանի պաշտպանության նախարարության հատուկ նշանակության բանակի լրացուցիչ ուժեր են նետվել: Կոնաշենկովն ընդգծել է, որ հակամարտության գոտում ռուսական բանակի քանակությունը նույնպես կավելանա:

ԱՄՆ ՆԵՐԿԱՅԱՑՈՒՑԻՉ. «ՌՈՒՍԱՍՏԱՆԸ ՊԵՏՔ Է ԴԱԴԱՐԵՑՆԻ ԻՆՔՆԱԹԻՌՆԵՐԻ, ՀՐԹԻՌՆԵՐԻ ՈՒ ԲԱՆԱԿԻ ՕԳՆՈՒԹՅԱՄԲ ԳՐՈՀՆԵՐԸ ՎՐԱՍՏԱՆԻ ՎՐԱ»

ԱՄՆ-ն առաջարկում է ՄԱԿ-ի ԱԽ-ին կոչ անել Ռուսաստանին ու Վրաստանին դադարեցնել ռազմական գործողությունները և նստել բանակցությունների սեղանի շուրջ: Այս մասին լրագրողներին հաղորդել է ՄԱԿ-ում ԱՄՆ ներկայացուցիչ Զալմայ Հալիլզադը:

«Խետք է դադարեցնել բռնությունը որքան հնարավոր է շուտ»,- ասել է նա ու հավելել, որ դա այս պահին «առանցքային խնդիր է»: Նրա խոսքով, Ռուսաստանը պետք է որքան հնարավոր է շուտ «դադարեցնի գրոհները Վրաստանի ուղղությամբ, օգտագործելով ինքնաթիռներ, հրթիռներ ու զորքեր»: Բացի այդ, ըստ նրա, պետք է բանակացությունների մեջ մտնեն վրացական և օսական կողմերը:

Տեքստում սխալ կամ վրիպակ նկատելու դեպքում, ուղարկեք խմբագրին հաղորդագրություն` նշելով տվյալ սխալը, այնուհետև սեղմելով Ctrl-Enter: