Ձեր վստահելի աղբյուրը

Լրագրողներն այսօր ՀՀԿ փոխնախագահ, ԱԺ պատգամավոր Գալուստ Սահակյանից հետաքրքրվեցին, թե ինչով է պայմանավորված այն, որ երկրի նախագահ Սերժ Սարգսյանը երկար լռությունից հետո զանգահարել է ՌԴ նախագահ Դմիտրի Մեդվեդևին և ցավակցություն հայտնել Վրաստանի տարածքում տեղի ունեցածի համար, իսկ ահա Վրաստանի նախագահին չի զանգահարել:

Այս առնչությամբ Գ. Սահակյանն ասաց. «Մեդվեդևին զանգահարել և ցավակցություն է հայտնել, որովհետև այդ զոհվածների հիմնական մասը Ռուսաստանի քաղաքացիներ էին»: Իսկ ավելի նպատակահարմար չէ՞ր լինի նման ցավակցություն հայտնել նաև մեր հարևան Վրաստանի նախագահին, հաշվի առնելով, որ այդ երկրի դերը դժվար է գերագնահատել Հայաստանի համար, հարցին էլ արձագանքեց. «Եթե վրաց ժողովրդին նման բան պատահեր, կարծում եմ, կզանգեր նաև Սահակաշվիլիին: Այս դեպքում, ռուս ժողովրդին է բան պատահել: Հարավային Օսիայում ապրող ՌԴ քաղաքացիները դրանք ռուս ժողովուրդ են, Ռուսաստանում ապրող ժողովուրդ են»:

Դիտարկմանը, թե Վրաստանի խաղաղ բնակչության շրջանում նույնպես զոհեր են եղել, ՀՀԿ փոխնախագահն արձագանքեց. «Համենայն դեպս մինչև այսօր ոչ ես, ոչ էլ որևէ լրատվություն չի արձագանքել, որ Վրաստանում զանգվածային մահացության դեպքեր են եղել»:

Նշենք, որ արդեն 3-4 օր է, ինչ ոչ ռուսական լրատվամիջոցները տեղեկացում են, թե ռուսական բանակը ռմբակոծել է վրացական բնակավայրերը, այդ թվում` տասնյակի հասնող գյուղեր, իսկ նախօրեին, ըստ նույն աղբյուրների, ռուսական ստորաբաժանումները գրավել էին Գորին և այնտեղ զբաղված էին սպանություններով ու թալանով:

Իսկ արդյո՞ք անհրաժեշտություն չկար, որ Հայաստանի նախագահը վերադառնար Պեկինից, նկատի ունենալով որ պատերազմ էր ընթանում տարածաշրջանում, որին մասնակցում էին մի կողմից Հայաստանին կոմունիկացիոն ուղիներ տվող հարևանը, մյուս կողմից` ռազմավարական դաշնակիցը, հանրապետական պատգամավորը պատասխանեց. «Ի՞նչ է, Հայաստանում էր պատերազմը»: