Ձեր վստահելի աղբյուրը

«Սիրիահայ համայնքը աջակցում է Բաշար ալ Ասադի վարչակարգին»,-անդրադառնալով սիրիահայ համայնքի վրա Սիրիայում քաղաքական անկայունության ազդեցության խնդրին, այսօր ասաց «Նորավանք» ԳԿՀ Քաղաքական հետազոտությունների կենտրոնի փորձագետ Արաքս Փաշայանը:

Բանախոսի հավաստմամբ, համայնքի այս շեշտադրված դիրքորոշման հիմնական պատճառն այն է, որ հայերը Սիրիայում գործող վարչակարգի կառավարման պայմաններում իրենց պաշտպանված և ապահով են զգում:

Արաքս Փաշայանի կարծիքով,  սիրիահայ համայնքը  ներկայիս վարչակարգի պահպանման մեջ է տեսնում երկրում հետագա գոյատևման գխավոր երաշխիքը: «Սիրիահայ համայնքը Սփյուռքի ամենակայացած համայնքներին է: Հայերը Սիրիայում ազգային գործունեություն ծավալելու լայն հնարավորություններ ունեն: Հայ համայնքը այն սակավաթիվ ազգային փոքրամասնություններից է, որ ունի մայրենի լեզվով ուսանելու հնարավորություն: Սիրիայում գործում է շուրջ 30 հայ առաքելական եկեղեցի»,- նշեց Արաքս Փաշայանը:

Փորձագետը շեշտեց, որ երկրում առկա զարգացումները, բնականաբար, առաջացնում են երկրում հայության մտահոգությունը: «Բավականին լուրջ մտահոգություններ են հնչում, որ հնարավոր իշխանափոխության դեպքում Սիրիահայ համայնքի համար կարող են ի հայտ գալ որոշակի մարտահրավերներ»,- նշեց փորձագետը, միևնույն ժամանակ հավելելով, որ ներկա դրությամբ համայնքի անվտանգությանը ոչինչ չի սպառնում:

Հիշեցնենք, Սիրիայի տարբեր շրջաններում արդեն տևական ժամանակ անցկացվող բողոքի ակցիաների մասնակիցները պահանջում են երկրի նախագահ Բաշար ալ Ասադի հրաժարականը: