Ձեր վստահելի աղբյուրը

«Ի տարբերություն ադրբեջանական կողմի, հայկական կողմը նախընտրում է ոչ թե դատարկության մեջ բարձրագոչել, այլ սեփական հնարավորությունները նպատակային օգտագործելով ամրապնդել իր պաշտպանողականությունը, և անհրաժեշտության դեպքում հակառակորդին ցույց տալ, թե ինչ է նշանակում իրական մարտունակություն և ինչ կարող է լինել հավանական պատերազմի դեպքում»,- մեկնաբանելով Ադրբեջանի պաշտպանության նախարարության մամուլի ծառայության ղեկավար Էլդար Սաբիրօղլուի հարցազրույցում տեղ գտած հայտարարությունները՝ Panorama.am-ի հետ զրույցում ասաց ԼՂՀ ՊԲ լրատվության բաժնի ղեկավար Սենոր Հասրաթյանը:

Նշենք, որ «1նյուզ»-ին տված հարցազրույցում Է. Սաբիրօղլուն հայտարարել է, որ ադրբեջանական բանակը պատրաստ է անհրաժեշտության դեպքում «օկուպացված տարածքները «մաքրել» հայ ագրեսորներից»:

«Մեր խնդիրը հայրենիքը պաշտպանելն է, այլ ոչ թե դատարկ քարոզչությամբ սեփական հանրությանը կերակրելը:

Արցախի բանակի հրամանատարությունն ասել է ու ասում է՝ պատերազմը ոչ թե քարոզչություն այլ ժամանակակից ռազմավարական և մարտավարական գործողություններ իրականացնելու լուրջ համալիր է, որի վերջնական արդյունքը երևում է մարտադաշտում»,- ասաց Ս. Հասրաթյանը:

Անդրադառնալով ադրբեջանցի պաշտոնյայի հնչեցրած այն մտքին, թե իրենք ոչ ոքից և ոչինչից չեն վախենում, Ս. Հասրաթյանը նշեց. «Նա ով չի վախենում ոչինչից և ոչ ոքից, այդքան շատ հրապարակավ դրա մասին չի ակնարկում»:

Ըստ բանախոսի՝ իրեն հարգող զինվորականը, առավել ևս բանակի մամուլի խոսնակը «մինչև ցատկելը հոպ չի ասում», մանավանդ, երբ խոսքը գնում է ռազմական առճակատման մասին:

«Խորհուրդ Սաբիրօղլուին և ադրբեջանական բանակի գեներալներին՝ հաղթանակի մասին խոսում են միմիայն այն տոնելուց հետո»,- եզրափակեց ԼՂՀ ՊԲ լրատվության բաժնի ղեկավարը: