Ձեր վստահելի աղբյուրը

«Ընտրություններին մնում է 35 օր և կոալիցիան, բնականաբար, նախընտրական այս շրջանում դարձել է արդեն անցյալ, այդ իսկ պատճառով եկեք խոսենք ապագայից… Բայց ես և պարոն Ուրիխանյանը կոալիցիոն ոչ մի պաշտոն չենք զբաղեցրել և պատասխանատվություն չենք կրել այդ առումով»,-ԲՀԿ-ական Վարդան Օսկանյանի նախօրեին հնչեցրած գնահատականին վերաբերող Panorama.am-i հարցին ի պատասխան այսօրվա ասուլիսում արձագանքեց ԲՀԿ քաղխորհրդի անդամ Վահան Բաբայանը` ավելացնելով, որ գնահատականները գուցե տան իրենց նախարարները:

Նրա խոսքերով` ԲՀԿ-ն այսօր նայում է առաջ, այն է` ժողովրդի ստացած քվեով գնալ խորհրդարան և ամենևին էլ հարմար չէ խոսել կամ մեկնաբանել կուսակից-գործընկերներից որևէ մեկի կարծիքը:

Ասուլիսին ներկա Տիգրան Ուրիխանյանն էլ ավելացրեց, որ մի քանի ամիս առաջ իր կարծիքը կոալիցիայի մասով արդեն արտահայտել է.«Կոալիցիան որոշակի մի իրավական ակտի վրա ստեղծված ժամանակավոր բնույթ կրող, քաղաքական ուժերին համատեղ կառավարման մեջ միավորող ձևակերպում է և ունի իր սկիզբն ու ավարտը: Որևէ կերպ ասոցացնել քաղաքական ուժերին իրար հետ այս ժամանակավոր ֆորմատում չի կարելի»,- նշեց նա:

Երբ առարկեցինք, որ խոսքը ոչ թե կոալիցիայի ձևի, այլ դրան «ձևական» որակում տալու մասին է, Տ.Ուրիխանյանը արձագանքեց.
«Ի՞նչ է նշանակում ձևական բնորոշում: Յուրաքանչյուր մարդ իր լեքսիկոնից ելնելով տալիս է համապատասխան ձևակերպում: Եթե ձեզ հետաքրքրում է բովանդակությունը, ես կրկնում եմ` իմ անձնական կարծիքն այն է, որ կոալիցիան կրում էր ժամանակավոր բնույթ ու, բնականաբար, առաջացրել էր մասնակից ուժերի ժամանակավոր պարտավորություն»:

Ըստ բանախոսի` ԲՀԿ-ն թե այն ժամանակ և թե այսօր, գնալով ընտրությունների, ցանկանում է, որպեսզի պատասխանատվությունն ամբողջությամբ լինի իրենց վրա: «ԲՀԿ-ն հստակ այլընտրանք է կոալիցիոն բոլոր քաղաքական ուժերին ու այլընտրանք է ընդհանրապես քաղաքական կազմակերպություններին, կարծրացած հանրային ընկալմանը: ԲՀԿ-ն ունի իր ծրագիրը և ուզում է իրականացնել ակնհայտ բարեփոխումներ»,- հավելեց նա: