Ձեր վստահելի աղբյուրը

Մարտի 1-31-ը խորհրդարանական ընտրությունների նախաշեմին Երևանի մամուլի ակումբի կողմից իրականացված Հայաստանի հեռարձակվող ԶԼՄ-ների մշտադիտարկման ու կազմված միջանկյալ հաշվետվության համաձայն, նկատվել է նշանային բնութագրիչներով նյութերի տեսակարար կշռի նվազում, քաղաքական կուսակցությունների նկատմամբ հեռարձակողների հետաքրքրության աճի միտումներ:  Այս մասին ասուլիսում հայտարարեց Երևանի մամուլի ակումբի նախագահ Բորիս Նավասարդյանը, ավելացնելով, որ տարբեր կուսակցություններ լուսաբանվում են հավասարակշիռ, այսինքն` ոչ մի կուսակցություն չի կարող բողոքել, որ անտեսվել է:
Հիշեցնենք, որ Երևանի մամուլի ակումբը մարտի 1-ից սկսել է Հայաստանի խորհրդարանական ընտրությունների լուսաբանման մոնիթորինգ իրականացնել: Մոնիտորինգի են ենթարկվում հանրային երեք լրատվամիջոցներ` Հանրային ռադիոն, Հանրային և «Շողակաթ» հեռուստաընկերությունները և մյուս 6 մասնավոր հեռուստաընկերութունները` Հայկական երկրորդ հեռուստաընկերությունը, «Արմենիա»-ն, «Շանթ»-ը, «Կենտրոն»-ը, «Երկիր Մեդիա»-ն, ինչպես նաև «Արմնյուզ»-ը: Հետազոտման առարկա են դառնում այն նյութերը, որոնցում առկա էին անդրադարձեր այն քաղաքական կուսակցություններին և շարժումներին, որոնք խորհրդարանական ընտրություններին մասնակցելու հայտ են ներկայացրել:

Հաշվետվության համաձայն, ներքաղաքական կյանքին առավել հեռաքրքրություն է ցուցաբերել «Կենտրոն» հեռուստաալիքը, այնուհետև` Հանրային ռադիոն, Հ2-ը, «Արմնյուզը», «Երկիր Մեդիան»:

«Մեր հանրությունը պետք է կարևորի այս ընտրությունները: Այդ հետաքրքրությունը, կարևորությունը զգալու համար, մեծ դերակատարում ունեն հենց հեռուստաընկերությունները: Սակայն մի քանի հեռուստաընկերություն ոչ բավարար ուշադրություն են դարձնում նախընտրական գործընթացներին»,- ասաց նա:

Ըստ մոնիթորինգի, նախընտրական թեմաներին մյուսներից քիչ և ամենափոքր ծավալով է անդրաձարձել «Շանթ» հեռուսաընկերությունը, թեև մարտի երկրորդ կեսից սկսել է ավելի ակտիվություն ցուցաբերել: Զգալիորեն հետ է մնացել նաև Հ1-ը: Նախընտրական թեմաներին անդրադարձների հաճախականությամբ «Արմենիա» հեռուստաընկերությունը ընդգրկվել է առաջատարների շարքում:

Մարտին անդրադարձների հաճախականությամբ և եթերաժամանակով առավել ուշադրության են արժանացել ՀՀԿ-ն, ԲՀԿ-ն և ՀՅԴ-ն: Մարտին իրականացված մշտադիտարկումը հիմք է տալիս խոսելու ոչ թե «մեծ վեցնյակի» (ՀՀԿ, ԲՀԿ, ՕԵԿ, ՀՅԴ, «Ժառանգություն», ՀԱԿ), այլ «մեծ յոթնյակի»` ի հավելումն թվարկված վեց ուժերի` մարտին բոլոր հեռարձակողների ուշադրության առարկան են դարձել նաև «Ազատ դեմոկրատները»:

Ինչ վերաբերում է ընտրություններին մասնակցության հայտ ներկայացնող ՀԿԿ-ին ու Դեմոկրատական կուսակցությանը, նրանց նույնպես հեռուստաալիքներն անդրադարձել են, իսկ «Միավորված հայեր» կուսակցությանը սկսել են անդրադառնալ մարտի 21-ից սկսած, երբ պաշտոնապես ԿԸՀ է ներկայացրել ընտրություններին մասնակցելու համար անհրաժեշտ փաստաթղթերը:

Առանձին կուսակցությունների նկատմամբ, հետազոտված ալիքների հետաքրքրությունը բնորոշող ցուցանիշների ամենաշատ հակասականությունը հաշվետու ժամանակաշրջանում արձանագրվել է ԲՀԿ-ի պարագայում: «Կենտրոնում» ԲՀԿ-ն անվիճելի առաջատար է, Հ2-ում նույնպես այդ կուսակցության դիրքերը բավականին ամուր են: Իսկ Հ1-ում, «Արմենիայում», «Արմնյուզում», «Շանթում» նրա ցուցանիշները գրեթե ամենավատն է «մեծ յոթնյակի» մյուս կուսակցությունների համեմատ: «Երկիր մեդիայում» մեծ ուշադրություն է դարձվել ՀՅԴ-ին, նաև ՀՀԿ-ին:

Հետազոտված ալիքների արդյունքների հանրագումարում կառավարող կոալիցիայի կուսակցություններն ընդդիմախոսների նկատմամբ զգալի առավելություն են ստացել նշանային բնութագրիչներով անդրադարձների հարաբերակցության առումով:
Մշտադիտարկման է ենթարկվել նաև «հյուր ստուդիայում» ձևաչափի բոլոր հաղորդումների մասնակիցները: ԿԸՀ ցուցակների հանձնած 9 կուսակցություններից 7-ը հյուրընկալվել են «Կենտրոնի» և «Արմնյուզի» ստուդիաներում: Մյուս ալիքներն այս առումով թույլ հետաքրքրություն են ցուցաբերել նախընտրական գործընթացների նկատմամբ:

«Մշտադիտարկման արդյունքների համաձայն, կարող ենք ասել, որ «Կենտրոնն» ամենաքաղաքականացված հեռուստաընկերությունն է, երկրորդ և երրորդ տեղերում` քիչ տարբերությամբ, Հ2, «Երկիր Մեդիա» հեռուստաալիքներն են, այնուհետև «Արմնյուզ»»,- ասաց Բ. Նավասարդյանը:

Նախորդող նորություններ՝  Մշտադիտարկում. Հեռուստաալիքներն ավելի հավասարակշիռ են դառնում
Մոնիթորինգ. Քաղաքական ուժերի նկատմամբ ուշադրության բաշխման համաչափության առումով հեռուստաալքիները բավականին հավասարակշռված են