Ձեր վստահելի աղբյուրը

Հայյ Ազգային կոնգրես խմբակցության անդամ Նիկոլ Փաշինյանն իր բլոգում անդրադարձել է «Առավոտ»-ին տված հարցազրույցում Կոտայքի մարզպետ Կովալենկո Շահգալդյանի հայտարարություններին: Մասնավորապես, ԱԺ ֆինանսավարկային եւ բյուջետային հարցերի ու տարածքային կառավարման եւ տեղական ինքնակառավարման հարցերի մշտական հանձնաժողովների սեպտեմբերի 25-ին տեղի ունեցած համատեղ նիստից հետո մարզպետը պատասխանելով լրագրողի խնդրանքին՝ մի քանի սուր հարց ձևակերպել և տալ Նիկոլ Փաշինյանին, Շահգալդյանը պատասխանել էր. «Ուզում էի հարց տալ՝ փախավ: Ուզում էի հարցնել՝ ո՞նց ես քեզ պահել ազատազրկման վայրում»:
Պատասխանելով մարզպետի այս հայտարարությանը, Նիկոլ Փաշինյանն իր անձնական բլոգում գրել է, որ ինքը վաղն առավոտյան ԱԺ մուտք գործելու համար անցագիր է իջեցրել և Կոտայքի մարզպետը ժամը 09.30-ին կարող է այդ անցագրով հանգիստ մուտք գործել Ազգային Ժողովի տարածք:

Ն.Փաշինյանի պարզաբանումը, համեմված իրեն բնորոշ հումորով, ներկայացնում ենք ստորև.

«1. Պարոն մարզպետը լրագրողի հետ զրույցում պնդել է, որ ցանկացել է ինձ հարց տալ, սակայն ես իբր փախել եմ: Վերը նշված համատեղ նիստի սկզբից մինչև վերջ (խոսքը նախօրեին տեղի ունեցած նիստին է վերաբերում` 2011թ-ի պետական բյուջեի կատարողականի քննարկման շրջանակում) գտնվել ենք նույն դահլիճում, և նա ինձ մոտենալու, հարց տալու որևէ փորձ չի արել: Ավելին, նիստի ավարտից հետո դահլիճը լքել ենք միաժամանակ, և նա ինձ մոտենալու, հարց տալու փորձ չի արել: Ավելին, նիստի ավարտից հետո մինչև աշխատանքային օրվա վերջը, գտնվել եմ ԱԺ իմ աշխատասենյակում, և պարոն Շահգալդյանը ինձ մոտենալու, որևէ հարց տալու փորձ չի արել: Այնպես որ` նրա հայտարարությունը ոչ այլ ինչ է, քան լրագրողների մոտ գլուխ գովալու կարեկցանքի արժանի փորձ:

2. Կոտայքի մարզպետը լրագրողի հետ զրույցում ասել է, թե ուզում էր ինձ հարցնել, թե ինչպես եմ ինձ պահել ազատազրկման վայրում: Պարոն մարզպետին հնարավորություն կտամ ինձ նման հարց ուղղելու. վաղվա՝ սեպտեմբերի 27-ի, ժամը 09.30-ի համար ԱԺ անցագիր եմ իջեցրել նրա անունով, որը նրան հնարավորություն կտա ժամը 09.30-ին ԱԺ Բաղրամյան մուտքից մտնել ԱԺ տարածք և արժանանալ իմ ընդունելությանը, թիվ 136 սենյակում: Ընդունելության ընթացքում պարոն Շահգալդյանի համար տեսանելի և զգալի կերպով ցույց կտամ, թե ինչպես եմ ինձ պահել ազատազրկման վայրում»,- մասնավորապես ասված է Ն.Փաշինյանի գրառման տեքստում: