Ձեր վստահելի աղբյուրը

Գերմանիան և Նիդեռլանդները անհրաժեշտության դեպքում Սիրիայի հետ սահմանների պաշտպանության համար կարող են Թուրքիային տրամադրել «Պատրիոտ» համակարգի հրթիռներ: Այս մասին հղում անելով Նիդեռլանդների պաշտպանության նախարարության հայտարարությանը, հաղորդում է «Վզգլյադ» պարբերականը:

«Թուրքիայից դեռևս համապատասխան դիմում չի ստացվել, սակայն Գերմանիան և Նիդեռլանդները Եվրոպայի միակ պետություններն են, որոնք ունեն այդպիսի հրթիռներ»,- հայտարարել է Նիդեռլանդների պաշտպանության նախարարության ներկայացուցիչը:

Աղբյուրը նշում է, թե ակնկալվում է, որ այսօր՝ նոյեմբերի 19-ին, Թուրքիան պաշտոնապես այդ հարցով կդիմի ՆԱՏՕ-ին:

Պարբերականը, հղում անելով գերմանական աղբյուրներին, տեղեկացնում է նաև, որ Գերմանիայի զինծառայողները մոտ ժամանակներում, ամենայն հավանականությամբ, կմասնակցեն Թուրքիայում ՆԱՏՕ-ի առաքելությանը: Թուրքիան մտադիր է պաշտոնապես դիմել ՆԱՏՕ-ին՝ Սիրիայի հետ սահմանի ողջ երկայնքով «Պատրիոտ» հրթիռային համալիրի տեղակայման խնդրանքով:

Գերմանական աղբյուրների հաղորդմամբ, ՆԱՏՕ-ի ղեկավարությունը ակնարկել է, որ դրական պատասխան կտա Թուրքիայի համապատասխան խնդրանքին:

Տեղեկացնենք, որ Թուրքիայի վարչապետ Ռեջեփ Թայիփ Էրդողանն ու արտգործնախարար Ահմեդ Դավութօղլուն հարցի վերաբերյալ տարբեր հայտարարություններ են արել:

Ա. Դավութօղլուն հայտարարել է, որ ՆԱՏՕ-ն ցանկանում է Թուրքիային տրամադրել «Պատրիոտ» ամերիկյան հրթիռներ՝ Սիրիայից եկող վտանգը կանխելու նպատակով: Իսկ Ռ. Էրդողանը Ինդոնեզիա կատարած այցի ժամանակ հայտարարել է, որ Թուրքիան մտադիր չէ գնել զենիթահրթիռային համակարգեր, և հերքել է «Պատրիոտ» հրթիռային համակարգի տեղակայման մասին շրջանառվող տեղեկությունները:

«ՆԱՏՕ-ին նման խնդրանքով մենք չենք դիմել: Այդ տեղեկություններն անհիմն են, սակայն, եթե ՆԱՏՕ-ն դիմի մեզ այդ հարցով, ապա Թուրքիան դրական պատասխան կտա»,- հայտարարել է Ռ. Էրդողանը:

Ռ. Էրդողանի այդ հայտարարությունից հետո Ա. Դավութօղլուն հանդես է ելել իր նախորդ հայտարարության պարզաբանմամբ և նշել, որ Թուրքիան, իրոք, ՆԱՏՕ-ին չի դիմել նման խնդրանքով:

ՆԱՏՕ-ի գլխավոր քարտուղար Անդերս Ֆոգ Ռասմուսենը և ԱՄՆ Պետքարտուղարության մամուլի քարտուղար Վիկտորիա Նուլանդը նույնպես հերքել են այդ տեղեկությունները՝ ընդգծելով, որ հրթիռներ տեղեկայելու մասին Թուրքիան որևէ դիմում չի ներկայացրել: