Ձեր վստահելի աղբյուրը

Կենտրոն վարչական շրջանում այսօր շրջայցի դուրս եկած «Ժառանգություն» կուսակցության ղեկավար Րաֆֆի Հովհաննիսյանը քիչ առաջ Մատենադարանի մոտ պատահաբար հանդիպեց Հայաստան ժամանած ռուսաստանցի մտավորականներին: Նրանց թվում էր նաև ծագումով հայ, երգիծաբան Եվգենի Պետրոսյանը, Ելենա Ստեպանենկոն, Ռուսաստանում Հայաստանի նախկին դեսպան Արմեն Սմբատյանը:

Հիշեցնենք, որ Հայաստանում են հայտնի մտավորականներ, լրագրողներ, դերասաններ ու մարզիկներ, ինչպիսիք են Միխայիլ Շվիդկոյը, Իրինա Ռոդնինան, Լևոն Օգանեզովը, Դմիտրի Խառատյանը, Նիկոլայ Սվանիձեն, Եվգենի Պետրոսյանը, Ելենա Ստեպանենկոն և այլոք:

Նրանք Հայաստան են եկել Հումանիտար համագործակցության միջպետական հիմնադրամի պատվիրակության հետ:
Մոտենալով` Րաֆֆի Հովհաննիսյանը ողջունեց նրանց և վստահեցրեց, որ առաջիկա ընտրությունները լինելու են արդար և թափանցիկ: Նա շնորհակալություն հայտնեց նրանց` հայ-ռուսական հարաբերությունների զարգացման գործում ունեցած ավանդի համար:

Իսկ մինչ այդ Հովհաննիսյանը հասցրեց այցելել Երվանդ Քոչարի թանգարան, Մատենադարան, այս պահին գտնվում է ՀՊՃՀ տարածքում:
Մինչ այդ նա հայտարարեց, որ պատրաստ է շնորհավորել Սերժ Սարգսյանին, եթե արդար ու թափանցիկ ընտրությունների դեպքում նա ընտրվի ՀՀ նախագահ:

Հովհաննիսյանը դժգոհություն հայտնեց ընտրացուցակների «ոչ թափանցիկության» վերաբերյալ, ընդգծելով, որ ճշտումները պետք է ավելի վաղ կատարվեին: Թեկնածուն նաև կարծիք հայտնեց, որ առաջիկա նախագհահական ընտրությունները կընթանան երկու փուլով, երկրորդում, ըստ նրա, պայքարը կընթանա իր և գործող նախագահի միջև: