Քաղաքագետ. Նոր նախագահի համար կարևոր հարցը բիզնես և քաղաքական էլիտաների տարանջատումն է
Թեև նախագահական ընտրապայքարի առաջատարն այսօր արդեն պարզ է, հանրության համար խիստ կարևոր է մնում, թե ինչպես երկրի նորընտիր ղեկավարը կկարողանա դիմակայել և հաղթահարել Հայաստանի առջև կանգնած հիմնական մարտահրավերները: Այս մասին Կոնրադ Ադենաուեր հիմնադրամի և Տարածաշրջանային հետազոտությունների կենտրոնի կողմից հրավիրված «Նախագահական ընտրություններ. գնահատականներ և առաջարկներ» խորագրով նախընտրական սեմինարին կարծիք հայտնեց «Կովկասի ինստիտուտի տնօրեն Ալեքսանդր Իսկանդարյանը:
Ըստ բանախոսի` ներկայումս արդեն պարզ է, որ Սերժ Սարգսյանը հաղթանակ կտանի արդեն իսկ առաջին փուլով, և նույնիսկ հունվարի 31-ին տեղի ունեցածը չի կարողանա արմատապես փոխել ուժերի ներկայիս հարաբերակցությունը: «Այսօր հիմնական խնդիրը կայանում է, թե մյուս թեկնածուները որքան ձայն կստանան և ինչ վարկանիշ կունենան հասարակության մեջ», - նշեց նա:
Քաղաքագետի կարծիքով` անկախ ընտրությունների արդյունքներից` գերակա խնդիրը մնում է մարտահրավերների դիմակայելու արդյունավետության հարցը, որոնք, ըստ բանախոսի` հիմնականում չորսն են` ներդրումային սովը, անվտանգության ապահովումը, ներքաղաքական կայությունը և արտաքին քաղաքականության բալանսավորումը:
Ա.Իսկանդարյանի կարծիքով` բնական ռեսուրսների սակավության պայմաններում Հայաստանի իշխանությունների առջև շարունակում է ծանրացած մնալ նոր ներդրումների` դեպի մեր երկիր ուղղորդման խնդիրը: Եվ այդ տեսանկյունից բանախոսը կարևորեց նոր քաղաքական նախաձեռնություններ, որոնք կկարողանան աջակցություն ստանալ Արևմուտքում` հիմնականում որպես քաղաքական դիվիդենտներ:
Միաժամանակ, ըստ փորձագետի, պետք է որոշակի լոբբինգ վարվի նաև Ռուսաստանի, մասնավորապես`այդ տերության բիզնես էլիտայի հետ, որը, նրա կարծիքով, որոշակիորեն սերտաճած է քաղաքական էլիտայի հետ: «Այս երկու ուղղությունների համադրմամբ հայկական քաղաքական վերնախավը պետք է կարողանա որոշակի դրական ադրյուքներ կորզել` երկրի ներկայիս իրավիճակից դուրս գալու նպատակով», - նշեց նա:
Փորձագետի գնահատմամն` նման կոմպլեմետնարիզը խսիտ կարևոր է նաև անվտանգության ապահովման տեսանկյունից: «Որևէ մի միջազգային կառույց չի կարող Հայաստանի համար ՀԱՊԿ-ի այլընտրանք լինել», - ասաց նա, ընգդծելով, որ միայն Մոսկվայի հետ ռազմաքաղաքական նման սերտ համագործակցությունն է հնարավորություն տալիս պահպանել ուժերի հավասարակշռությունը տարածաշրջանում` մասնավորապես` Ղարաբաղյան հիմնահարցի շրջանակներում:
Այս տեսանկյունից նա կարևորեց նաև եվրաինտեգրման և եվրասիական միության ուղսությամն քայլերի ճիշտ մարտավարությունը: «Եվրասիական տնտեսական միության գաղափարով Մոսկվան փորձում է ստուգել նախկին ԽՍՀՄ հանրապետությունների լոյալությունն իր նկատմամբ: Խիստ կարևոր է, որ որևէ կտրուկ քայլեր այս կամ այլ ուղղությամբ չլինեն», - ասաց նա:
Ըստ Ա.Իսկանդարյանի` երկրի համար թե ներքաղաքական և թե արտաքին հարթակներում խիստ կարևոր հարց է մնում նաև բիզնես և քաղաքական էլիտաների հավասարաչափ տարանջատումը միմյանցից: Նրա կարծիքով, որքան որ իշխանություններն ունենան նման քաղաքական կամք, այնուամենայնիվ` մոտակա 20-30 տարիների ընթացքում առանց լուրջ քայլերի իրավիճակային փոփոխություն չի լինելու: