Ձեր վստահելի աղբյուրը

Ի պատիվ պաշտոնական այցով Լեհաստանի Հանրապետությունում գտնվող Նախագահ Սերժ Սարգսյանի և նրա գլխավորած պատվիրակության՝ Լեհաստանի Նախագահ Բրոնիսլավ Կոմորովսկու անունից երեկ երեկոյան տրվել է պաշտոնական ընթրիք:

Ինչպես հայտնում են երկրի ղեկավարի մամուլի գրասենյակից, նախագահ Սերժ Սարգսյանն իր բաժակաճառում շնորհակալություն է հայտնել ջերմ հյուրընկալության համար, ապա անդրադարձել դարերի խորքից եկող հայ-լեհական բարեկամությանը, պատմական սերտ առնչությունների վրա կառուցված միջպետկան հարաբերություններին և Լեհաստանի հասարակական-քաղաքական կյանքում ակտիվ դերակատարում ունեցող լեհահայ համայնքին ու հայ-լեհական հարաբերությունների հեռանկարին:

«Մեծարգո՛ պարոն Նախագահ, հարգարժա՛ն Առաջին տիկին,
Տիկնա՛յք և պարոնա՛յք,
Ուրախ եմ գտնվել Լեհաստանի բարեկամ հողում և խորապես զգացված եմ ձեր սրտաբաց հյուրընկալության համար: Շուրջ երկու տարի առաջ, պարոն Կոմորովսկի, Դուք էիք պաշտոնական այցով գտնվում Հայաստանում, ինչից ոչ միայն պահպանվել են ջերմ հիշողություններ, այլև արձանագրվել են շոշափելի հաջողություններ: Դրանք ամրագրվել են նաև Հայաստանի և Լեհաստանի բարձրաստիճան ղեկավարության, կառավարական և տարածքային մարմինների մշտական շփումների արդյունքում:

Սա իմ առաջին այցը չէ Լեհաստան և, լիահույս եմ, ոչ էլ վերջինը, բայց միշտ ինձ զգում եմ հարազատ երկրում: Եվ դա գալիս է ոչ միայն լեհերի հյուրընկալ բնավորությունից: Կարծում եմ, մեր ժողովուրդներին միավորում է նաև փոխադարձ համակրանքը: Մեզ միավորում են ժողովրդական խառնվածքի բազմաթիվ գծեր, ինչպիսիք են մարդամոտությունը, խարազանող ինքնաքննադատությունը, ձեռներեց ջիղը, այլ միջավայրերում հարմարվելու և լավագույն բարձունքների հասնելու ձգտումը:

Պատմական սերտ առնչությունների վրա կառուցված և այսօր արդեն 20-ամյա պատմություն ունեցող մեր միջպետական հարաբերությունները բնորոշվում են բարձր մակարդակով և բովանդակային խորություն ունեցող քաղաքական օրակարգով:

Վերջին շրջանում նշանակալիորեն ակտիվացել են բարձրաստիճան փոխայցելությունները` նախագահների, վարչապետների, արտաքին գործերի նախարարների, ինչպես նաև պետական այլ գերատեսչությունների ղեկավարների մակարդակով: Առկա է համագործակցություն շուրջ մեկ տասնյակ վարչատարածքային միավորների միջև:

Այդուհանդերձ, քաղաքական ակտիվ երկխոսության և բազմաոլորտ համագործակցության պայմաններում դեռևս չօգտագործված մեծ ներուժ կա տնտեսական ոլորտում: Լիահույս եմ, որ առևտրաշրջանառության ծավալի մեծացման և Հայաստանում լեհական տնտեսական ներկայության ընդլայնման ուղղությամբ մեր հետևողական ջանքերը` Հայաստանում և Լեհաստանում պարբերաբար անցկացվող միջկառավարական հանձնաժողովի նիստերն ու գործարար համաժողովները, շատ շուտով տեսանելի արդյունքներ կտան։ Այստեղ՝ Վարշավայում, ինձ ուղեկցում են նաև հայաստանցի գործարարներ, որոնք ժամանել են մասնակցելու այս այցին զուգահեռ անցկացվող գործարար համաժողովին:

Մեծարգո՛ պարոն Նախագահ,
Հայաստանը՝ ի դեմս Լեհաստանի, միջազգային ասպարեզում ունի վստահելի գործընկեր, որը հանդիսանալով Եվրամիության Արևելյան գործընկերության քաղաքականության նախաձեռնող երկիր` սրտացավորեն սատարում է մեր երկրի եվրամերձեցման ջանքերին:

Լավ հիշողություններ ունեմ Վարշավայի Արևելյան գործընկերության գագաթնաժողովից, որին պատիվ ունեցա մասնակցել 2011թ. սեպտեմբերին: Այն կարևոր հանգրվան հանդիսացավ Հայաստանի եվրոպական հանձնառությունների ամրապնդման համար:

Հարգարժա՛ն տիկնայք և պարոնայք,
Հայ և լեհ ժողովուրդների շուրջ հազարամյա պատմական ուղիները ամուր կամուրջ են դարձել մեր երկրների բարեկամական հարաբերությունների համար: Առավել քան գնահատելի է, որ այդ բարեկամությունը ծնունդ է առել մեր ազգին բաժին հասած դժվարին պահերին` լեհ ժողովրդի բարեսիրտ ու հյուրընկալ վերաբերմունքից:

Լեհաստանի և լեհ ժողովրդի վերաբերմունքը հայերի հանդեպ դրսևորվեց նաև 2005թ. ձեր երկրի խորհրդարանի կողմից Հայոց ցեղասպանության ճանաչմամբ: Այն հաստատեց մարդկության դեմ նման ոճիրները դատապարտելու և կանխարգելելու լեհ հասարակության բարոյական մեծ գիտակցումը: Հայ ժողովուրդը և Հայաստանի իշխանությունները բարձր են գնահատում այդ քայլը:

Ինձ համար շատ հաճելի էր այսօր ներկա գտնվել Վարշավայում հայկական պուրակի անվանակոչման և խաչքարի տեղադրման արարողությանը: Մեծ ակնածանքով եմ սպասում Զամոսչ քաղաք իմ վաղվա այցելությանը, որը կրում է հայկական մշակույթի և ներկայության խորը հետքեր:

Այսօր լեհական հասարակության տարբեր շերտերում, ինչպես երկրի վարչա-քաղաքական, այնպես էլ մշակութային և գիտական շրջանակներում առկա են հայկական մասնիկներ: Բազմաթիվ են նաև հայտնի լեհ գործիչները, որոնք ունեն հայկական արմատներ` մեծանուն նկարիչներ և կոմպոզիտորներ, կինոռեժիսորներ և դերասաններ, լրագրողներ և նույնիսկ քաղաքական գործիչներ: Չեմ ցանկանում թվարկել` չնեղացնելու համար մյուսներին:

Ես հպարտ եմ, բոլոր այն հայերով, որոնք իրենց ստեղծագործ աշխատանքով մասնակցել և շարունակում են մասնակցություն բերել Ձեր երկրի բարգավաճմանը: Ես հպարտ եմ հայ-լեհական բարեկամությամբ և առավել քան վստահ եմ նրա փայլուն ապագայի մեջ»,-ասել է Նախագահ Սերժ Սարգսյանը՝ առաջարկելով բաժակ բարձրացնել ի պատիվ Նախագահ Բրոնիսլավ Կոմորովսկու և նրա տիկնոջ, ի նպաստ հայ-լեհական դարավոր բարեկամության:

Տեղեկացնենք, որ նախկին սոցիալիստական երկրներից առավել արդյունավետ անցում ապահովված երկրի` Լեհաստանի հետ Հայաստանի հարաբերությունները կրում են կանոնավոր բնույթ: Երկու երկրների միջև դիվանագիտական հարաբերությունները հաստատվել են 1992թ. փետրվարի 26-ին: Դրանք Հայաստանի անկախությունից ի վեր դինամիկ ընթացք են ունեցել` ընդգրկելով ինչպես քաղաքական, այնպես էլ տնտեսական, գիտակրթական, մշակութային և մյուս ոլորտները:

Նախորդող հրապարակումներ`

Նախագահ Սերժ Սարգսյանը Լեհաստանում պատասխանել է լրագրողների հարցերին

«Մեր տարածաշրջանում առկա են խնդիրներ, որոնք խոչընդոտում են Արևելյան գործընկերությամբ ընձեռված հնարավորությունների իրացմանը»

Հայաստանի և Լեհաստանի միջև համագործակցությունը զարգացնելու ուղղությամբ փաստաթղթեր են ստորագրվել. ՀՀ նախագահը Լեհաստանում է