«Հիմա ես ո՞նց իրեն շնորհավորեմ». Սամվել Հայրապետյանը մտադիր է բողոքարկել ընտրության արդյունքները
«Ժառանգություն» կուսակցության կողմից թիվ 38 ընտրատարածքում պատգամավորության թեկնածու առաջադրված Սամվել Հայրապետյանը չի պատրաստվում շնորհավորել ՀՀԿ-ական Արմեն Կարապետյանին:
«Չի կարող պատահի, ես ո՞նց շնորհավորեմ: Եթե իրեն թվում է` հաղթանակել է… Սա հաղթանակ չի կոչվում: Եթե սաղ իշխանական լծակները` Մաքսիմ Հակոբյանից սկսած, իր որդուց դուրս եկած, սաղ գյուղապետերով, չորս քաղաքապետով դուրս են եկել մենակ մի հոգու դեմ, ես ո՞նց կարող է իրեն շնորհավորեմ: Մասսայական ընտրակաշառք է եղել, ես ո՞նց կարող եմ իրեն շնորհավորել»,-Panorama.am-ի թղթակցին ասաց Սամվել Հայրապետյանը:
Հիշեցնենք, որ Սյունիքի մարզն ընդգրկող թիվ 38 ընտրատարածքում ԱԺ մեծամասնական կարգով լրացուցիչ ընտրությունների քվեարկության արդյունքում, ըստ Կենտրոնական ընտրական հանձնաժողովի կայքում հրապարակված նախնական տվյալների, ՀՀԿ-ական Արմեն Կարապետյանը ստացել է 20 744 ձայն, իսկ «Ժառանգության» կողմից առաջադրված Սամվել Հայարապետյանը` 3 555 ձայն:
Սամվել Հայրապետյանի շտաբը հայտարարություն է պատրաստել, շուտով տարածելու են, որտեղ կայացած ընտրություններն անարդար են որակել:
«Բերում են տատիկներ, պապիկներ… բոլորը ոնց որ քոռ լինեն Հայաստանում, ոչ մեկը չի տենում էս Հայաստանում: Ընտրողների մի 20 տոկոսը եթե քոռ լինեն, իրենց տեղը թոռնիկները ընտրություն կատարեն, խի դա ընտրությո՞ւն է կոչվում: Մեծահասկաները, ասենք փող վերցրել էին, գալիս էին թոռնիկների հետ»,-ասաց Ս. Հայրապետյանը:
Պարտված թեկնածուն ասում է, որ նման արդյունքների չէր սպասում, մտադիր է արդյունքները բողոքարկել, հիմա ապացույցներ է հավաքում, դատարանում ներկայացնելու համար. «Բողոքարկելը բողոքարկելու եմ, բայց ընդդիմադիր թեկնածուն ինչքան բողոքել է, ոչ մի տեղ ոչ մի բանով արդյունքի չի հասել: Նույնն էլ ես, ինչքան էլ բողոքարկեմ…կարող է մի բան փոխվի՞»:
Նրա ներկայացմամբ, իր թիմը բավականին փոքր էր` «կաշառքի դեմն առնելու համար»:
«Եթե ոստիկանությունը չի աշխատում, համապատասախան մարմինները չեն աշխատում, երկու օր քաղաքում փող են բաժանել, դա իրենց պարտականությունն է, հո իմ պարտականությունը չի»,-ասաց թեկնածուն ու ավելացրեց, որ իր տեղեկություններով մեկ ընտրողին 5000 դրամ են տվել, դրան էլ գումարած` հյուրասիրություն:
«Թառ առ թաղ, բոլոր տեղերում սեղաններ են գցել, հիմա ես ո՞նց իրեն շնորհավորեմ»,-նկատեց նա:
Նշենք, որ ԱԺ մեծամասնական ընտրակարգով լրացուցիչ ընտրությունների համար կազմավորված 76 տեղամասային ընտրական հանձնաժողովների կազմերում ընդգրկված 608 քաղաքացիներից առավոտյան մինչև ժամը 8.00-ն տեղամասային ընտրական հանձնաժողով չեն ներկայացել 13-ը:
Հանձաժողովների բացակայող անդամներից 5-ը ներկայացնում են Հայ ազգային կոնգրես կուսակցությունների դաշինքը, 7-ը` «Օրինաց երկիր» կուսակցությունը և հանձաժողովի մեկ անդամ` «Բարգավաճ Հայաստան» կուսակցությունը:
Կազմավորված 76 տեղամասային ընտրական հանձնաժողովների բոլոր նախագահներն ու քարտուղարներն սահմանված կարգով ներկայացել են ընտրական հանձնաժողովներ:
Նախորդող հրապարակումներ`
Թիվ 38. «Ժառանգության» թեկնածուն խախտումների մասին ենթադրություններ անել չի ցանկանում
Հայրապետյանի թիմը վստահ է. Իրենց թեկնածուն է պատգամավոր դառնալու
Թիվ 38-ում առաջադրված Հանրապետական թեկնածուն գտել է սյունեցիների վստահությունը շահելու ձևերը
Լրահոս
Տեսանյութեր
Ինչո՞ւ հանկարծ ՀՀ իշխանությունները որոշեցին խլել արցախցիների կենսաթոշակային խնայողությունները
