Այս ընտրություններն ամենակեղտոտն են Ադրբեջանի պատմության մեջ. լցոնումներ, ծեծեր, հափշտակումներ և սպառնալիքներ
Ադրբեջանի նախագահական ընտրություններն անցնում են բացարձակ կեղծման մթնոլորտում, հայտարարել է «Մուսավաթ» կուսակցության առաջնորդ Իսա Գամբարը: Ըստ «Թուրան» լրատվական գործակալության` Գամբարը նշել է, որ համատարած կերպով «կարուսել» է կիրառվում, և դա ապացուցում է` Ադրբեջանի իշխանությունն ընդունում է, որ չի կարող ժողովրդի ձայնն ստանալ արդար ճանապարհով:
Ադրբեջանի ժողովրդական ճակատ կուսակցության առաջնորդ Ալի Քերիլմին նշել է, որ ընդդիմության միավորումը և Ջամիլ Հասանլիի հաջող քարոզարշավը ոգեշնչել է քաղաքացիներին մասնակցել քվեարկությանը, սակայն Ադրբեջանի իշխանությունը կրկին կեղծումների ճանապարհն է բռնել: Քերիմլին ընդգծել է, որ առավել հատկանշական խախտումներից են քվեաթերթիկների զանգվածային լցոնումները, «կարուսելները», գործադիր կառույցների միջամտությունը: Ադրբեջանի նախագահի մեկ այլ թեկնածու և Ժողովրդական կուսակցության առաջնորդ Սարդար Ջալալօղլուն հայտարարել է, որ ընտրություններն անցնում են օրենքի զանգվածային խախտումների մթնոլորտում: «Նասիմի շրջանի 23-րդ ընտրատարածքի 20-րդ տեղամասում, որտեղ ես եմ քվեարկել, աչքերիս առջև կեղծեցին կնոջս ստորագրությունը, իսկ իր քվեաթերթիկը տվեցին մեկ ուրիշ կնոջ», - ասել է նա:
«EL» շարժման առաջնորդ Էլդար Նամազովն իր անունն ընդհանրապես չի գտել Նասիմի շրջանի 28-22 տեղամասում: «Համատարած կերպով կեղծումներ են տեղի ունենում: Եթե նախկինում դրանք ընտրությունների ավարտին էին կատարվում, ապա այժմ դրանք արվում են ամենասկզբից: Իշխանությունն այնքան անվստահ է, որ առավոտից սկսած կեղծիքների է դիմում: Սա անկախ Ադրբեջանի պատմության մեջ ամենակեղտոտ ընտրություններն են», - ասել է Նամազովը: Լիբերալ կուսակցության Գործադիր հանձնաժողովի նախագահ Ավազ Թեմիրհանը նույնպես հայտնել է ընտրությունների զանգվածային խախտումների մասին: Իսկ Ազգային խորհրդի առաջնորդ Ռուստամ Իբրահիմբեկովը, ով այժմ Մոսկվայում է, նշել է, որ արդար ընտրությունների դեպքում Ջամիլ Հասանլիի հաղթանակը կասկածից դուրս է: «Սակայն իշխանությունն օգտագործում է բոլոր հնարավոր միջոցները և խախտումների բոլոր տեսակները քվեարկության արդյունքները կեղծելու համար», - նշել է նա:
«Թուրանը» նաև հաղորդում է, որ Ժողովրդավարական ուժերի ազգային խորհրդի նախագահի թեկնածու Ջամիլ Հասանլին պամել է Բաքու հասնող տվյալների և շրջաններում քվեարկության ընթացքում գրանցված զանգվածային խախտումների մասին:
«Մի շարք ընտրատեղամասերում գրանցվել են քվեաթերթիկների զանգվածային լցոնումներ: Ցավոք, իշխանության շատ ներկայացուցիչներ մասնակցում են կեղծումներին` դառնալով պետական ամենածանր հանցագործության` իշխանության յուրացման հանցակիցը», - ասել է Հասանլին:
Գործակալությունը հայտնում է, որ Ընտրությունների մոնիթորինգի և ժողովրդավարության ուսուցման կենտրոնի հետ համագործակցող 19 դիտորդներին չի թույլատրվել մոնիթորինգ իրականացնել: Ընդհանուր առմամբ, Կենտրոնը 794 դիտորդ է ուղարկել: Տեղամասերի 16%-ում չի հայտարարվել քվեարկության համար նախատեսված քվեաթերթիկների թիվը: Տեղամասերի 27%-ում չի հայտարարվել տեղամասերից դուրս (շրջիկ արկղ) քվեարկող ընտրողների թիվը:
«Ազատություն Ռադիոկայանի» ադրբեջանական ծառայությունը հայտնում է, որ Բեյլագանի 81-րդ ընտրատարածքի 8-րդ ընտրատեղամասում ծեծի է ենթարկվել Ադրբեջանի Ժողովրդական ճակատ կուսակցության` Ֆիզուլի շրջանի շտաբի ղեկավար Ֆաուդ Գահրամանլին: Նա մատնացույց է արել օրենքի խախտումը, որից հետո նրան ծեծի են ենթարկել` կոտրելով քիթը: Ռադիոկայանի կայքում նաև Մասսալինի շրջանի 70-րդ ընտրատարածքի 17-րդ ընտրատեղամասից լուսանկար է հրապարակվել, որտեղ պատկերված է, թե ինչպես է մի տղամարդ միանգամից մի քանի քվեաթերթիկ գցում քվեատուփ:
«Minval.az» պորտալը հաղորդում է, որ զանգվածային խախտումներ են գրանցվել Նեֆտչալի շրջանի 61-րդ ընտրատարածքում, որտեղ դիտորդ Ադիլ Աջար օղլուի խոսքերով քվեաթերթիկների զանգվածային լցոնումներ են նկատվել: Պորտալը հայտնում է, որ ընդդիմության դիտորդների վրա ճնշում է գործադրվում: Այդպես, Ագջաբեդի շրջանի դիտորդ Բեհրուզ Աբդուրահմանին կանչել են իշխող կուսակցության շտաբ և փորձել են գրավոր խոստովանություն վերցնել այն մասին, որ ընտրություններն անցնում են ժողովրդավարական պայմաններում: Շրջանի գործադիր իշխանության տեղակալը նույն կերպ շանտաժի է ենթարկել մյուս դիտորդների` Իլկին Հասանլիին և Ալիմշահ Գուլիևին: Սակայն վերջիններս չեն վախեցել և այդ մասին տեղեկացրել են իրենց թեկնածու Ջամիլ Հասանլիին:
«Թուրան» լրատվական գործակալությունը հաղորդում է, որ Ազգային խորհրդի նախագահի թեկնածուի ընտրական շտաբը կոչ է անում հայտնել նախագահական ընտրությունների քվեարկության ընթացքում գրանցվող զանգվածային խախտումների մասին: Այդպես, Երրորդ Սուրահանի շրջանի 32-րդ ընտրատարածքի 18 և 26 տեղամասերում ընտրողների մատնանշանների համար նախատեսված անտեսանելի թանաք չկա: Լենքորանի գյուղական շրջանի 39-րդ ընտրատարածքի 74-րդ տեղամասում ոստիկանները տեղամասից հեռացրել են դիտորդ Հիքմետ Մամեդովին:
45-րդ ընտրատարածքի 10-րդ տեղամասում կիրառվում է «կարուսել», որտեղ մի խումբ մարդիկ մեքենաներով տեղափոխվում են մի տեղամասից մյուսը: Նեֆտչալի շրջանի 61-րդ ընտրատարածքում գրանցվել են հանձնաժողովի անդամների կողմից քվեաթերթիկների լցոնում: Հաթայինի շրջանի 34 ընտրատարածքի 7-րդ տեղամասում 7 քվեաթերթիկներով ընտրող է բռնվել: 50-րդ ընտրատարածքում «Baku Steel Company»-ի մոտ 50 աշխատակից մասնակցում են «կարուսելին»: Նմանատիպ «կարուսել» է տեղի ունենում նաև Յասամալի շրջանի 16-րդ ընտրատարածքի 5- 6 և 9-10 տեղամասերում: Ջամիլ Հասանլիի շահերը ներկայացնող հանձնաժողովի անդամներին չի թույլտրվում գրանցել խախտումները: Շամքիրի քաղաքային շրջանի 98-րդում, Շամքիրի գյուղական շրջանի 99-րդում և Շամքիր-Դաշքեսանի շրջանի 100-րդում մարդկանց Ադրբեջանի ժողովրդական ճակատ կուսակցության կեղծ դիտորդական վկայականներ է բաժանվել:
Բացի այդ, «Թուրան» գործակալությունը հայտնում է, որ Ադրբեջանի Ազգային անվտանգության նախարարության աշխատակիցները Նախիջևանում դիտորդ են գողացել: Շարուրի շրջանի 34-րդ ընտրատեղամասի դիտորդը հայտնել է, որ Իսրայիլ Ալեքփերլին իրեն խնդրել է դուրս գալ, նստեցրել է մեքենան, տարել անհայտ ուղղությամբ և այնտեղ սպառնացել է ընտանիքին, շանտաժի ենթարկել` պահանջելով չգնալ ընտրատեղամաս և ընդհանրապես չզբաղվել քաղաքականությամբ: Ալեքփերլին ճանաչել է սպառնացողին. նա Ազգային անվտանգության նախարարության տեղի աշխատակիցներից է եղել:
Այսօր կեսօրին «Պրոգնոզ» սոցիոլոգիական հետազոտությունների կենտրոնը հրապարակել է Ադրբեջանի նախագահական ընտրությունների վերաբերյալ exit-poll-ի ընթացիկ արդյունքները: Ժամը 10:30-ի դրությամբ այդ ՀԿ-ի տվյալների համաձայն`թեկնածուների շարքում առաջնորդը Իլհամ Ալիևն է (ձայների 92,15%), երկրորդ տեղում ընդդիմադիր Ջամիլ Հասանլին է` 6,06%:
Սակայն Ընտրությունների մոնիթորինգի և ժողովրդավարության ուսուցման կենտրոնի գործադիր քարտուղար Բաշիր Սուլեյմանլին «Թուրանին» հայտնել է, որ քվեարկության ընթացքում հարցումների հրապարակումը օրենքի լուրջ խախտում է: «Բոլոր exit-poll-երը վստահություն չեն ներշնչում, քանի որ դրանք անցկացվում են իշխանամետ կառույցների կամ նրանց օտարերկրյա գործընկերների կողմից: Անկախ կառույցներին չի թույլատրվել exit-poll անցկացնել», - ասել է Սուլեյմանլին:
Ադրբեջանի ԿԸՀ-ում հայտնել են, որ «Պրոգնոզ» կենտրոնի հաղորդագրության մասին տեղեկատվություն չունեն, սակայն նշել են, որ քվեարկության ընթացքում հարցումների արդյունքների հրապարակումն անօրինական է:
Լրահոս
Տեսանյութեր
Հայաստանի ու հայ ժողովրդի շահերը պաշտպանող իշխանություն գոյություն չունի. Բագրատ Սրբազան
