Ձեր վստահելի աղբյուրը

«Տիկին Փոստանջյան, տենց է ընդունվա՞ծ` դուք ինչ ասում եք այստեղ անցնո՞ւմ է, հա՞: Եթե Բեգլարյան Գագիկը ուզենար մոնոպոլիա ստեղծել, օրենքի նախագծով տաքսիստների աշխատանքն այսքան չէր պարզեցվի, այլ կբարդացվեր, որպեսզի ոչ բոլորը հնարավորություն ունենային աշխատել: Եվ դա հասկանալու համար սովորական տրամաբանություն է պետք. ուսումնասիրեք և տեսեք, որ այնչափ է պարզեցվել տաքսու վարորդ աշխատելը, որ յուրաքանչյուր մարդ կարող է աշխատել` դիմել ու ստանալ թույլտվություն և առանց գումար վճարելու աշխատել»,- արձագանքելով «Ժառանգություն» խմբակցության ղեկավար Զարուհի Փոստանջյանի հարցին, թե տաքսիստները իրեն բողոքել են, որ տաքսիների գործունեության վերաբերյալ նոր կարգը ընդամենը միջոց է Գագիկ Բեգլարյանի կողմից մոնոպոլիա ստեղծելու համար, քանի որ հազարավոր նոր տարեթվի մեքենաներ են ներկրվելու,  հայտարարեց Տրանսպորտի և կապի նախարար Գագիկ Բեգլարյանը:

Նախարարը շեշտեց` պարզեցնել, ոչ թե մոնոպոլիա ստեղծել, բայց եթե Զ.Փոստանջյանն ընդամենը ուզում էր Գագիկ Բեգլարյան անուն ազգանունը հնչեցներ, ապա դա ուրիշ բան.

«Բայց երբ տրամաբանությունից դուրս բաներ եք ասում, դա ճիշտ չի»,- նշեց նախարարը:

Թվարկեց նաև, թե ինչ է արել իր պաշտոնավարման ժամանակ, որպեսզի հակառակը` թեթևացնի տաքսու վարորդների առօրյա հոգսերը և, մասնավորապես, վերացրել այն կարգը, համաձայն որի ամսական վարորդները ինչ-որ ՊՈԱԿ-ների 25 -30 հազար դրամ գումար էին վճարում.

«Եթե կան ինչ-որ չորս-հինգ հոգի, որոնք պաշտպանում են այն մարդկանց, որոնք ի օգուտ տաքսու վարորդների միլիարդներ էին աշխատում, դա չի նշանակում, որ տաքսիստները բողոքում են: Ես նորից եմ ասում, եթե դուք մի անգամ նստեք տաքսի և վարորդին հարցնեք, թե որքան են նրանք շնորհակալ այդ մեր որոշումից, դուք կզարմանաք ձեր իսկ հայտարարածի վրա»,- դիմելով «Ժառանգության» ներկայացուցչին` ասաց Գ.Բեգլարյանը:

Զ.Փոստանջյանն էլ տեղեկացրեց, որ հենց այսօր է նստել տաքսի, ինչին լսվեց նախարարի զարմացած «Լա~վ է» ռեպլիկը:
Փոստանջյանը տեղեկացրեց, որ այդ վարորդից էլ է փորձել հետաքրքրվել  նոր կարգի վերաբերյալ և այդ վարորդն էլ նույն կարծիքին է եղել, այն է` «Գ.Բեգլարյանը պատրաստվում է ներկրել բազմաթիվ քանակի մեքենաներ և օրենքի փոփոխությունն էլ, ըստ այդմ, հենց նախարարի կողմից է նախաձեռնվել»:

Գ.Բեգլարյանը, սակայն, այլևս չշարունակելով երկխոսությունը, որում իր հասցեին միայն մեղադրանքներ էին հնչում, ասաց.
«Տիկին Փոստանջյան, այսօրվանից հետո եթե նստեք տաքսի ինձ թվում է արդեն կասե՞ք չէ, որ տաքսիստը սխալ գիտի, որովհետև արդեն հասկացա՞ք, չէ, որ պարզեցվում է տաքսիստ-իշխանություն հարաբերությունը: Հիմա, ինձ թվում է, դուք ունեք այն ազնվությունը, որ յուրաքանչյուր տաքսիստ, որ ունի այս հարցի վերաբերյալ թյուրըմբռնում, նրան հակառակում կհամոզեք, որի համար շատ շնորհակալ եմ »,- իր խոսքը եզրափակեց Տրանսպորտի և կապի նախարարը:

Նշենք, որ երկխոսության հատկապես այս հատվածում ԱԺ նախագահ Հովիկ Աբրահամյանն ու փոխխոսնակներ Էդուարդ Շարմազանովն ու Հերմինե Նաղդալյանը իրենց ժպիտը չէին կարողանում թաքցնել, ինչպես և դահլիճում նստած մյուս պատգամավորները: