Ձեր վստահելի աղբյուրը

«Նոր պատժամիջոցների կիրառման դեպքում ժնևյան համաձայնությունը կդադարի գոյություն ունենալ»,-այդ մասին իրանական «ԻՍՆԱ» լրատվական գործակալության հաղորդմամբ՝ այսօր լրագրողների հետ հանդիպման ժամանակ հայտարարել է ԻԻՀ ԱԳՆ մամլո խոսնակ Մարզիե Աֆխամը:

Լրագրողի այն հարցին, թե ո՞ր քայլերը Իրանը կհամարի որպես ժնևյան համաձայնության խախտում, ԻԻՀ ԱԳՆ պաշտոնական ներկայացուցիչը մասնավորապես հայտարարել է. «Իրանը հայտարարել է, որ նոր պատժամիջոցների կիրառման դեպքում ժնևյան համաձայնությունը կդադարի գոյություն ունենալ. Հուսով ենք, որ կողմերը հավատարիմ կմնան ձեռք բերված համաձայնությանը»:

Իրանական «իրդիփլոմասի.իր» կայքի հաղորդմամբ՝ ԱՄՆ-ն վերջերս իրանական 19 ընկերությունների ընդգրկել է «սև ցուցակում»:

«ՖԱՐՍ» լրատվական գործակալության հաղորդմամբ էլ՝ նախօրեին Իրանի և ԱՄՆ-ի արտաքին գերատեսչության ղեկավարներ Մոհամմադ Ջավադ Զարիֆը և Ջոն Քերին հեռախոսազրույց են ունեցել, որի ընթացքում իրանական կողմը իր դժգոհությունն է հայտնել համատեղ մշակված գործողությունների ծրագրում տեղի ունեցող զարգացումների առնչությամբ:

Հիշեցնենք, որ Ժնևում Իրանի և «5+1 խմբի» միջև ս.թ. նոյեմբերի 24-ին ձեռք բերված պայմանավորվածության համաձայն՝

1. Իրանը հայտարարում է, որ 6 ամսվա ընթացքում ուրանը 5 տոկոսից ավել չի հարստացնի
2. Իրանի պետրոքիմիական արտադրանքի արտահանման և ոլորտի հետ կապված այլ ծառայությունների նկատմամբ սահմանված պատժամիջոցների կասեցում
3. Ոսկու և թանկարժեք մետաղների ոլորտում առկա սահմանափակումների կասեցում
4. Ավտոմոբիլային արդյունաբերության ոլորտի նկատմամբ ԱՄՆ-ի սահմանած պատժամիջոցների կասեցում
5. Իրանի քաղաքացիական ինքնաթիռների համար անվտանգ թռիչքներ ապահովելու նպատակով համապատասխան սերտեֆիկատի և անհրաժեշտ պահեստամասերի տրամադրում
6. ՄԱԿ-ի ԱԽ կողմից Իրանի նկատմամբ նոր պատժամիջոցներ չպետք է կիրառվեն
7. ԵՄ-ի կողմից Իրանի նկատմամբ նոր պատժամիջոցներ չպետք է կիրառվեն
8. ԱՄՆ-ի կառավարությունը նախագահի և Կոնգրեսի իրավասությունների շրջանակներում ձեռնպահ է մնալու Իրանի նկատմամբ նոր պատժամիջոցներ կիրառելուց