Ձեր վստահելի աղբյուրը

«Իրանը ուրանը 20 տոկոսից ավել հարստացնելու կարիք չունի»,-այդ մասին իրանական «ՄԵՀՐ» լրատվական գործակալության հաղորդմամբ հայտարարել է ԻԻՀ փոխնախագահ, Ատոմային էներգիայի կազմակերպության ղեկավար, Ալի Աքբար Սալեհին:

Իրանի փոխնախագահը իրանական «Ջամ-է ջամ» հեռուստաալիքին տված հարցազրույցում, անդրադառնալով Իրանի և «5+1 խմբի» միջև ստորագրված համաձայնագրին և դրանից բխող պարտավորություններին, մասնավորապես նշել է. «Ցանկանում եմ ժողովրդին վստահեցնել, որ ժնևյան համաձայնագրի ստորագրմամբ՝ Իրանի միջուկային ծրագրով նախատեսված գործողությունները չեն դանդաղի. Ուրանի հարստացման աշխատանքների դադարեցումը մեր գործին չի վնասի»:

Շարունակելով խոսքը՝ Ալի Աքբար Սալեհին հավելել է. «Ուրանը 20 տոկոս հարստացնելու իրավունքից չենք հրաժարվում: Մենք 4-5 տարվա համար վառելիքի պաշար ենք կուտակել և 20 տոկոս հարստացնելու կարիք չունենք. Ուրանի հարստացման աշխատանքների դադարեցումը բխում է Իրանի ազգային շահերից»:

Նշենք, որ Ժնևում Իրանի և «5+1 խմբի» միջև 2013թ. նոյեմբերի 24-ին ձեռք բերված պայմանավորվածության համաձայն՝ ՄԱԿ-ի ԱԽ-ն, ԵՄ-ն և ԱՄՆ-ն պետք է ձեռնպահ մնան Իրանի նկատմամբ նոր պատժամիջոցներ կիրառելուց: Իրանն էլ իր հերթին պարտավորվել է 6 ամսվա ընթացքում ուրանը 5 տոկոսից ավել չհարստացնել:

Նախորդող հրապարակում՝

Սպիտակ տունը դեմ է Սենատի՝ Իրանի նկատմամբ պատժամիջոցներ կիրառելու որոշմանը