Ձեր վստահելի աղբյուրը

«Ես ցավով արձանագրում եմ, որ սեպտեմբերի 3-ից հետո անցել է չորս ամիս, մշակվել է ՄՄ-ին` մեր անդամակցության բանակցությունների ճանապարհային քարտեզը, բայց մեր հասարակության մեջ կառուցողական բանավեճ, երկխոսություն չկա»,-Panorama.am-ի հետ զրույցում ասաց «Ինտեգրացիա և զարգացում» ՀԿ նախագահ Արամ Սաֆարյանը:

Նրա խոսքով, ինքը սպասում էր, որ բանակցային գործընթացը պետք է լինի թափանցիկ, որովհետև մեր հասարակությունը պետք է իմանար և ոգևորվեր այս անդամակցությունից սպասվող հեռանկարով, սակայն դրա մասին շատ քիչ են խոսում, մանրամասն տեղեկություններ դժվար են ստացվում:

«Մինչև հիմա քննարկվում է Մաքսային միությանը միանալ-չմիանալու հարցը, իսկ ես այդ հարցի քննարկումը համարում եմ բացարձակապես ոչ կառուցողական, որովհետև որոշումն արդեն ընդունված է: Գործն արդեն ավարտված է, հիմա մենք բանակցությունների փուլում ենք գտնվում, ի՞նչ է նշանակում անընդհատ նույն սիրողական մակարդակում քննարկել` սա լավ է, թե վատ»,- նշեց Ա.Սաֆարյանը:

ՀԿ նախագահի կարծիքով, մեր հասարակությունը պետք է ավելի շատ լսի այն քաղաքական գործիչներին, տնտեսագետներին, որոնք այսօր ներգրավված են այդ գործընթացում, ինչպես նաև հասարակական հետաքրքրություն ցուցաբերի. «Չլինի հասարակական հետաքրքրություն` Եվրասիական ինտեգրման կողմնակիցների թիվը գնալով կպակասի Հայաստանում: Դա ցույց է տվել մյուս երկրների փորձը»:

Մեր այն հարցին, թե վերջին օրերին ակտիվորեն քննարկվում է հունվարի 1-ից հնարավոր թանկացումների թեման  և արդյո՞ք հասարակությունն իսկապես անհանգստանալու տեղիք ունի, Արամ Սաֆարյանը պատասխանեց. «Երբ մենք ընդունենք 70 օրենքներն ու մնացած փաստաթղթերը, պետք է ելնենք նրանից, թե ինչ մաքսատուրքեր կդրվեն ապրանքների վրա: Սա է իրականությունը: Եվ ուզում եմ հիշեցնել, որ երբ Վլադիմիր Լեպեխինը եկավ Երևան, ասաց, որ «Հայաստանը պետք է ավելի համարձակ լինի Եվրասիական տնտեսական հանձնաժողովի հետ բանակցություններում, որովհետև եթե Հայաստանը հստակ ձևակերպի ազգային շահը, ապա մեր պետությունն ընդառաջ կգնա»: Հիմա ես ուզում եմ իմանալ ` մեր ազգային շահը ինչպե՞ս են ձևակերպում, մեր բանակցողները ինչպե՞ս են ներկայացնում այդ հարցը: Եվ եթե կա անհանգստանալու տեղ, ապա ինչու չեն ահազանգում դրա մասին, գուցե հասարակությունը նրանց օգնության գա, գնանք օգնենք ավելի լավ ձևակերպելու խնդիրները: Ի վերջո, դա միայն բանակցողներին չի վերաբերում, այլ բոլորիս» ,- նշեց մեր զրուցակիցը:

Արամ Սաֆարյանից հետաքրքրվեցինք նաև` օտարերկրյա քաղաքացիների, այդ թվում ՀՀ քաղաքացիների նկատմամբ օրենսդրության խստացումն արդյո՞ք տեղավորվում է ՄՄ-ին անդամակցելու գաղափարախոսության մեջ:
 

«Սա ևս խնդիր է, որ պետք է ահազանգվի, ինչո՞ւ չի բարձրաձայնվում»,- ասաց Ա.Սաֆարյանը:

Panorama.am-ի զրուցակիցը մատնանշեց Եվրոպայի փորձը, երբ բացվեցին բոլոր սահմանները, վերացվեց վիզային ռեժիմը և հիմա ազատ տեղաշարժման գոտի է. «Եթե մենք ցանկանում ենք ունենալ մեծ շուկա` աշխատանքի, ֆինանսների, ծառայության և սպասարկման, ապա պարտավոր ենք պետական մակարդակով քննարկել ՀՀ քաղաքացիների` ՌԴ-ում տեղաշարժի վերաբերյալ այս խստացված օրենսդրությունը: Այդ ժամանակ` բանակցությունների արդյունքում, կլուծվեն շատ խնդիրներ ու հատկապես սեզոնային աշխատանքի մեկնողներին հուզող խնդիրները»,- հավելեց նա, ևս մեկ անգամ կրկնելով` բարձրացնել է պետք այս հարցը, այլապես մենք չենք ստանա այն, ինչ ուզում ենք:

Հիշեցնենք, ըստ հունվարի 1-ից գործող օրենսդրության` օտարերկրյա քաղաքացիները ՌԴ տարածքում կարող են գտնվել վեց ամիսների ընթացքում ընդամենը 90 օր:

Նախորդիվ`

ՀՀ քաղաքացիները ՌԴ-ում կարող են մնալ միայն 90 օր