Ձեր վստահելի աղբյուրը

 Ադրբեջանում «Մեշա գարդաշլարը» (անտառային եղբայրներ) և «Ջեյշուլլահ» (Ալլահի բանակ) ծայրահեղ կրոնական խմբավորումները պատերազմ են հայտարարել Ադրբեջանի իշխանություններին: Ադրբեջանում ծայրահեղ կրոնական կազմակերպությունների գործունեությունը դուրս է եկել վերահսկողությունից

Վերջին իրադարձություններն Ադրբեջանի շուրջ ցույց են տալիս, որ ադրբեջանական հասարակության շրջանում կրոնական տարբեր կազմակերպությունների գործունեությունն արդեն դուրս է գալիս իշխանությունների վերահսկողությունից:

Արդյունքում Ադրբեջանի քաղաքացիները, ընկնելով այս խմբավորումների ազդեցության տակ, մեկնում են Սիրիա՝ պատերազմելու Բաշար ալ-Ասադի վարչակարգի դեմ: Ընդ որում վերջին շրջանում գրոհայինների հոսքը Սիրիա անընդմեջ ավելանում է. գրեթե ամեն օր հարևան երկրի ԶԼՄ-ները տեղեկություններ են տարածում, որ Սիրիայում սպանվել է ադրբեջանցի հերթական գրոհայինը:

Բաքվի իշխանությունները հայտնվել են բավական բարդ դրության մեջ, քանի որ, ըստ էության, ծայրահեղ կրոնական կազմակերպությունները լուրջ վտանգ են ներկայացնում իշխանությունների համար և փաստորեն հանդիսանում են իրական ընդդիմությունն Ադրբեջանում: Իրավիճակն էլ ավելի են բարդացնում որոշ պաշտոնատար անձանց ու գործարարների՝ վահաբականների հետ ֆինանսական կապերի առկայության փաստերը: Տեղեկություններ կան, որ, մասնավորապես, Բաքվի քաղաքապետ Հաջիբալա Աբութալիբովի որդին՝ Իսրաֆիլ Աբութալիբովը կապեր ունի իսլամիստների հետ և ֆինասապես աջակցում է նրանց:

Չի բացառվում, որ իշխանական շրջանակներում կան ուժեր, որոնք փորձում են օգտագործել վահաբականներին իշխանությունում էլ ավելի բարձր դիրք գրավելու համար՝ օգտագործելով վերջիններիս հսկայական ազդեցությունը հասարակության որոշ շերտերի վրա: Ինչ վերաբերվում է վերոհիշյալ խմբավորումներին, ապա, ամենայն հավանականությամբ, վերջիններս նման կոշտ հայտարարություններ են հնչեցնել կապված հունվարի 28-ին Կովկասի մուսուլմանների վարչության հրապարակած ֆեթվայի հետ, համաձայն որի որոշ ադրբեջանցիների՝ այլ երկրներում ընթացող հակամարտություններին ներգրավելը չի խրախուսվում:

Բացի դրանից ԿՄՎ նախագահ Ալլահշուքյուր Փաշազադեն քննադատել է ծայրահեղականներին երիտասարդներին ճշմարիտ ուղղուց շեղելու և Սիրիա ուղարկելու համար:

Փաստորեն լուրջ կասկածի տակ են հայտնվում Բաքվի իշխանությունների հայտարարությունները, որ Ադրբեջանը լիովին աշխարհիկ պետություն է, և կրոնական հոսանքները մեծ ազդեցություն չունեն հասարակության վրա:

Իշխանությունում լավ են հասկանում, որ ադրբեջանցիների հոսքը Սիրիա լուրջ հարված է երկրի միջազգային հեղինակությանը, և Ադրբեջանը ակամայից հայտնվում է ահաբեկչությունը հովանավորող երկրների շարքում:

Հունվարի 28-ի ֆեթվան կարելի է համարել հուսահատ քայլ իշխանությունների կողմից, որոնք, ըստ էության, չեն կարողանում վերահսկել երկրում իսլամական տարբեր հոսանքների գործունեությունը և իրենց քաղաքացիների ակտիվ մասնակցությունը սիրիական հակամարտությանը: Վերոնշյալ բոլոր փաստերն ապացուցում են, որ Ադրբեջանն այսօր լրջորեն ներգրաված է միջազգային ահաբեկչական ցանցի մեջ, բացի դրանից հասարակության շրջանում գաղափարական վակուումի առկայությունը պարարտ հող է ստեղծել ծայրահեղական տարբեր հոսանքների գործունեության համար:

Հիշեցնեմ` «Անտառային եղբայրները», որոնք հայտնի են նաև «Դերբենտի ջամաաթ», կամ «Հարավային խմբավորում» անվանումներով գործում են հիմնականում Դաղստանի հարավում և Ադրբեջանի հյուսիսում:

«Ջեյշուլլահ» խմբավորումը նպատակ ունի հեղաշրջում իրականացնել իսլամական երկրներում և հաստատել շարիաթի օրենքների վրա հիմնված իշխանություններ:

Ադրբեջանագետ` Սարգիս Ասատրյան