Ձեր վստահելի աղբյուրը

«Ես տեղյակ եմ Մ.Խոջոյանի վիճակից, և ասեմ, որ որևէ կասկած չկար, թե ինչպես պետք է վարվեն գերի ընկած հայի հետ»,- Panorama.am-ի հետ զրույցում ասաց ԱԺ Եվրաինտեգրման հարցերի մշտական հանձնաժողովի նախագահ, ԲՀԿ խմբակցության քարտուղար Նաիրա Զոհրաբյանը` ավելացնելով, որ հենց այդ մտահոգությունն է պատճառը, որ նախօրեին, նախքան կհրապարակվեր Մ.Խոջոյանի մարմնի վրա առկա բռնության հետքերի մասին, պատգամավորը կրկին դիմել է ԵԽ մարդու իրավունքների հանձնակատարին` հայ գերի Հակոբ Ինջիղուլյանի խնդրով:

«Խնդրել եմ, որ ինքը` որպես Եվրոպայի խորհրդի մարդու իրավունքների հանձնակատար, ուղղակիորեն օգտագործելով իր իրավասությունը, ազդեցությունը անի հնարավորը, որպեսզի Հակոբ Ինջիղուլյանը տեղափոխվի Հայաստան կամ երրորդ երկիր: Իմ նամակում հստակ նշել եմ, որ Ադրբեջանում անցկացրած յուրաքանչյուր օրը Հակոբի կյանքին ուղղակիորեն սպառնալիք է»,- նշեց Ն.Զոհրաբյանը:

Ի վերջո, շարունակեց նա, Ադրբեջանը, որպես ԵԽ երկիր, ստանձնել է միջազգային պարտավորություններ, նաև Ժնևյան կոնվենցիայով գերիների և ռազմագերիների մասով, բայց, շեշտեց ԲՀԿ-ական պատգամավորը, այնպես, ինչպես Ադրբեջանն է վարվում գերիների ու ռազմագերիների հետ, դա ուղղակիորեն անթույլատրելի է: Եվ պետք է անպայմանորեն այդ հարցը քննարկման դառնա միջազգային բոլոր կառույցներում, որտեղ Ադրբեջանը ներկայացված է:

«Հիշենք Մանվել Սարիբեկյանի օրինակը, երբ անասելի կտտանքների ենթարկված հովվի դին վերադարձրեցին ծնողներին: Ես այդ պատճառով էլ նախապես եմ իմ նամակն ուղարկել ԵԽ մարդու իրավունքների հանձնակատարին, որպեսզի ԵԽԽՎ ապրիլյան նստաշրջնում, որը մեկնարկելու է ապրիլի 7-ին, նա մեզ` հայ պատվիրակներիս, պատասխանելու բան ունենա Հակոբ Ինջիղուլյանի հետ կապված»,- հավելեց Ն.Զոհրաբյանը:

Պատասխանելով Panorama.am-ի հարցին, թե իր կարծիքով ինչու Ադրբեջանը մեկ ամիս անցա վերադարձրեց Մամիկոն Խոջոյանին, իսկ Հակոբ Ինջիղուլյանին մի քանի ամիս է չեն վերադարձնում ու չեն համաձայնվում տեղափոխել երրորդ երկիր, գուցե տարիքն է հիմնական պատճառը, ԲՀԿ-ական պատգամավորն ասաց, որ գուցե և այդ գործոնն աշխատած լինի, բայց ամեն դեպքում դժվար է Ադրբեջանի քաղաքականության ու քայլերի մեջ որևէ տրամաբանություն գտնել:

«Մի երկիր, որն իր խորհրդարանի պատգամավորներին` ԵԽԽՎ պատվիրակության անդամներին, ի տես աշխարհի ուղարկում է օդանավակայան մարդասպան Սաֆարովին դիմավորելու, մի երկիր, որն ասում է` լինելով ԵԽ անդամ թքել եմ միջազգային բոլոր կառույցների վրա.... ի՞նչ տրամաբանությու ու ադեկվատություն կարող ենք սպասել այդ երկրից: Ուստի` օր առաջ պետք է անենք հնարավորը, կրկնում եմ, Հակոբին Հայաստան կամ գոնե երրորդ երկիր տեղափոխելու համար»,- հավելեց Նաիրա Զոհրաբյանը:

Հիշեցնենք, նախօրեին Panorama.am-ի հետ զրույցում նույն օրը հայրենադարձված Մամիկոն Խոջոյանի գյուղի գյուղապետն ասաց, որ նրա մարմնին բազմաթիվ բռնության հետքեր կան, նա շատ վատ առողջական վիճակում է, ոչ մեկին չի ճանաչում:

Ավելի ուշ պաշտոնական հաղորդագրությամբ հանդես եկավ նաև Պաշտպանության նախարարությունը` հաստատելով, որ 77-ամյա ծերունու մարմնի վրա բազմաթիվ են կպտուկները, կոտրծաքներն ու վնասվածքները:

Նախորդիվ`

Մամիկոն Խոջոյանի մարմնի վրա բռնության բազմաթիվ հետքեր կան, նա ոչ մեկի չի ճանաչում. գյուղապետ

ՊՆ. Մ. Խոջոյանը կապտուկներ, կոտրվածքներ և վնասվածքներ ունի