Ձեր վստահելի աղբյուրը

 Ուկրաինայի ազգային ասամբլեայի գործադիր կոմիտեի (УНА-УНСО) ղեկավար Միկոլո Կարպյուկը ադրբեջանական Վեստի.ազ լրատվական գործակալության հետ զրույցում նշել է, որ ինքն անձամբ, ադրբեջանի կողմից չի մասնակցել Ղարաբաղյան պատերազմին, սակայն իրենց կազմակերպության մեծ թվով կամավորներ եղել են ռազմաճակատում: Վերջինս ասել է, որ պատերազմի վերսկման դեպքում պատրաստ են ամեն կերպ աջակցել Ադրբեջանին` «վերականգնելու նրա տարածքային ամբողջականությունը»:

Ռազմական փորձագետ Հրաչյա Պետրոսյանցը Panorama.am-ի հետ զրույցում, այս առնչությամբ նշեց, որ ուսումնասիրել է «УНА-УНСО»-ի թեման ու ասաց, որ այդ կազմակերպության անդամներին, որոնց ավելի շատ ընդունված է ասել բենդերներ, հայ կամավորականները ծանոթ են ղարաբաղյան պատերազմից:

«Այդ կազմակերպության մի խումբ անդամներ, Ադրբեջանի կողմից մարտնչել են հայկական ուժերի դեմ և նրանք այդ մասին բացահայտ խոստովանում են: 2000-ականներին լույս է տեսել նրանց ղեկավարներից մեկի գիրքը, որում վերջինս անդրադարձել է նաև Ղարաբաղում ընթացած մարտական գործողություններին և իրենց կազմակերպության ներկայացուցիչների մասնակցությանը:

Մի հետաքրքիր պատմություն կա, որ տեղ է գտել այդ գրքում: Դրա հեղինակը գրում է, որ Հայաստան են եկել այն ժամանակ, երբ իրենց կազմակերպության անդամ հանդիսացող օդաչուն գերության մեջ է եղել ու եկել են պայմանավորվել վերջինիս հետ վերադարձման հարցում: Իր տպավորությունները հանձնելով թղթին`գրքի հեղինակը նշել է, որ այն տրամադրվածությունը, որն ունեցել են հայերը պատերազմում, կարող էր նրանց թույլ տալ հասնել մինչև Բաքու»,- նշեց Հ. Պետրոսյանցը:

Նրա խոսքերով, գրքի հեղինակը նաև ասել է, որ շատ դժվար է կռվել հայերի դեմ ու չարժի հայերի դեմ կոնֆլիկտի մեջ մտնել. վերջինս նաև հաշվի է առել այն հանգամանքը, որ իրենց կազմակերպության անդամները Վրաստանի կողմից պատերազմ էլ են նաև Աբխազիայի հետ ու մեծ կորուստներ են ունեցել հատկապես Աբխազիայի հայկական ջոկատների հետ մարտերի ժամանակ:

Ըստ փորձագետի, «УНА-УНСО»-ի ներկայացուցիչները պատերազմին հիմնականում երկու պատճառով են մասնակցել:

«Առաջինը, հաշվի առնելով Ադրբեջանի վճարած բավականին մեծ գումարները և երկրորդ, որ նրանց կազմակերպության կանոնադրությունը սահմանում է, որ իրենց գործունեությունն ուղղված է Ռուսաստանի ու նրա դաշնակիցների դեմ: Ընդ որում` նույն կանոնադրությունը սահմանում է, որ կազմակերպությանը կարող են անդամակցել այն քաղաքացիները, ովքեր որևէ թեժ կետում մասնակցել են ռազմական գործողությունների»,- ասաց ռազմական փորձագետը:

Իսկ թե ինչ ճակատագիր կունենա հնարավոր պատերազմի դեպքում Ադրբեջան վերադարձող վարձկանները, Հ. Պետրոսյանցը նշեց, որ ամենից լավ այդ մասին գիտեն հենց բանդերականները:

ԵԿՄ Լոռու մարզի ԵԿՄ խորհրդի նախագահ Կամո Հովհաննիսյանը Panorama.am-ի հետ զրույցում, մեկնաբանելով վերոնշյալ հայտարարությունն ասաց, որ պատերազմի տարիներին Ադրբեջանի կողմից պատերազմող ուկրաինական ջոկատների հետ առնչվել է:

«Ռազմաճակատի տարբեր հատվածներում հայկական կամավորականների դեմ տարբեր ազգությունների վարձկաններ են կռվել` արաբներ, չեչեներ, թուրքեր և իհարկե ուկրաինացիներ: Հետաքրքիր է, իսկ ինչի վրա են իրենց հույսները դրել, երբ խոսում են պատերազմի դեպքում ճակատ վերադառնալու մասին: Իրենք լավ գիտեն, թե ինչ կլինի իրենց հետ… կլինի այն, ինչ տեղի ունեցավ իրենց ընկերների, մնացած վարձկանների ու ադրբեջանցիների հետ»,- ասաց նա:

Կ. Հովհաննիսյանը կարծում է, որ այսօր այդ վարձկաններից շատերն իրենց գործունեությամբ մեծ ներդրում ունեն Ուկրաինայում տեղի ունեցող բռնությունների հարցում, որովհետև այն սպանությունները, բեսպրեդելը, որը Ուկրաինայում իրականացվում են որոշ ծայրահեղականների ջոկատների կողմից, դրանց հետևում ամենևին էլ հասարակ քաղաքացիներ չեն կանգնած:

«Այդ վարձակնները տարբեր երկրների կողմից օգտագործվել են, իսկ այսօր էլ օգտագործվում են իրենց իսկ երկրում անկայունության ու բռնության ալիք տարածելու գործում»,- հավելեց նա: