Ն.Փաշինյան. Այսպես են անում, որ քաղաքական գործիչ ասելիս ժողովուրդը հասկանում է «խաբեբա, շուլեր, մաշեննիկ»
«Առանցքային քաղաքական փոփոխությունը, որ առաջարկվում է «Ավտոմոբիլային տրանսպորտի մասին» օրենքում, նշանակում է, որ Երևանում հասարակական տրանսպորտի ուղեվարձի թանկացման որոշումը քաղաքապետից վերցվում և տրվում է Երևանի ավագանուն»,- ԱԺ-ում հարցի քննարկման ժամանակ հայտարարեց ՀԱԿ խմբակցության անդամ Նիկոլ Փաշինյանը` ներկայացնելով նաև իր մեկնաբանությունը, թե ինչի համար է արվում այդ փոփոխությունը:
«Սա ակնհայտորեն Երևանում տրանսպորտի փոփոխության երկրորդ փորձն իրականացնելու նախապատրաստությունն է: Առաջին փորձը տեղի ունեցավ անցած տարվա ամռանը, բայց ձախողվեց հանրային հուժկու պայքարի արդյունքում: Ըստ ամենայնի` կառավարությունը և Երևանի քաղաքապետարանը, որ արդեն հայտարարել էր, որ մեկ է մեկ տարի հետո պետք է տեղի ունենա ուղեվարձի փոփոխություն, հաշվարկել են, որ այդպիսի հզոր փոփոխությունները չափազանց շատ են Երևանի գիտությունների թեկնածու քաղաքապետ Տարոն Մարգարյանի փխրուն ուսերի համար և ահա որոշել են այդ պատասխանատվությունը ցրել ավագանու 65 անդամների միջև»,- հայտարարեց նա և հիշեցրեց, որ նախագծով ևս նախատեսված է ուղեվարձի վերանայման ինստիտուտ:
Ն.Փաշինյանին տրամաբանությունը հուշում է, որ երբ ասում են վերանայում, դա կարող է նշանակել, որ ուղեվարձը կարող է ինչպես բարձրանալ, այնպես էլ նվազել:
«Բայց արի ու տես, որ Հայաստանի կառավարությունը ուղեվարձի վերանայում ասելով նկատի ունի միայն ուղեվարձի բարձրացումը, որովհետև օրենքում գրվում է, որ ուղեվարձը կարող է վերանայվել օբյեկտիվ պատճառներով: Որո՞նք են այդ պատճառները` դրամի արժեզրկում, ավտոպահեստամասերի և վառելիքի գների աճ.... Մեր կառավարությունը, փաստորեն, արձանագրում է, որ միակ բանը, որ կարող է տեղի ունենալ դրամի հետ դա արժեզրկումն է` դրամը անկելու է, անկելու է, անկելու է...»,- իրոնիայով հայտարարեց ընդդիմադիր պատգամավորը:
Նույնը, ըստ նրա, կառավարության տրամաբանությամբ կարող է լինել նաև ավտոմասերի և վառելիքի հետ` միայն թանկացում, թեև հիշեցրեց, որ դեռ ամիսներ առաջ նույն կառավարությունը պնդում էր, որ Մաքսային միություն ենք մտել և թե նավթամթերքների ներկրման հատուկ պայմանների և ՄՄ շնորհիվ այդ ամենը էժանանալու է:
«Հիմա օրենքով արձանագրում են, որ չի կարա էժանանա, միայն կարող է թանկանալ»,- ժպիտով արձանագրեց նա:
Ըստ Փաշինյանի, հանրությունը կարիք ունի կայուն հասարակական տրանսպորտի, այնպես որ` հարկավոր է շարժվել օրենքով ամրագրված դրույթով` ուղեվարձը կարող է լինել մրցույթով նախատեսված ողջ ժամկետում անփոփոխ:
«Այսինքն` եթե մարդը 100 դրամով է շահել մրցույթը, ապա հինգ տարի դա պետք է լինի անփոփոխ: Եթե պարզվի, որ նա չի կարող այդ գնով սպասարկել, թող հրաժարվի սպասարկումից, հայտարարվի նոր մրցույթ և եթե պարզվի, որ եթե ուրիշ ոչ մի ընկերություն էլ չի կարող սպասարկել 100 դրամով, ապա ռիսկերը իր վրա պետք է վերցնի ՏԻ մարմինը, որովհետև հասարակական տրանսպորտը այնպիսի բան չի, որ երեք ամիսը մեկ բռնեն, սակագին փոխեն: Պետք է շատ հստակ, կայուն ուղեվարձ գործի և սա քննարկման ենթակա չի»,- շեշտեց նա:
Ավելին` Փաշինյանը հայտարարեց, որ քանի Երևանի քաղաքապետն է Տարոն Մարգարյանը, տրանսպորտի սակագինը չի կարող փոխվվել: Պարզաբանեց, թե ինչու է այդպես կարծում.«Որովհետև Երևանի գործող քաղաքապետ Տարոն Մարգարյանը, 2013թ-ի քաղաքապետի թեկնածու Տարոն Մարգարյանը 2013թ-ի մարտի 28-ին հայտարարել է, մեջբերում եմ` «Մենք պաշտոնապես հայտարարել ենք, որ մայրաքաղաքում հասարակական տրանսպորտի սակագնի փոփոխության հարց չի քննարկվել և առաջիկայում էլ նման բան չի նախատեսվում: Մեր համաքաղաքացիները կարող են անհոգ լինել` ուղեվարձը կմնա անփոփոխ»: Բայց հունիսին Տարոն Մարգարյանն ասաց, որ ուղեվարձը պետք է փոխվի... սա ուղղակի քաղաքական խայտառակություն է: Եվ այսպես են ասում, որ քաղաքական գործիչ ասելիս ժողովուրդը հասկանում է խաբեբա, շուլեր, մաշեննիկ, որովհետև ոնց կարելի է մի բան հայտարարել, գնալ այդ հայտարարության հիման վրա ընտրություններ անել ու պաշտոնը պահպանել ու անել լրիվ հակառակը»,- նշեց նա և ավելացրեց, որ եթե ասում են, թե տրանսպորտային խնդիրներ կան, ապա թող Տ.Մարգարյանն ու քաղաքական մեծամասնությունը հրաժարական տան, Երևանում տեղի ունենան արտահերթ ավագանու ընտրություններ ու քաղաքացիները քննարկեն այդ խնդիրները:
Ն.Փաշինյանը հայտարարեց նաև, որ տրանսպորտային խնդիրները առկա են ոչ միայն Երևանում, այլև մյուս քաղաքներում, քանի որ, ըստ պատգամավորի, իշխանությունն ամեն ինչ արել է, որ մարդիկ երկրից գնան ու դրա համար ուղևոր չկա, խնդիրներն էլ գալիս են դրանից:
Նախորդիվ`
Հիմա էլ հասարակական տրանսպորտն են մոնոպոլացնո՞ւմ. ԱԺ-ում շրջանառության մեջ է դրվել հերթական նախագիծը
Լրահոս
Տեսանյութեր
Ինչո՞ւ հանկարծ ՀՀ իշխանությունները որոշեցին խլել արցախցիների կենսաթոշակային խնայողությունները
