Ձեր վստահելի աղբյուրը

«Քեսաբի հայերը, ովքեր Թուրքիայի կողմից զինված ծայրահեղականների հարձակման պատճառով տեղահանվել են և այս պահին ապրում են Լաթաքիայում, կոչով դիմել են աշխարհի ողջ հայությանը»,- գրել է «Ասպարեզ»-ն ու տեղադրել կոչը:

«2014 թվականի մարտի 21-ին` Մայրերի օրը (Սիրիայում մայրերի օրը նշում են մարտի 21-ին, խմբ.) մեր գեղեցիկ գյուղը գազանաբար հարձակման ենթարկվեց «Ալ-Կաիդայի» հետ առնչություն ունեցող ծայրահեղականների կողմից` Թուրքիայի կառավարության օրհնությամբ և ռազմական ու նյութատեխնիկական աջակցությամբ:

Արևը դեռ չէր ծագել, երբ մենք արթնացանք հրթիռների ու ռումբերի տեղատարափ սարսափից, որոնք ընկնում էին մեր գյուղի վրա: Հազարավոր ծայրահեղականներ սահմանը հատել են` ուղղվելով դեպի մեր գյուղ: Հրթիռներն արձակվել են Թուրքիայից, որպեսզի ոչնչացնեն գեղեցիկ Քեսաբը և տոնեն Հայոց ցեղասպանության 100-ամյակի մոտենալը: Քեսաբցի հերոսները պաշտպանեցին գյուղը սովորական որսորդական զենքերով` մինչև Սիրիայի կառավարական ուժերը ժամանեցին մեր գյուղի վրա սարսափելի հարձակումը հետ մղելու համար: Եթե այդ հերոսները քեսաբցիներին տեղեկացրած չլինեին, աշխարհը լուռ ականատես կլիներ ևս մեկ ցեղասպանության և մի կողմ կանգնած կմնար, իսկ մամուլը նրանց ստի ևս մեկ տարբերակ կհրամցներ:

Քեսաբը դարերի ընթացքում միշտ հայրենիք է եղել հազարավոր հայերի համար: Քեսաբում առաջին տառապալից ողբերգությունը տեղի է ունեցել 1909 թվականի ապրիլին, երբ հազարավոր թուրք տղամարդկանցից բաղկացած ամբոխը հարձակվեց Քեսաբի վրա` կողոպտելով և այրելով տները: 161 հայ էր սպանվել այս դաժան հարձակման ժամանակ: 1915 թվականի` Հայոց ցեղասպանության ժամանակ, թուրքական զորքերը եկան Քեսաբ, արտաքսեցին հայերին և սպանեցին մոտ 5000 հայի: 1915 թվականին թուրքերի ձեռքով իրականացրած Հայոց ցեղասպանությունը խլեց 1.5 մլն հայի կյանք: Բազմաթիվ հայեր սպանվում են Սիրիայում և կսպանվեն, եթե ոչինչ չարվի: Սիրիայի արաբները ապաստան տրամադրեցին մեզ, հոգ տարան մեր մասին, օգնեցին ոտքի կանգնել և գոյատևել մահվան սարսափելի հիշողության ու ավերածությունների միջև: Մենք հավերժ երախտապարտ ենք նրանց: Այդ ժամանակից ի վեր մենք այլ փոքրամասնությունների հետ ապրել են խաղաղ և ներդաշնակ, մեծ ընտանիքի պես, մեկ տան մեջ, որը կոչվում է Սիրիա:

Այսօր, մենք կրկին օգնության կարիք ունենք, քանի որ Թուրքիայի կառավարությունը համարձակվել է կրկին հարձակվել հայերի վրա` անտեսելով հայկական հարցը: Այս գործողությամբ Թուրքիան կրկին մերժել է ճանաչել իր ձեռքով իրականացրած Հայոց ցեղասպանությունը և աջակցում է Սիրիայում հայերի սպանությունը: Մենք թուրք ժողովրդի դեմ ոչինչ չունենք: Մենք կող կողքի ապրել ենք նրանց հետ և ցանկանում ենք շարունակել որպես հարևան ապրել նրանց հետ: Դա Թուրքիայի կառավարությունն է, որ աջակցում և դյուրացնում է ահաբեկիչների կողմից քեսաբցիների սպանությունը, որը դեմ մենք բողոքում ենք: Մենք պարզապես ուզում ենք, որ մեր գյուղը հետ տան, կամ այն, ինչ կմնա նրանից: Մեր սիրտը կտոր-կտոր է լինում բազմաթիվ տեսանյութերից և նկարներից, որոնք ցույց են տալիս, թե ինչպես են ծայրահեղականները ավերում և վառում մեր գեղեցիկ գյուղը: Բոլոր սիրիացիները գիտեն` որտեղ հայտնվեն այդ ծայրահեղականները, իրենց հետևից թողնելու են մահ և ավերվածություններ:

Մեր տները վերցրել են մեր ձեռքերից, մեր հարյուրամյակների ժառանգությունը ավերվել է:

Սա կոչ է բոլոր հայերին: Սա կոչ է ողջ մարդկությանը: Աշխարհը պետք է լսի ճշմարտությունը: Էրդողանը և իր կառավարությունը ռազմական հանցագործներ են: Մենք օգնության կարիք ունենք: Մենք ձեր գործողությունների կարիքն ունենք: Մեզ բռնի քշել են մեր տներից, և մեր գյուղում ոչինչ չի մնացել է, բացի մեր հագուստներից: Եթե մնայինք և հավաքեինք նույնիսկ ամենաանհրաժեշտ իրերը, մենք միանշանակ կմահանայինք: Մեզնից շատերը չէին կարող նույնիսկ փախչել, քանի որ մեզ հետ չունեինք անձնագրեր կամ նույնականացման փաստաթղթեր: Խնդրում ենք, միջնորդեք ձեր կառավարություններին, ՄԱԿ-ին, և այլ լիազոր մարմիններին, որոնք, դուք հավատում եք` կօգնեն մեզ: Այն, ինչ մենք ուզում ենք, ապրելն է: Եթե դուք անտեսեք սա, մենք բոլորս սարսափելի մահով կմահանանք այս ահաբեկիչների ձեռքերում` սառնարյուն մորթվելով, ինչպես շատ այլ հայեր սպանվեցին Հալեպում, Յակուբիյայում, Գենեմիյայում և Սիրիայի այլ բնակավայրերում:

Նրանք, ում դուք անվանում եք ապստամբներ, ծայրահեղականներ են, ովքեր Սիրիա են եկել ջիհադի համար: Նրանց թվում կան աֆղաններ, չեչեններ և սաուդցիներ: Քեսաբցիները և բոլոր սիրիացիները տեսել են դրանց, ենթարկվել դրանց հարձակմանը և սպանվել: Մամուլը չի կարող հավերժ թաքցնել ճշմարտությունը: Նրանք, ում դուք անվանում եք ապստամբներ, թիրախավորում և հարձակվում են քաղաքացիների վրա:

Չե՞ք կարծում, որ բավարար անմեղ արյուն է թափվել: Չե՞ք կարծում, որ բավարար ավերվածություններ են եղել: Մենք բոլորս երեք տարի առաջ խաղաղ և երջանիկ ապրում էինք: Սա հեղափոխություն չէ, սա պատերազմ է: Սիրիայի բանակն այժմ կռվում է Քեսաբում ` վստահեցնելով հայերին, որ վերադառնալու են իրենց տներ»,-գրված է քեսաբահայերի նամակ-կոչում: