Ձեր վստահելի աղբյուրը

Հասկանալի էր, որ այն, ինչ տեղի ունեցավ հոկտեմբերի 10-ին Մինսկում կայանալու էր, այդ իմաստով անակնկալ չկար, խնդիրը միայն ժամկետն էր, թե երբ կստորագրվի համաձայնագիրը: Եվ սա ոչ թե վերջն է, այլ սկիզբն է մի իրավիճակի, որի զարգացումը բացառապես կախված է Եվրասիական տնտեսական միության զարգացման ուղուց: Այս մասին լրագրողների հետ հանդիպմանը հայտարարեց քաղաքագետ Ալեքսանդր Իսկանդարյանը:

«Զարգացման սցենարները շատ-շատ են, դրանք կախված են տարբեր գործոններից` և ՌԴ հարաբերություններից Արևմուտքի հետ, և Ղրղզստանի միավորման շուրջ զարգացումներից, ուկրաինական իրավիճակից և այլն»,- թվարկեց նա` նշելով, որ այս ամենը ուղղակիորեն ազդելու է ԵՏՄ-ի զարգացման վրա:

Անդրադառնալով ԼՂՀ վարչապետի հայտարարությանը, թե Հայաստանի անդամակցումը ԵՏՄ-ին միանշանակ չի ընդունվել նաև արցախցիների կողմից և ինչ զարգացումներ կարելի է սպասել այս իմաստով, քաղաքագետը նշեց, որ ՀՀ և ԼՂՀ սահմանին մաքսակետի տեղադրման մասին որևէ տեղ, բացի մամուլից, գրված չի եղել և դա ավելի շատ ներքաղաքական բանավեճի թեմա է եղել, որը հասկանալիորեն լքել է Հայաստանի սահմանները:

«Իրականում մաքսակետ այսօր էլ գոյություն ունի Հայաստանի և Արցախի միջև, պարզապես շատ անգամ մենք դրա կողքով անցնում ենք առանց ուշադրություն դարձնելու, բայց այն գոյություն ունի: Իսկ այնպիսի մաքսային կետ, որտեղ մաքսայինի հայ աշխատակիցը թույլ չի տա անցկացնել Ղարաբաղ ինչ-որ ապրանք և մաքսայինի ղարաբաղցի աշխատակիցը թույլ չի տա ձու կամ այլ գյուղմթերք տեղափոխել Հայաստան` անլուրջ է»,- ընդգծեց նա:

Ա. Իսկանդարյանի համոզմամբ` Հայաստանը շարունակելու է իր հարաբերությունները ԵՄ հետ: