Ձեր վստահելի աղբյուրը

«Այս հանրահավաքի հիմնական ելույթի պատիվը վերապահված լինելով Գագիկ Ծառուկյանին ես կբավարարվեմ ընդամենը մի քանի դիտարկումներով…. Դե լավ ծափ տվեք»,- հանրահավաքի իր ելույթի մեկնարկին խոսքն ընդհատելով` ասաց ՀԱԿ առաջնորդ Լևոն Տեր-Պետրոսյանը` սպասելով ծափերը դադարեն:

Մինչ այդ նա նկատողություն արեց նաև հարթակին մոտ կանգնածներին.«Էս կոնգրեսականները ամենաչարն են»:

Հետո միայն սկսելով բուն ելույթը, Լ.Տեր-Պետրոսյանն ասաց, որ համաժողովրդական նոր շարժման առաջին երկու հանրահավաքների բազմամարդությունը ցույց է տալիս, որ ՀՀ-ում մեկնարկել է իշխանափոխության մի հուժկու գործընթաց, որը հաջողությամբ պսակվելու լուրջ հեռանկար ունի: Ուստի հորդորեց իրենց ընդդիմադիր համարող որոշ մարգինալ ուժերի կողմից հիստերիկ արձագանքին լուրջ չվերաբերել.

«Նման հակազդեցությունը բնական է, նրանք սարսափած են շարժման հզոր ալիքից ու հաղթանակի հասնելու հեռանկարից և կատաղի պայքար են սանձազերծել մեր դեմ` նախընտրելով, որ Սարգսյանական ավազակախումբը հարյուր տարի էլ իշխի Հայաստանում, միայն թե իշխանափոխություն չկատարվի երկրում: Ջհանդամը, թե արանքում երկրից բան չի մնա: Լուսանցքային ուժերի պարագայում առկա է նաև հուսախաբության մեջ ընկնելու մեկ այլ ծանրակշիռ պատճառ. երեք տարի պնդելով, համոզելով, թե Ծառուկյանը խաղ է խաղում, իրենք այսօր հայտնվել են խայտառակ վիճակում իրենց կանխատեսման պատճառով: Ես չգիտեմ` նման խայտառակվելուց հետո նրանք այսուհետ ո՞նց են զբաղվելու քաղաքականությամբ»,- հայտարարեց նա` շեշտելով, որ մարգինալների թեման փակում է, ու երբեք այլևս նրանց չի անդրադառնալու, քանի որ դրանք մանրուքներ են, իսկ իրենց գործը չի կարող դրանց պատճառով շեղվել:

Լ.Տեր-Պետրոսյանի երկրորդ դիտարկումը վերաբերում էր նախորդ հանրահավաքում ԵՏՄ-ին միանալու մասին չխոսալուն: Նա բացատրեց, որ քանի որ դա տեղի էր ունեցել հանրահավաքից մի քանի ժամ առաջ և ինքը սովորություն չունի հապշտապ հայտարարություններ անել, ապա և չխոսեց այդ մասին: Բայց այսօր պատրաստ է:

«ԵՏՄ-ին ՀՀ անդամագրման մասին ես ամիսներ առաջ ասել էի, որ դա անշրջելի է, ինչը նշանակում է, որ տեսանելի ապագայում մեր երկիրը ապրելու և կենսագործելու է այդ համակարգի շրջանակներում: Հետևաբար տվյալ իրողության հետ կապված ցանկացած ջղաձգում այլևս ուշացած, անիմաստ ու վնասակար է»,- նշեց նա:

Շարունակելով` օրինակ բերեց մեծ ու հզոր Ուկրաինան, որն այսօր նման անմխիթար վիճակում է հայտնվել: Ըստ ՀԱԿ առաջնորդի` Հայաստանը ԵՏՄ-ին միանալով հավակնում է մի օր հայտնվել բարգավաճ ու հզոր պետությունների կողքին:

«Մի՞թե ոմանց համար դժվար է հասկանալ, որ Ուկրաինային բաժին հասած կորուստների թեկուզ 10 տոկոսի դեպքում Հայաստանը կվերանար աշխարհի քարտեզից: Տարօրինակն այն է, որ նույնիսկ Արևմուտքը սա նորմալ ընկալեց, մինչդեռ որոշ մարդիկ շարունակում են դեմ արտահայտվել ԵՏՄ-ին: Մի բուռ մարդիկ ոչ մի կերպ չեն ուզում հաշվի նստել իրականության հետ ու փորձում են ՀՀ-ում արհեստական հակառուսական տրամադրություններ հրահրել, առանց հասկանալու, որ նման հող անգամ չկա: Եթե լիներ, թող սեպտեմբերի 3-ից հետո անեին, 13 ամիս է անցել… Ասացի այդ մասին էն ժամանակ` ինձանից նեղացել են: Բայց իսկապես` երեք տասնյակից ավելի մարդ փողոց հանել չկարողացան, ժուռնալիստներն էլ հետը: Հիմա ի՞նչ, որ ՀՀ-ն հայտնվել է ԵՏՄ-ում, ազգովի սուգ հայտարարե՞նք, վերջնականապես վհատեցնե՞նք մեր ժողովրդին, թե հակառակը` թևներս քշտենք ու փորձենք շենացնել մեր երկիրը: Մեկ բան է ակնհայտ, որ Սերժ Սարգսյանի ռեժիմը չի կարող դա անել և սա էլ մի պատճառ է այդ ռեժիմից շուտափույթ ազատվելու համար»,- շեշտեց նա:

Նա համոզմունք հայտնեց, որ անգամ ԵՏՄ-ում կարելի է Հայաստանը դարձնել արևմտյան կամ համամարդկային արժեքներին համապատասխան իրավական պետություն: Իսկ քննադատություններին էլ հակադարձեց, թե ցանկացած միջազգային միության անդամագրվելով պետությունները այսպես թե այնպես մասնակիորեն կորցնում են իրենց ինքնիշխանությունը, այնպես որ ինչպիսի միջազգային կառույց էլ մտնես ` կորցնելու ես ինքնիշխանության մի մասը:

«Կա կանոնադրություն, որին ենթարկվում են բոլոր այդ պետությունները` ԱՄՆ-ն էլ, Ֆրանսիան էլ, մյուսներն էլ: Իսկ դա նշանակում է, որ եթե անգամ ԵՏՄ-ի փոխարեն ՀՀ-ն ստորագրեր եվրոասոցացման պայմանագիրը, կամ նույնիսկ անդամակցեր ԵՄ-ին, միևնույն է զրկվելու էր դրա որոշ մասից` գուցե ավելի, քան ԵՏՄ-ի պարագայում: Եվ Հայաստանը նույնքան ինքնիշխան է լինելու ԵՏՄ-ում, որքան ՌԴ-ն, Բելառուսը, Ղազախստանը»,- հավելեց նա:

Երրորդ դիտարկումը վերաբերում էր եռյակի ճանապարհային քարտեզին.«Որևէ մեկին վիրավորելու մտադրություն չունենալով` հարկ եմ համարում նշել, որ սա անհիմն և քաղաքական առումով վտանգավոր պահանջ է` հրապարակել ճանապարհային քարտեզն ու գործողությունների պլանը, քանի որ բռնապետության պայմաններում շարժումը չի կարող և իրավունք էլ չունի իր բոլոր քարտերը բացել: Պետք է հստակ տարբերություն դնել ստրատեգիայի և մարտավարական քայլերի միջև: Մենք հայտարարել և հայտարարում ենք, որ ծրագրել ենք համաժողովրդական ճնշման տակ իշխանություններին հրաժարական պարտադրել, որից հետո անցկացնելու ենք արտահերթ խորհրդարանական և նախագահական ընտրություններ` նախապես հիմնովին վերափոխելով Ընտրական օրենսգիրքը, որն այսուհետ կբացառի կեղծիքներ նախատեսող մեխանիզմներ: Ստրատեգիայի հարցում մենք միակամ ու վճռական ենք և գնալու ենք մինչև վերջ, այսինքն` Սարգսյանական ռեժիմից լիակատար ազատագրումը: Մինչև վերջնական հաղթանակ»:

Ինչ վերաբերում է հետագա քայլերին, ապա դա, ըստ Լ.Տեր-Պետրոսյանի, հանրային քննարկման առարկա չի կարող դառնալ, քանի որ երբ տակտիկան բացահայտվում է` այդ պահից նա դադարում է տակտիկա լինել:

«Այս հրապարակում հավաքված ժողովուրդը,-ասաց նա,- հիմնականում իրենց ուժերի համակիրներն են, որոնք լիովին վստահում են իրենց կազմակերպությանը: Եվ ապացուցելու համար դա նա քվեարկության դրեց հետևյալ հարցը` վստահո՞ւմ են արդյոք ու լիակատար առաջնորդների որոշմանը թողնում են հավաքվածները հետագա անելիքների մասով որոշում կայացնելը»:

Ազատության հրապարակը միահամուռ «կողմ» քվեարկեց: