Ադրբեջանի ռազմական փորձագետները մերկացրել են «հարձակվող ուղղաթիռի» մասին երկրի պաշտպանության նախարարության կեղծիքը
Ադրբեջանական ԱՊԱ լրատվական գործակալության ռազմական տեսաբան Ռաշադ Սուլեյմանովն իր ֆեյսբուքյան էջում գրառում է հրապարակել, որտեղ անհանգստություն է հայտնել այն տեսագրության տարածման առնչությամբ, որն ապացուցում է՝ ԼՂՀ ՌՕՈւ ուղղաթիռը խոցվել է հայկական կողմում և չի փորձել հարձակվել ադրբեջանական դիրքերի վրա, իսկ դա հակասում է Ադրբեջանի ՊՆ-ի՝ միջադեպի մասին հնչեցրած տարբերակին:
«Եթե վաղը պատերազմ սկսվի, անհրաժեշտություն չկա առաջնագիծ ուղարկել լրագրողների: Այնտեղ են Ipad-ներով ու հեռախոսներով զինված մեր զինծառայողները»,- տարակուսում է ռազմական տեսաբանը՝ նշելով, թե լրագրողների աշխատանքը նաև կկատարեն «Այֆոններով ճանապարհին նստող տատիկներն ու պապիկները»:
Իր մեկ այլ գրառման մեջ Սուլեյմանովը վրդովվում է Ադրբեջանի պատկան մարմինների անգործությամբ տվյալ տեսագրության տարածման հարցում:
«Տեղեկացնեմ Ալաֆթունին [Ամաշև], որ մեր ԶԼՄ-ների կողմից հրապարակված տեսագրությունը հակասում է պաշտպանության նախարարության պաշտոնական տեղեկությանը: Դա ասում եմ ես՝ որպես մի մարդ, ով ծանոթ է ռազմական գործին ու շփման գծին»,- գրում է Սուլեյմանովը:
Նա նաև նշում է, որ Ադրբեջանը չի կարող պատերազմ վարել մամուլի հետ, որտեղ աշխատում են «բանակից գլուխները փախցրած ու ռազմական գործից ոչինչ չհասկացող դասալիքները»:
Հատկանշական է, որ քննարկման մասնակիցներից մեկը՝ Ռուսլան Ռահիմով անունով օգտատերը, ուշադրություն է հրավիրում այն փաստին, որ հենց նույն Ադրբեջանի պաշտպանության նախարարությունն է տարածում տվյալ տեսագրության սքրինշոթերը: Քննարկման մեկ այլ մասնակից՝ ռազմական փորձագետ Ուզեիր Ջաֆարովը, խոստովանում է, որ ինքն է այդ տեսագրության հեղինակը՝ նշելով, թե ՊՆ-ն կտարածեր որակյալ տեսագրություն, եթե այն առկա լիներ:
«Ռաշադ, ես հասկանում եմ քո անհանգստությունը, բայց պետք չէ վրդովվել: Հավանաբար, քեզ անհանգստացնում է այն, որ զինծառայողները հրամանատարին ասում են՝ խփիր, և այն, որ երկրորդ ուղղաթիռը հեռանում է: Պաշտոնապես ԹՈւՅԼՏՎՈւԹՅՈւՆ է ստացվել: Զինվորները պարզապես մի փոքր շտապել են: Իլքինը ժամանակին է «կոճակը» սեղմել»,- պատմում է Ջաֆարովը:
Քննարկման մասնակիցներից մեկը՝ Խագանի Սաֆարօղլու անունով օգտատերը, նկատում է, որ Ադրբեջանի ՊՆ պաշտոնական հայտարարությունը խոցված ուղղաթիռի մասին և ադրբեջանական ԶԼՄ-ներում հրապարակված տեսագրությունն ակնհայտորեն հակասում են միմյանց:
«Սա ի՞նչ ինքնագործունեություն է: Պաշտպանության նախարարությունը պարտավոր է բացատրություններ տալ»,- գրում է նա:
Նշենք, որ այս քննարկումից հետո Ադրբեջանի Մամուլի խորհրդի ղեկավար Աֆլաթուն Ամաշևը հանդես է եկել հայտարարությամբ, որտեղ քննադատել է տվյալ տեսագրությունը տարածող ԶԼՄ-ներին:
«Այն պահը, երբ ուղղաթիռը խոցվել էր, չէր կարող տեսագրել ոչ մի լրագրող: Այդ դեպքում հարց է ծագում՝ ինչպես է այդ տեսագրությունը հայտնվել մամուլի ձեռքում: Կարծում եմ, որ դա պետք է լրջորեն հետաքննվի»,- հայտարարել է Ամաշևը:
Հիշեցնենք, որ Արցախի Պաշտպանության բանակի մամուլի ծառայության փոխանցմամբ` նոյեմբերի 12-ին` տեղական ժամանակով ժամը 13:45-ի սահմաններում, շփման գծի արևելյան հատվածի օդային տարածքում Ադրբեջանի ԶՈւ-ի կողմից հրադադարի ռեժիմի խախտման պատճառով խոցվել է Արցախի ՌՕՈւ Մի-24 ուղղաթիռ, որն ուսումնավարժական թռիչք էր կատարում: Այն տարածքը, որտեղ արձանագրվել է միջադեպը, շփման գծին բավականին մոտ է: Հակառակորդը միջադեպից հետո շարունակել է տարբեր տրամաչափերի զենքերից ինտենսիվ կերպով կրակ բացել միջադեպի վայրի ուղղությամբ:
Միևնույն ժամանակ, ՀՀ ՊՆ մամուլի քարտուղար Արծրուն Հովհաննիսյանն իր ֆեյսբուքյան էջում գրել է, որ Արցախի հետ սահմանային հատվածում Ադրբեջանի ԶՈւ-ն աննախադեպ սադրանք իրականացրեց, որը հանգեցրել է նաև իրավիճակի սրմանը, իսկ ադրբեջանական կողմի հնարանքները, թե իբր հայկական ուղղաթիռներն իրենց դիրքերի ուղղությամբ հարձակման փորձեր են արել, ու իբրև թե իրենք էլ միայն պատասխանել են այս քայլին, անհեթեթ են:
«Ուղղաթիռի բեկորների ուսունասիրությունը թույլ կտա հաստատել, որ ուղղաթիռը զինված չի եղել: Իրավիճակի այս լարումը ադրբեջանական կողմից շարունակվում էր, երբ ուղղաթիռը արդեն ընկած էր: Ավելին, ադրբեջանական կողմի կրակահերթը նաև թույլ չէր տալիս, որ անգամ օդաչուներին մոտենան: Այս աննախադեպ լարման հետևանքներն ադրբեջանական կողմի համար շատ ցավոտ կլինեն և կմնան Ադրբեջանի ռազմաքաղաքական ղեկավարության խղճին: Ուղղաթիռի հրամանատարն էր մայոր Սերգեյ Սահակյանը: Անձնակազմի հետագա ճակատագրի մասին տեղեկություններ կհայտնենք»,- նշել է Արծրուն Հովհաննիսյանը:
Թեմային առնչվող`
ՄԱԿ գլխավոր քարտուղարն անհանգստություն է հայտնել Արցախում խոցված ռազմական ուղղաթիռի առնչությամբ
Լրահոս
Տեսանյութեր
Քեզ ըտենց Դո՞գն է ասել. Լարված վիճակ Երևանի ավագանիում
