Ձեր վստահելի աղբյուրը

«Իրանը Լեռնային Ղարաբաղի հակամարտության հարցում սկզբունքային դիրքորոշում ունի»,-այդ մասին իրանական «ԱՐԱՆ» լրատվական գործակալության հաղորդմամբ՝ հայտարարել է Ադրբեջանում Իրանի դեսպան Մոհսեն Փաքայինը:

Իրանի դեսպանը ադրբեջանական «Մոդերն.ազ» կայքին տված հարցազրույցում, անդրադառնալով արցախյան հիմնախդրի հարցում Իրանի ունեցած դիրքորոշմանը, մասնավորապես նշել է. «Մենք գիտենք, որ հնարավոր չէր ԼՂ համամարտությունը ռազմական ճանապարհով լուծել և հիմնախնդիրը ռազմական ճանապարհով լուծելու հանգամանքը տարածաշրջանում լարվածության մեծացման առիթ կհանդիսանա: Մենք ցանկանում ենք, որպեսզի հակամարտությունը լուծվի խաղաղ ճանապարհով՝ բանակցությունների միջոցով: Իրանը ոչ մի ջանք չի խնայի, որպեսզի այդ հարցում իր օգնությունը ցուցաբերի»:

Ադրբեջանում Իրանի դեսպանը, անդրադառնալով ԵԱՀԿ Մինսկի խմբի գործունեությանը, նշել է. «Հայաստանն ու Ադրբեջանը՝ որպես հակամարտության կարգավորման մեխանիզմ ընտրել են Մինսկի խումբը, սակայն միևնույն ժամանակ երկու կողմն էլ դժգոհ են Մինսկի խմբի գործունեությունից. Իրանը շատ լավ ընկալում է այդ հանգամանքը և գիտի, որ Մինսկի խումբը հակամարտության լուծման հարցում շատ բան չի կարող անել, քանի որ ՄԱԿ-ի ԱԽ 5 մշտական անդամներից երեքը ներգրավված են այդ խմբում: Եթե ինչ-որ պահի կողմերը ցանկանան, որպեսզի Իրանը հանդես գա միջնորդական առաքելությամբ, ապա այդ ժամանակ մենք կներկայացնենք մեր նախագիծն ու հակամարտության լուծման եղանակները»:

Հիշեցնենք, որ օրերս Երևանում էր գտնվում Իրանի ԱԳ նախարար Մոհամմադ Ջավադ Զարիֆը: Իրանագետ Ա. Իսրայելյանը Panorama.am-ի հետ զրույցում, անդրադառնալով արցախյան հակամարտության հարցում՝ Իրանի ունեցած դիրքորոշմանը, նշել էր, որ արտգործնախարար Զարիֆի՝ Երևանում արած հայտարարությունը վկայում է, որ Իրանը դեմ է ԼՂ հակամարտությանը կրոնական երանգավորում տալու Բաքվի փորձերին:

Փորձագետը, անդրադառնալով Ադրբեջանի կողմից հայ-ադրբեջանական սահմանում լարվածության առաջացմանը, նշել էր. «Իրանի արտգործնախարարը հստակ հայտարարեց, որ Թեհրանը ցանկանում է տեսնել խաղաղ, անվտանգ և կայուն տարածաշրջան: Իրանի թե՛ նախկին, թե՛ ներկա իշխանությունները ԼՂ հակամարտության հարցում բարեբախտաբար վարել և վարում են հավասարակշռված քաղաքականություն. Իհարկե Իրանը վերջին տարիներին չի էլ թաքցնում, որ ցանկանում է ստանձնել միջնորդական առաքելություն, հավանաբար Թեհրանի այդ նկրտումները կապված են Արցախի հարցում Թուրքիայի ցուցաբերած ակտիվության հետ»: