Ձեր վստահելի աղբյուրը

ՄԱԿ-ի Կանանց նկատմամբ խտրականության վերացման կոմիտեում քննարկվել է Կանանց նկատմամբ խտրականության բոլոր ձևերի վերացման մասին Կոնվենցիայի իրականացմանն ուղղված միջոցառումների վերաբերյալ Ադրբեջանի հինգերորդ պարբերական զեկույցը: Քննարկումը ներկայացված է ՄԱԿ-ի Ժնևի գրասենյակի կայքում:

Ադրբեջանի զեկույցը ներկայացրել է Ընտանեկան, կանանց և երեխաների խնդիրներով զբաղվող Ադրբեջանի պետական հանձնաժողովի նախագահ Հիջրան Հուսեյնովան: Քննարկման ընթացքում մասնակիցներն անհանգստություն են հայտնել Ադրբեջանում այդ թվում կանանց իրավունքների հարցերով զբաղվող ՀԿ-ների գործունեությունը սահմանափակող նոր օրենսդրության վերաբերյալ:

Շեշտվել է նաև այն փաստը, որ հատկապես գենդերային հավասարությունը խթանող օրենքները մնում են թղթի վրա: Չնայած ֆինանսական և մարդկային ռեսուրսների առկայությանը՝ Ադրբեջանում չկա կանանց հավասարության հարցերով զբաղվող Ազգային հանրամատչելի ծրագիր: Կանանց և տղամարդկանց միջև ավանդական հարաբերություններում դժվար է ինչ-որ բան փոխել, ինչն էլ հանգեցնում է կանանց նկատմամբ բռնությանը և խտրականությանը:

Փորձագետներից մեկն ուշադրություն է հրավիրել նրան, որ չնայած Կոմիտեի 2009-ի առաջարկություններին` զեկույցում ոչինչ չի ասվում մարմնավաճառության խնդրի մասին: Մարմնավաճառությամբ զբաղվող կանայք սովորաբար աղքատ են լինում և հաճախ թմրանյութերից կախվածություն են ունենում: Ադրբեջանի պատվիրակության ղեկավարը նշել է, որ Ադրբեջանում մարմնավաճառությունը ցավագին, իրական, բայց «թաքնված» խնդիր է:

Քննարկումների ընթացքում բարձրացվել է նաև Ադրբեջանում տարածված, վաղ հասակում ամուսնությունների խնդիրը, որի պատճառով աղջիկները լքում են դպրոցը, հատկապես 9-11-րդ դասարանների աշակերտուհիները: Փորձագետներից մեկը նշել է, որ չնայած Քրեական օրենսգրքի փոփոխությանը` հայտնի են դարձել նաև 12-13 տարեկան աղջիկների ամուսնության դեպքեր, ինչին Ադրբեջանի կառավարությունը պատասխանել է, թե պետությունը տեղյակ չէ այդ տարիքի երեխաների ամուսնության դեպքերի մասին: Փորձագետները նկատել են, որ չգրանցված ամուսնությունները, որոնք հաճախ կրոնական ամուսնություններ են՝ քյաբին, շարունակում են լուրջ խնդիր համարվել, ինչն էլ հատկատապես ծանր է անդրադառնում նման ամուսնությունների արդյունքում ծնված երեխաների վրա. նրանց համարում են «ապօրինի ծնված» և չեն գրանցում: «Հավանաբար, պետք է ավելի խիստ պատժամիջոցներ կիրառվեն»,- մեկնաբանում է փորձագետը:

Ինչ վերաբերում է հղիության ընդհատմանը, նշվել է, որ Ադրբեջանը Կենտրոնական Ասիայում հղիության ընդհատման հարցում ունի ամենաբարձր ցուցանիշներից մեկը: Ադրբեջանի ներկայացուցիչը մատնանշել է, որ 2012 թվականին արձանագրվել է հղիության ընդհատման 200 000 դեպք: Փորձագետներից մեկը շեշտել է, որ չնայած զեկույցում նշված մանկական մահացությունների թվի անկմանը` ՄԱԿ-ի գործակալության և Ադրբեջանի Պետհանձնաժողովի տվյալների միջև հայտնաբերվել են անհամապատասխանություններ:

Քննարկման ընթացքում բարձրացվել է նաև աշխատանքի բնագավառում գենդերային խտրականության տարածվածության հարցը: Կանանց ճնշող մեծամասնությունը կատարում է ցածր վարձատրվող և պաշտոնապես չարձանագրված աշխատանք: «Ընդհանուր առմամբ, սեռերի միջև աշխատավարձի տարբերությունը կազմում է 57%: Առողջապահության բնագավառում կանայք մեծամասնություն են կազմում, սակայն նրանց ամսական միջին աշխատավարձը կազմում է տղամարդկանց աշխատավարձի 37%-ը: Մտահոգիչ է այն փաստը, որ նավթագազային արդյունաբերության բնագավառում աշխատող կանանց միջին աշխատավարձը 38 տոկոսով քիչ է տղամարդկանց աշխատավարձից, իսկ քիմիական արդյունաբերությունում աշխատող կանանց վճարում են 31 տոկոս քիչ, քան տղամարդկանց»,- նկատել է ներկա փորձագետներից մեկը: