Ձեր վստահելի աղբյուրը

ԱԺ պատգամավոր, պետական-իրավական հարցերով մշտական հանձնաժողովի անդամ Զարուհի Փոստանջյանը նախօրեին Հայաստանի կառավարությանը և վարչապետ Տիգրան Սարգսյանին գրավոր հարցում է հղել Թեղուտի հանքավայրի շահագործման վերաբերյալ: Այդ մասին այսօրվա ասուլիսում ասաց Զ. Փոստանջյանը, ով մայիսի 9-11-ը մասնակցել էր Թեղուտի պաշտպանության խմբի կողմից իրականացվող «SOS Թեղուտ» հեծանվային արշավին:

«Այնտեղ մենք ներկայացրել ենք Թեղուտի հանքավայրի շահագործման դեպքում բնական արժեքավոր ռեսուրսների աննպատակ սպառման, բնական համակարգերի ավերման և աղտոտման, հողերի բերրիության անկման և այլ խնդիրներ»,-ասաց ԱԺ պատգամավորը: Նրա խոսքով, ելնելով այդ խնդիրներից` նրանք կառավարությանը հղել են 10 հարց` ի՞նչ քայլեր է ձեռնարկում Հայաստանի կառավարությունը մեր երկրի ընդերքում մոլիբդենի և այլ հազվագյուտ մետաղների հանքավայրերի մանրակրկիտ հետազոտման ուղղությամբ, որքա՞ն է կազմելու Թեղուտի պղնձամոլիբդենային հանքավայրի շահագործումից սպասվող բոլոր հնարավոր մուտքերը Հայաստանի պետական բյուջե, ու՞մ է պատկանում Թեղուտի հանքավայրի բաժնետոմսերի 81 տոկոսը, այն դեպքում, երբ բաժնետոմսերի միայն 19 տոկոսն է տնօրինում Ռուսաստանի քաղաքացի Վալերի Մեջլումյանը և այլն: Զ. Փոստանջյանը չի բացառում նաև այն հնարավորությունը, որ այդ 81 տոկոսը  պատկանում է հայ պաշտոնյաներից որևէ մեկին:

Զարուհի Փոստանջյանը հայտարարեց, որ այդ գործարքից բյուջեն մեծ շահույթ չի ունենալու, այլ օգտնվելու են օտարերկրյա ընկերությունները: «Եթե Թեղուտի շահագործումը չկանգնեցնենք, ապագայում Հայաստանում չենք կարող ապրել»,-ասաց Զ. Փոստանջյանը` ավելացնելով, որ շահագործման դեպքում մենք նույնպես կդասվենք ամենահետամնաց երկրների թվին, երբ բանվորը հանքավայրում աշխատելու դիմաց ստանալու է 40.000 դրամ: Այդ մասին բանախոսին ժամանակին դասախոսություն է կարդացել նաև վարչապետ Տ. Սարգսյանը: «Մենք պետք է նաև իրավական ճանապարհով ակտիվ պայքարենք այդ նախագծի իրականացման դեմ»,-ասաց Զ. Փոստանջյանը:

«Թեղուտի հանքավայրի շահագործման դեպքում հիմնականում կտուժի բնությունը, մեծապես կտուժեն ոչ միայն այդ տարածքը` 350 հեկտար, այլ դրան հարող հազարավոր տարածքներ»,-այսօրվա ասուլսում նման մտավախություն հնչեցրեց «Բուրգ» ՀԿ նախագահ Արմեն Վերմիշյանը, որը նույնպես մասնակցել հեծանվային արշավին: Նրա խոսքով, անկախ փորձագետները հաստատում են, որ հաշվարկված վնասի չափը չի համապատասխանում իրական չափերին: «Փորձագետների խումբը փորձել է ցույց տալ, որ վնասներն այդքան մեծ չեն լինի, բայց սխալ են նրանք, նրանց զեկույցներում սխալները շատ են»,-նշեց ՀԿ-ի նախագահը: Ա. Վերմիշյանի խոսքով, Հայաստանում կա 13 խոշոր պոչամբար, իսկ այս վերջինը սկիզբ կհանդիսանա նորերը կառուցելու համար:

Ասուլիսին ներկա արշավի մասնակից Մարիամ Սուխուդյանը մանրամասն ներկայացրեց հեծանվաարշավի ընթացքը: «Ակցիային մասնակցել է 40 մարդ, այդ թվում` 25 հեծանվորդ: Ակցիան նպատակ ուներ հայաստանյան հասարակության ուշադրությունը կենտրոնացնել Թեղուտի պղնձամոլիբդենային հանքավայրի շահագործման կործանարար հետևանքների վրա»,-նկատեց Մ. Սուխուդյանը: Նա բացատրեց, որ իրենք հեծանիվներով են կազմակերպել ակցիան, քանի որ այն ամենամաքուր փոխադրամիջոցն է ու ամենամոտն է բնությանը: Հեծանվաարշավի մասնակիցը կարևոր է համարում Թեղուտի բնակչությանը աջակցելը, քանի որ նրանք այլընրանք չունեն` պետք է աշխատեն հանքավայրում:

«Խոստացել են 500 աշխատատեղ այն դեպքում, երբ Թեղուտ և Շմող գյուղերում բնակվում է 6000 մարդ»,-նշեց Մ. Սուխուդյանը: