Ձեր վստահելի աղբյուրը

Շուտով լիբերալիզմը կարող է սեփական ազգի համար պատուհաս դառնալ: Այսօր լրագրողների հետ հանդիպման ժամանակ նման կարծիք հայտնեց «Գոյ» թատրոնի գեղարվեստական ղեկավար Արմեն Մազմանյանը: Նրա հավաստմամբ, ցավալի է, որ Հայաստանն ընդունել է լիբերալիզմն ու ժողովրդավարությունը, սակայն մինչ օրս երկրում չեն ձևավորվել լիբերալիզմի համար սեփական երկրին համապատասխան որոշակի դրույթներ: «Ես գտնում եմ, որ մենք մեր սեփական ժողովրդի գլխին լիբերալիզմով անընդհատ «հարվածում ենք»` ցույց տալով նրա, իբրև թե, դրական ու իդեալական կողմերը, բայց չենք հասկանում, որ այն կարող է «բեսպրիդելի» վերածվել: Շուտով Հայաստանում էլ «գեյերի» պարադ կլինի»,-նշեց Ա. Մազմանյանը:

«Գոյ» թատրոնի գեղարվեստական ղեկավարի ասածին Երևանի «Մխիթար Սեբաստացի» կրթահամալիրի տնօրեն Աշոտ Բլեյանն այսպես արձագանքեց.«Ինչ ասացի՞ք, իշխանության մեջ «գեյերի» պարա՞դ»:  Մազմանյանը բացատրեց, թե այնքան ժամանակ, մինչ հեռուստատեսությամբ պոռնոգրաֆիկ ֆիլմեր կցուցադրվեն ու ինտերնետը չի վերահսկվի, հաջորդ քայլը կարելի է կանխագուշակել...

Հյուրերի հավաստմամբ, միջազգային հանրության համար կարևոր այդպիսի արժեքները կարելի է ընդունել միայն սեփական երկրի արժեքներին համապատասխանեցնելուց հետո, հակառակ դեպքում` կարելի է բացասական «պտուղներ հավաքել»:

Նշենք, որ անդրադառնալով հանրային խորհրդի ստեղծմանը, բանախոսները նշեցին, որ իրենք իրենց մասնակցությունն այնտեղ չեն տեսնում: Իսկ Ա. Բլեյանն ավելացրեց, թե միայն Ա. Մազմանյանին ու իրեն միաժամանակ հրավերի դեպքում կարելի է մտածել այդ խնդրի շուրջ: