Ձեր վստահելի աղբյուրը

Մինչ հանրահավաքը տեխնիկական խնդիրների պատճառով հետաձգվում է, «Հանրապետություն» կուսակցության նախագահ Արամ Զ. Սարգսյանը զրուցեց լրագրողների հետ: Զրույցում նա նշեց, որ կան իրենց կողմից ծրագրված որոշակի քայլեր, որոնց մասին ինքը չի ցանկանում խոսել, «քանի որ այդ մասին կասի Լևոն Տեր-Պետրոսյանը»: Ա. Զ. Սարգսյանը հայտնել է նաև, որ իրավական առումով այսօրվա հանրահավաքն արտոնված չէ, «քանի որ իշխանությունները այն աննպատակահարմար են գտել»:

«Իշխանությունները հասկացել են, որ մարդկաանց կուտակումները կարող են անկանխատեսելի հետևանքների բերել: Բանակցային գործընթացներում հասել ենք նրան, որ թույլ են տվել բարձրանալ այստեղ ու հանրահավաք անցկացնել: Շահել են և նրանք, և մենք: Այդ հարցում տուժածներ չկան: Շահել է Հայաստանի Հանրապետությունը` որպես պետություն»,-նշել է Ա. Սարգսյանը:

Նշենք, որ լրագրողների հետ զրույցում նա համաձայնել է ոստիկանապետի առաջին տեղակալ Արմեն Երիցյանի` երեկվա ասածին, թե. «Աստված մի արասցե, որ նորից այդպիսի դեպք լինի Հայաստանում: Բայց մենք պատրաստ ենք, ունենք համապատասխան տեխնիկական միջոցներ, որ կարող են կիրառվել: Սկայն մեկ անգամ ևս կրկնում եմ. ցանկալի չէ, որ լինի բախում ոստիկանության և ժողովրդի միջև»:

Ա. Սարգսյանն ավելացրել է, որ ընդհարումը ձեռնտու է միայն Ռոբերտ Քոչարյանին, ով, «Հանրապետություն» կուսակցության նախագահի բնորոշմամբ` «շատ շուտով դառնալու է աշխարհի ամենամիայնակ մարդը»: