Ձեր վստահելի աղբյուրը

Եթե ուզում ենք այս տարածաշրջանում մեր երեխաները խաղաղ ապրեն, ապա պետք է այս պահից սկսած մեր թշնամիներին ատամ ցույց տանք: Այսօր լրագրողների հետ հանդիպմանը նման համոզմունք հայտնեց Ջիվան Ավետիսյանը, ով մադրիդյան սկզբունքների մասին նկարահանած «Մխացող պատրույգ» փաստավավերագրական ֆիլմի ռեժիսորն է: Նա ֆիլմը համարում է այդ ատամներից մեկը, որտեղ ղարաբաղցիները մտածում են Գյուլիստանի, Շամխորի մասին:

Ասուլիսին ներկա «Այլատյացության կանխարգելման նախաձեռնության» խորհրդի անդամ Տիգրան Քոչարյանը մադրիդյան սկզբունքերը համարեց ամենաառեղծվածային պատմությունը մեր դիվանագիտության մեջ: Համացանցում սկզբունքները փնտրած ու այդպես էլ չգտած Տիգրանը խոստովանեց, որ ամենաաբսուրդն այս պատմության մեջ այն է, որ նախօրեին ԼՂՀ վարչապետը հայտարարել է, որ իրենք այդ փաստաթուղթը չեն տեսել, մանրամասներին ծանոթանում են մամուլից:

Ֆիլմի ռեժիսորը փաստեց, որ Ղարաբաղում սովորական քաղաքացիները ոչ միայն չեն տեսել դրանք, այլև չեն էլ լսել սկզբուքների մասին, միայն համոզված պնդում են, թե իրենք ոչ մի տարածք չեն տալու,

«Բակոն ասել է, որ տարածք չենք տալու»,- անընդհատ կրկնում են ղարաբաղցիները՝  նկատի ունենալով ԼՂՀ նախագահ Բակո Սահակյանին: ԼՂՀ նախագահի, վարչապետի ու ԱԺ նախագահի տեսակետները ֆիլմում չկան, հեղինակ ռեժիսորի խնդրանք-նամակներին բացասական պատասխան են տվել՝ պատճառաբանելով զբաղված են: Չեն ցանկանում խոսել նաև սովորական մարդիկ. խոսում են միայն «Դու կռվե՞լ ես» հարցից հետո, պատմում են իրական լեգենդներ:

Հեղինակը նշեց, որ փորձել է լինել անաչառ, ներկայացնել այն, ինչ կա: Ղարաբաղում մի բանում համոզված են, մեր պատմական հողերն են ու ոչ ոքի տալու մտադրություն չկա, ԼՂՀ ժողովուրդն արդեն ինքնորոշվել է: Հեղինակը համոզված է, եթե որևէ տարածք զիջվի ադրբեջանական կողմին, ապա պայթյուն տեղի կունենա: Հենց այստեղից էլ ծագել է ֆիլմի վերնագիրը, պատրույգը վառված է, կամ պետք է կտրել ու դեն նետել, կամ էլ սպասել պայթյունի՝ կանախատեսելով հետևանքները:

«Ղարաբաղցին չի պատրաստվում հողերը տալ: Ղարաբաղցին կանգնած է այդ հողի վրա, ու ասում է այն ինչ հիմա մենք ունենք, սա լավագույն է՝ հիշելով Շամխորի և այլնի մասին»,-ասաց Ջ. Ավետիսյանը:

Ֆիլմը ցուցադրվել է «Երկիր մեդիա» հեռուստաընկերությամբ, ցանկացողներին հեղինակները կտրամադրեն ուրախությամբ: Ֆիլմը տեղադրված է նաև www.youtube.com կայքում: