Եգանյան. Միգրացիայի բնագավառում հեղափոխական բան չի կատարվում.Պատրաստվում են նոր հետազոտության
Հանրապետության նախագահի մոտ այսօր տեղի է ունեցել խորհրդակցություն բնակչության տեղաշարժի հարցերի վերաբերյալ: Տարածքային կառավարման նախարարության Միգրացիոն պետական ծառայության ղեկավար Գագիկ Եգանյանը խորհրդակացությունից հետո լրագրղների հետ զրույցում հայտնեց, որ երկրի ղեկավարին ներկայացվել են միգրացիոն ընթացիկ վիճակը, հիմնախնդիրները և այդ ուղղությամբ կառավարության կողմից ձեռնարկվող քայլերը:
Հայտնի փաստ է, ու երկրի ղեկավարին էլ զեկուցվել է, որ մեկնումների հիմնական դրդապատճառը սոցիալ-տնտեսական պայմաններն են` բարձր վարձատրվող և ընդհանրապես աշխատատեղերի բացակայությունը: «Գրեթե 70-75 տոկոսը այդ պատճառներն են նշել: Եվ կառավարության ողջ գործունեությունը վերաբերում է այս ոլորտում իրավիճակի բարելավման»,-ասաց ոլորտի պատասխանատուն ու նշեց, որ այդ աշխատանքը որոշակի ժամանակ է պահանջում, միանգամից արդյունքների ականատես չենք լինելու:
Եգանյանը հիշեցրեց, որ անցած տարվա դեկտեմբերին կառավարությունը հաստատել է բնակչության միգրացիայի պետական կառավարման հայեցակարգը, որում սահմանված են 14 գերակա ուղղություններ և յուրաքանչյուրի համար սահմանված է, թե ինչպիսի մեխանիզմներ պետք է կիրառվեն: Նախատեսվում է, որ այս տարվա սեպտեմբերին արդեն կառավարության դատին պետք է ներկայացվի հայեցակարգի կիրառումն ապահովող գործողությունների ազգային ծրագիր:
Նախագիծը պատրաստ է, այն հարյուրից ավելի գործողություններ է սահմանում` կոնկրետ կատարողներ ու կոնկրետ ժամանակացույց: Եգանյանը պարզաբանեց, որ դրանք հիմնականում վերաբերում են միգրացիայի ենթաոլորտի կարգավորմանն ու կառավարման համակարգի բարեփոխմանը, օտարերկրյա քաղաքացիներին տրամադրվող ապաստանի, սահմանային վերահսկողության կատարելագործման, միգրացիայի կանխարգելման, օտարերկրյա պետություններում բնակվող քաղաքացիների վերադարձի ու այլ խնդիրների վերաբերյալ հարցեր: Օրիանակ, այլ երկրներից հայաստանցիներին հայրենիք վերադարձնելու գործում Եգանյանը որպես պետական միջոցառում նշեց տեղեկությունների տրամադրումից մինչև զբաղվածության խնդրի լուծման աջակցությունը:
Անցնելով վիճակագրությանը, Եգանյանը նշեց, որ մինչև 2001-ը արտագաղթածների թիվը տատանվում է 1-1,1 մլնի սահմաններում: «2002-2007 թվականը 150 հազար անձ է արտագաղթել, առաջին խումբը մշտական բնակության նպատակով է մեկնել, նրանք դուրս են եկել հաշվառումից, նրանց թիվը տարեկան կտրվածքով կազմում է 9 հազար, իսկ երկրորդ խումբը աշխատանքային միգրանտների կուտակումներն են, նրանք դուրս են եկել ու չեն վերադարձել, բայց չի բացառվում, որ կվերադառնան, տարեկան նրանց թիվը հասնում է 15-16 հազար»,-ասաց նա:
Բանախոսը փաստեց, որ 2008-ից հետո հետազոտություններ այս հարցերի առնչությամբ չի անցկացվել, կարևորվել է նոր հետազոտություն անցկացնելու անհրաժեշտությունը, թե մամուլին, թե հանրությանը հստակ թվեր ներկայացնելու համար: Արտագաղթի վերաբերյալ հրապարակված տվյալներին նա թերահավատությամբ է վերաբերում, կարծիք հայտնեց, որ սահման անցնողների թվերն են հրապարակում, առանց հաշվի առնելու սեզոնը, ապա չբացառեց, որ հրապարակումները լինում են նաև քաղաքական շահարկումների նպատակով:
«Այն գնահատականները, որ հնչեցվում են զանգվածային արտագաղթի վերաբերյալ, մեր ունեցած տվյալները դրա իսկությունը չեն ապացուցում, որովհետև ամեն մի միգրանտ նախ և առաջ ուղևոր է, եթե երկու տարում զանգվածային արտագաղթ է եղել, նշանակում է, որ Հայաստանից ուղևորների ելքը պետք է անհամեմատ աճած լիներ և տարբերությունը նախորդ տարիների համեմատ պետք է մեծ լիներ, սակայն տարբերությունը ընդամենը կազմում է 2-4 հազար: Այս բնագավառում հեղափոխական, ցնցումային բան չի կատարվում»,-հայտարարեց ծառայության տնօրենը, հավելեց, որ հանրապետության նախագահը հանձնարարել է ոլորտի վերաբերյալ հանրությանը իրազեկեն:
Հարցին, թե ինչու վերջին մի քանի տարիներին հետազոտություն չի անցկացվել, Եգանյանն ասաց, որ դրանք նախկինում ֆինանսավորվել են միջազգային տարբեր կառույցների ֆինանսական միջոցների հաշվին, այժմ մտածում են, որ օգտագործեն բյուջեի միջոցները: Նախատեսվող մարդահամարը որոշակի չափով կպատասխանի մի քանի հարցերի:
Լրահոս
Տեսանյութեր
Սա քաղաքական գործընթաց է, անթույլատրելի քաղաքական որոշումներ. Թաթոյանը՝ սահմանազատման մասին