Ձեր վստահելի աղբյուրը

Քիչ առաջ Գիտությունների ազգային ակադեմիայում մեկնարկեց ակադեմիկոս Վիկտոր Համբարձումյանի անվան միջազգային գիտական մրցանակի հանձնման հանդիսավոր արարողությունը, որին ներկա էր հանրապետության նախագահ Սերժ Սարգսյանը: Այս տարի միջազգային մրցանակը շնորհվում է աստղաբան, պրոֆեսոր Յան Էյնաստոին (Էստոնիա)և պրոֆեսոր Իգոր Նովիկովին (Ռուսաստան):

Ինչպես պարգևատրման արարողությանը նախորդող ասուլիսում հայտնեց ՀՀ ԳԱԱ նախագահ Ռադիկ Մարտիրոսյանը` այս տարի ներկայացվել է տարբեր երկրներից շուրջ 20 հայտ, բայց ընտրությունը կատարվեց ի օգուտ այս երկու գիտնականների: Նա շեշտեց, որ մրցանակակիրների ընտրությունը կատարվել է անաչառ, հատուկ ստեղծված հանձնաժողովի ութ անդամների կողմից:

Ռ.Մարտիրոսյանի խոսքով, Վ.Համբարձումյանի անվան մրցանակը արդեն մեծ պատիվ ու հարգանք է վայելում աշխարհում: Նրա խոսքով, այն մեծ ոգևորություն առաջացրել երիտասարդ գիտնականների շրջանում:

Նշվեց, որ մրցանակների առաջադրումների սկզբնաժամկետն էր 2011թ-ի սեպտեմբերի 18-ը, իսկ վերջնաժամկետը` 2012թ-ի մարտի 18-ը:

«Էստոնացի և ռուս մասնագետները մեծ ներդրում են կատարել աստղագիտության զարգացման գործում: Ուսուցանելով Վ.Համբարձումյանի մոտ, իրենց գործունեության շնորհիվ կարողացան լուրջ ներդրում ունենալ հայ մեծ աստղագետի գործի շարունակության մեջ»,-հավելեց Ռադիկ Մարտիրոսյանը:

Մրցանակակիր Իգոր Նովիկովը, շնորհակալություն հայտնելով նման բարձր պարգևի համար, պատրաստակամություն հայտնեց այսուհետ ևս սերտորեն համագործակցել հայ աստղագետների հետ և նպաստել հայ գիտության հեռանկարային զարգացմանը:

Նման պատրաստակամություն հայտնեց նաև էստոնացի Էյնաստոն` նշելով, որ իր համար մեծ պատիվ էր աշխատել Վ.Համբարձումյանի հետ, իսկ նման մրցանակը խթան կհանդիսանա ոլորտի զարգացմանը:

Ռ.Մարտիրոսյանը, եզրափակելով պարգևատրվածների մասին խոսքը շեշտեց, որ մրցանակի հիմնական նպատակն է ըստ արժանվույն բարձր պահել աստղագետի կոչումը:

Նա հատկանշեց, որ որևէ կարևորություն չի տրվում գիտնականի ծագումնաբանությունն ու այն, թե որ երկիրն է նա ներկայացնում.

«Հանձնաժողովը հաշվի է առնում գիտնականի անցած ուղին և գիտական աշխատությունների ճանաչված լինելը»,- ընդգծեց նա:

Այն հարցին, թե արդյո՞ք եղել են Հայաստանից որևէ հայտեր, Ռ.Մարտիրոսյանն արձագանքեց, որ մրցույթը կազմակերպվում է նույն ձև, ինչ նոբելյան մրցանակը և գիտական էթիկայի սահմաններից ելնելով մինչև վերջին պահը հայտ ներկայացրած որևէ գիտնականի մասին տեղեկություն չի հրապարակվում:

Լրագրողների այն հարցին, թե ինչո՞ւ է հարկավոր նման մրցանակ սահմանելն ու այդչափ միջոցներ (մրցանակը կազմում է 500 հազար ԱՄՆ դոլար )հատկացնել գիտնականներին, եթե կարելի էր այն հատկացնել, օրինակ, Բյուրականի աստղադիտարանի արդիականացմանը` ԳԱԱ նախագահն ասաց, որ մրցանակը հնարավորություն է տալիս բարձրաձայնել հայ աստղագետների խնդիրների մասին համաշխարհային մասշտաբով և օգտակար լինել գրանտային և այլ ծրագրերին, որոնք կնսպաստեն գիտության զարգացմանը:

Նա նաև տեղեկացրեց, որ անցած ամիս մեկնարկել են Բյուրականի աստղադիտարանի 2.6 մետր շառավիղով հեռադիտակի արդիականացման աշխատանքները, որոնց ավարտը նախատեսված է մինչև 2013թ-ի վերջ:

Նշենք, որ մրցանակը սահմանվել է 2009թ-ի ապրիլի 16-ին ՀՀ նախագահ Սերժ Սարգսյանի հրամանով, այն շնորհվում է աստղաֆիզիկայի, ինչպես նաև դրան հարակից ֆիզիկայի, մաթեմատիկայի բնագավառներում ակնառու գիտական աշխատանքների համար` երկու տարին մեկ անգամ: Մրցանակը կազմում է 500 հազար ԱՄՆ դոլար և առաջին անգամ այդ մրցանակով պարգևատրվել են 2010թ-ին :