Ձեր վստահելի աղբյուրը

Երկար սպասումից հետո հոկտեմբերի սկզբին Մարալիկում վերջապես շահագործման հանձնվեցին սոցիալական երեք շենքերը, որտեղ 59 բնակարան ստացան մանկատան շրջանավարտներ, հաշմանդամներ ու միայնակ տարեցներ: Դրանից հետո թեման կարծես թե փակվեց` տները ստացան, փառք Աստծո, դե թող վայելեն:

Սակայն պարզվեց, որ բնակարանները իրենց սեփականատերերին բացի ուրախությունից (ի վերջո բնակարան ստացածների մի հատվածը բնակարան ստացավ տարիներով թիթեղյա տնակներում, վարձով ու այստեղ-այնտեղ յոլլա գնալուց հետո) նաև մտահոգվելու, անհանգստանալու ու վախը սրտում ապրելու նոր առիթ դարձան. շահառուներից և ոչ մեկը, պարզվում է, տեղյակ չէր, որ բնակարանները տրվում են X ժամանակով, միայն երբ պայմանագիր կնքելու ժամանակն եկավ դա պարզվեց:

Մեր ձեռքի տակ է պայմանագրի ձևը, որը կնքվում է Մարալիկի սոցիալական շենքերում բնակարան ստացած քաղաքացու` փոխառուի և փոխատուի` ՀՀ Աշխատանքի և սոցիալական հարցերի նախարարության «Սոցիալական բնակարանային ֆոնդի սպասարկման կենտրոն» պետական ոչ առևտրային կազմակերպության միջև:

Նախ, առաջին խնդիրը, որ աչք է զառնում պայմանագրի ժամկետն է: Պայմանագրի 6-րդ կետում կարդում ենք.

«Սույն պայմանագիրը ուժի մեջ է մտնում և կողմերի համար պարտադիր է դառնում կնքելու պահից և գործում է մինչև 01.11.2015թ. ( մեր օրինակում կնքման ամսաթիվ է նշված 01.11.2012թ.): Կողմերի փոխադարձ համաձայնությամբ սույն պայմանագրի գործողության ժամկետը կարող է երկարաձգվել»:

Պայմանագրի 8-րդ հոդվածում էլ կարդում ենք.
«Փոխառուն պարտավորվում է սույն պայմանագրի ժամկետը լրանալուց հետո ազատել բնակարանը»:

Այլ կերպ ասած, մեկ ամիս առաջ սոցիալական բնակարան ստացած քաղաքացիների ուրախությունը ընդամենը երեք տարի կտևի, որից հետո, եթե պետությունը չցանկանա երկարաձգել պայմանագիրը, նրանք նորից կհայտնվեն այնտեղ, որտեղից հասել են Մարալիկ:

Ինչ վերաբերում է պայմանագրի այլ դրույթներին, ապա դրանց թվում կարելի է առանձնացնել պայմանագրի այն հատվածը, որը վերաբերում է փոխառուի պարտավորություններին:

Մասնավորապես կարդում ենք.
«Փոխառուն պարտավոր է պահպանել մաքրություն բնակարանում և ընդհանուր օգտագործման տարածքներում, պահպանել հասարակական կարգը և ներքին կարգապահական կանոնները…. սահմանված ժամկետում կատարել էլեկտրաէներգիայի և կոմունալ ծառայությունների վարձավճարները»: Մեկնաբանությունները, ինչպես ասում են, ավելորդ են…

Panorama.am-ը պայմանագրում առկա դրույթների շուրջ փորձեց զրուցել պատասխանատու անձանց հետ` պարզելու, ինչո՞ւ երեք տարի, ինչպե՞ս ստացվեց, որ Մարալիկի սոցիալական շենքերի շահագործման սպասումով հետաքրքրվող ԶԼՄ-ներին որևէ մեկն այդպես էլ չասեց, որ դրանք ժամանակավոր կացարան են հանդիսանալու այն խմբերի անձանց, որոնք բնակարան կստանան և այլն:

Նախ, մեզ ուղորդեցին Աշխատանքի և սոցիալական հարցերի նախարարության Տարեցների հիմնահարցերի բաժնի պետ Անահիտ Գևորգյանի մոտ, սակայն վերջինս դժվարացավ պատասխանել ժամկետների առումով ու նշեց, որ պայմանագրի վերջնական տեսքին չի ծանոթացել, բայց տեղյակ է, որ կան շահառուներ, ում հետ պայմանագիրը կնքվում է 3 կամ 5 տարով: Ու միայն հստակ ընդգծեց, որ ինչ վերաբերվում է տարեցներին, ապա նրանց հետ պայմանագիրը անժամկետ է կնքվում:

Սակայն «Սոցիալական բնակարանային ֆոնդի սպասարկման կենտրոն» ՊՈԱԿ-ի տնօրեն Վահան Զուրաբյանն էլ լրիվ այլ բան ասաց. «Չկա նման հասկացողություն` 3 տարի, 5 տարի կամ անժամկետ: Բնակարանները տրվում են անօթևաններին, որպես ժամանակավոր կացարան մինչև նրանք ձեռք բերեն կամ նվեր կստանան իրենց սեփական բնակարանը»,- Panorama.am-ին ասաց Վ.Զուրաբյանը:

Նրա խոսքով, եթե քաղաքացին բնակարան ձեռք բերի, ապա սոցիալական բնակարանը պետությունը նրանից կվերցնի, սակայն որպես այդպիսին ժամկետ, թե այն լրացավ ու մարդուն պետք է բնակարանից դուրս հանել չկա և միայն ՊՈԱԿ-ն է որոշում, թե երբ է դադարեցնում պայմանագրի գործունեության ժամկետը:

Հետաքրքրվեցինք` եթե անցած ժամանակահատվածում, որը այնուամենայնիվ, ֆիքսվում է պայմանագրում, քաղաքացին բնակարան չի ձեռք բերում, պայմանագրում ամրագրված է, որ ժամկետը կարող է չերկարաձգվել. «Այո, դա էլ է հնարավոր, որ չերկարաձգվի»,- նշեց Վ.Զուրաբյանը:

Այն, որ պայմանագիրը, փաստորեն, բնակարան ստացածներին անընդհատ վախի մեջ է պահելու, առավել ևս երբ պարզվում է, որ ժամկետ էլ չկա հստակ ու պետությունը ցանկացած պահի կարող է նրանց կանգնացնել բնակարանը ազատելու պահանջի առաջ ըստ մեր զրուցակցի այնքան էլ այդպես չէ. «Եթե քաղաքացին խախտի պայմանագրում առկա կետերը, ապա այդ դեպքում կազատի բնակարանը: Բայց եթե նա այդ կետերը չի խախտի ու կլինի բարեխիղճ օգտագործող, ապա չեմ կարծում»,- նշեց նա, սակայն հավելենք, որ բարի կամքի վրա թողնված հարցերը միշտ ամենից շատ մտահոգողն են լինում:

Ինչ վերաբերում է պայմանագրում առկա այլ դրույթների, ապա այս իմաստով Վ.Զուրաբյանը ձեռնպահ մնաց ավելին հայտնելուց , քան` «պետք է բնակարանը մաքուր վերադարձնել»: Միայն նշեց, որ պայմանագիր կազմելը նախարարության գործառույթն է, այն հաստատվում է նախարարի կողմից և բոլոր հարցերը, հետևաբար, հենց նրանց պետք է հասցեագրել:

Նախորդիվ` Պետությունը բնակարան է բաշխում ուղղակի անելու համար, առանց ճիշտ հասցեականության