Ձեր վստահելի աղբյուրը

Այսօր Հայաստանի պետական ճարտարագիտական համալսարանը (Պոլիտեխնիկ) հյուրընկալել էր ՏՏ ոլորտում համաշխարհային ներդրման համար Հայաստանի Հանրապետության նախագահի 2012թ. մրցանակի դափնեկիր, առաջին միկրոպրոցեսորի նախագծող, Synaptics ընկերության պատվավոր նախագահ, «Ֆեդերիկո և Էլվիա Ֆաջին» հիմնադրամի նախագահ Ֆեդերիկո Ֆաջինին և նրա տիկնոջը:

Ի արժևորումն տեղեկատվական և հաղորդակցման տեխնոլոգիաների ոլորտում Ֆեդերիկո Ֆաջինի համաշխարհային ակնառու ներդրման և ի նշանավորումն Հայաստանի պետական ճարտարագիտական համալսարան կատարած նրա այցելության` բուհի Գիտական խորհրդի որոշմամբ Ֆեդերիկո Ֆաջինին շնորհվեց ՀՊՃՀ պատվավոր դոկտորի կոչում:

Ֆեդերիկո Ֆաջին hամալսարանում հանդիպել է նաև ՀՊՃՀ ռեկտոր Արա Ավետիսյանի, բուհի ղեկավար անձնակազմի, ուսանողության ու պրոֆեսորադասախոսական կազմի, ինչպես նաև` այլ բուհերի ղեկավարների և ոլորտային գիտական ինստիտուտների ներկայացուցիչների հետ: Հանդես եկավ մասնագիտական կարճ զեկուցմամբ առաջատար բուհերի ռեկտորների, ՀՀ ԳԱԱ ներկայացուցիչների, ավագ հետազոտողների, դասախոսական անձնակազմի և ուսանողների համար:

Նշենք, որ մինչ այժմ ՀՊՃՀ պատվավոր դոկտորի կոչում է շնորհվել Apple Computer կորպորացիայի համահիմնադիր և ՏՏ ոլորտում համաշխարհային ներդրման համար ՀՀ նախագահի 2-րդ մրցանակակիր Սթիվ Վոզնյակին, «INTEL» կորպորացիայի տնօրենների խորհրդի նախկին նախագահ, ՏՏ ոլորտում համաշխարհային ներդրման համար ՀՀ նախագահի 1-ին մրցանակակիր Քրեյգ Բարրեթին, Զանգեզուրի պղնձամոլիբդենային կոմբինատի տնօրեն Մաքսիմ Հակոբյանին, «Սինոփսիս Արմենիա» ՓԲԸ-ի գլխավոր գործադիր տնօրեն և «Սինոփսիս» ընկերության մարքեթինգի գծով փոխնախագահ Ռիչ Գոլդմանին, ՀՊՃՀ Խորհրդի նախկին նախագահ, պետական և հասարակական ականավոր գործիչ Ֆադեյ Սարգսյանին, ՀՀ ԳԱԱ ակադեմիկոս Սերգեյ Համբարձումյանին, ՀՀ վաստակաշատ ճարտարապետ, ԳԱԱ ակադեմիկոս Վարազդատ Հարությունյանին, Հայաստանի ամերիկյան համալսարանի հիմնադիր-նախագահ Միհրան Աղբաբյանին և Հայ Առաքելական Եկեղեցու ԱՄՆ Արևելյան թեմի առաջնորդ Խաժակ արքեպիսկոպոս Պարսամյանին: