Զինված ուժերին հատկացվող ֆինանսական միջոցները բավարար են. Սեյրան Օհանյան
Ներկայումս Հայաստանի զինված ուժերին հատկացվող ֆինանսական միջոցները բավարար են զինված ուժերի բնականոն գործունեության համար, մանավանդ կա միջազգային փորձ, որի համաձայն, հատկացումները պետք է կազմեն 3.5 տոկոս: Այդ մասին այսօր Ազգային ժողովում 2012-ի բյուջեից պաշտպանության նախարարության հաշվետվության դռնփակ քննարկումից առաջ մի քանի լրագրողների հետ զրույցում հայտարարեց ՀՀ Պաշտպանության նախարար Սեյրան Օհանյանը:
«Պաշտպանական գերատեսչության յուրաքանչյուր ղեկավարի համար լավ կլիներ, որ պետական բյուջեից տրվող ֆինանսական հատկացումներն ավելի շատ լինեին, մանավանդ այն իրականության մեջ, երբ ունենք այնպիսի հակառակորդ, որը լուրջ միջոցներ է հատկացնում սպառազինության համար: Մենք փորձում ենք ժամանակակից ֆինանսավորման ու բյուջետավորման ծրագրերի ներդրման և նաև մեզ հետ համագործակցող երկրների հետ համագործակցության ու փորձի փոխանակման շրջանակներում հնարավորինս ուշադրություն դարձնել յուրաքանչյուր լումայի օգտագործման վրա: Բացի այդ, կապիտալ ներդրումների ծրագրերի իրականացման շրջանակներում մենք նաև այլ միջոցներ ենք գտնում, որպեսզի հետ չմնանք ժամանակակից սպառազինության և ռազմական տեխնիկայի ձեռք բերման գործընթացից: Նաև ՀԱՊԿ անդամ ենք և կազմակերպության անդամների համար դյուրին ընթացակարգ է նախատեսված ու ավելի էժան գտնում ենք համապատասխան միջոցներ: Ունենք ռազմավարական գործընկերներ, ովքեր աջակցում են մեզ որպեսզի ռազմատեխնիկական համագործակցության խնդիրները մեզ մոտ ավելի բարձր մակարդակի վրա գտնվեն», -հայտարարեց Հայաստանի պաշտպանության նախարարը:
Լրագրողների խնդրանքով Օհանյանը մեկնաբանեց Բիշքեկում ՀԱՊԿ գագաթաժողովում Հայաստանի նախագահի չմասնակցելու վերաբերյալ շահարկումները և ասաց. «Չի կարելի շահարկել, քանի որ նախագահը մասնակցում էր պետական միջոցառմանը` Առաջին հանրապետության 95 ամյա տարեդարձին»: