Ձեր վստահելի աղբյուրը

«Հերիք եղավ, բոլ եղավ ինչքան խուլիգանություն արեցիք: Պետք է հասկացնել, որ Երևանը ձեր բոստանը չէ, որ ինչ ուզենանք անեք: Մի քանի օր առաջ Երևանը դարձել էր ծովից ծով Հայաստանը, դրա մասին է պետք մտածել»,- լրագրողների հետ հանդիպման ժամանակ բավականին բորբոքված ասած քաղտեխնոլոգ Կարեն Քոչարյանը՝ խոսելով քաղաքապետարանի հայտարարած  Երևանի Հանրապետության հրապարակի վերակառուցման հայեցակարգային նախագծի հանրապետական ճարտարապետական բաց մրցույթի մասին: Ըստ նրա, Երևանում որևէ պատմական հուշարձան չի մնացել, որ վկայի թե քանի հազար տարվա պատմություն ունի այն. «Ասում են Հռոմից 30 տարի մեծ քաղաք է: Գնացեք Հռոմ ու տեսեք այդ պատմությունը: Այստեղ նույնիսկ սովետականը չեն թողել»:

Ինչ վերաբերում է մրցութային հանձնաժողովի կազմին, որի մեջ ընդգրկված են մշակույթի, քաղաքաշինության նախարարություններից ներկայացուցիչներ, քաղտեխնոլոգը նշեց. «Որ դրանք պահպանող լինեին, Գառնիի սիմֆոնիան ու Փակ շուկան կպահպանեին: Նարեկ Սարգսյանն ինչ ուզում անում է, իսկ քաղաքապետարանն էլ ոնց որ մեխի գլուխ լինի»:

Ասուլիսին ներկա ճարտարապետ, մրցութային հանձնաժողովի անդամ Սաշուր Քալաշյանի գնահատմամբ մրցույթն անիմաստ է, ժամանակավրեպ: Ըստ նրա, հրապարակը որևէ խնդիր չունի, այլ միայն տրանսպորտային միջոցներով գերծանաբեռնավածությունն է, որի լուծման համար ուղղակի անհարժեշտ է հայեցակարգային ծրագիր մշակել ու իրականացնել:

Ս. Քալաշյանը, ով  քաղաքապետարանի ճարտարապետական հանձնաժողովի անդամ է, ասաց նաև, որ հրապարակի վերակառուցման վերաբերյալ հանձնաժողովում երևէ լուրջ քննարկում չի եղել.

«Հարցը շոշափվել է ճարտարապետական հանձաժողովում: Միշտ հարցադրումը եղել է՝ ո՞րն է մրցույթի պատրվակը: Նարեկ Սարգսյանը, ով նախաձեռնողն է, միշտ ասել է պատրաստ չի, հետո կզեկուցի: Որպես օրակարգային հարց երկու անգամ է եղել՝ հունվարին և մարտի վերջին: Մարտի վերջին կայացած նիստում մեզ բաժանվեց հայտարարության տեսքն ու ասաց գնացեք տանը կկարդաք ու եթե դիտողություններ լինեն, կասեք: Ես անձամբ իմ դիտողությունները տվեցի, հիմնական հարցերին դեմ էի, թողել էի միայն տրանսպորտի ու Լենինի արձանի խնդիրրը: Բայց սրանք երկուսն էլ մրցույթ հայտարարելու խնդիր չէ: Եղավ քար լռություն ու եղավ այն, ինչ եղավ: Հայտարարվեց մրցույթ: Նոր տեսքն ընթերցել եմ ինտերնետում, որը գործնականում մեզ բաժանվածից միայն ուղղագրական փոփոխություններ է կրել: Հիմա հայտարարում է, որ տաս անգամ քննարկվել է, որևէ առաջարկություն չի եղել, միայն մեկ դիտողություն է եղել»: Մանրամասնությունները ներկայացնելուց հետո ճարտարապետն ասաց. «Ինձ համար պարզ չեղավ, թե հիմնական խնդիրը ո՞րն է, ի՞նչ հարցն են ուզում լուծել: Ես կարող եմ ենթադրել»:

«Միակ հարցը, որ պետք է լուծեն՝ փող լվանան»,- ասաց Կարեն Քոչարյանը:
Ս. Քալաշյանը նաև նշեց, որ օրենսդրական խախտումներով է հայտարարված մրցույթ, օրինակ՝ նշված չէ ներկայացվող նյութի պարամետրերը, որոնց հիման վրա ներկայացվող նախագիծը կընդունվի կամ չի ընդունվի և այլն:

Նախորդող նորություններ՝«Հայնախագիծ» ընկերության տնօրեն. Փորձում ենք Հանրապետության հրապարակը համահունչ դարձնել այլանդակված շրջապատին

«Հայտարարված մրցույթը չի նշանակում որևէ կառույցի իրականացում». Պարզաբանել է Երևանի գլխավոր ճարտարապետը