Ձեր վստահելի աղբյուրը

 Պուտինը հայտարարել է, որ ապօրինի ներգաղթյալների խնդրի վերաբերյալ միանգամից մի քանի ուղղությամբ պետք է աշխատել: Այս մասին տեղեկացնում է «ՌԻԱ Նովոստի» գործակալությունը:

ՌԴ նախագահ Վլադիմիր Պուտինը Քաղաքացիական հասարակության զարգացման և մարդու իրավունքների խորհրդի այսօր կայացած նիստի ժամանակ հայտարարել է, որ պետք է ավելի խիստ վարվել ապօրինի ներգաղթյալներին աշխատանք տրամադրողների հետ:

Աղբյուրի փոխանցմամբ` Պուտինն ասել է. «Արտասահմանցիների փաստաթղթերը պետք է նախ ժամանակին կազմվեն: Նրանց հետաքրքրությունները նույնպես պետք է հաշվի առնենք: Տեսնում ենք` ինչ անամոթ շահագործում է կատարվում: Մարդկանց անասունի պես են պահում աշխատանքի վայրում: Նրանք այնտեղ և ապրում են, և աշխատում, աշխատանքի դիմաց գրոշներ են ստանում, նրանցից վերցնում են փաստաթղթերը»:

Պուտինի խոսքերով այս խնդրի լուծումը շատ բարդ է: ՌԴ նախագահն ասել է, որ Ռուսաստանում միլիոնավոր մարդիկ են ապրում և աշխատում այս պայմաններում: Պուտինը կարծում է, որ այս խնդրի շուրջ միանգամից մի քանի մոտեցում է պետք. «Այսպիսի աշխատուժ հավաքողների հետ ավելի խիստ պետք է վարվել, մարդկանց այս պայմաններում պահողները պետք է պատժվեն, և արտասահմանցիներն իրենք էլ պետք է ենթարկվեն մեր օրենքներին: Որևէ պատասխանատվություն պետք է լինի»,- հավելել է Պուտինը:

Հիշեցնենք, որ այս օգոստոսին Ռուսատանում սկսվեց լայնածավալ պայքար ապօրինի ներգաղթյալների դեմ, ձերբակալվեցին տարբեր ազգությունների հարյուրավոր ներգաղթյալներ: Ավելի վաղ, ՌԴ նախագահի հրահանգով օրենք էր ընդունվել, որի համաձայն ապօրինի ներգաղթյալներին աշխատանք տրամադրողները պետք է տուգանվեն: