Ձեր վստահելի աղբյուրը

«Տաճարը չի կառուցվում միայն կառուցվելու համար: Այն կառուցվում է, որպեսզի մարդիկ հավաքվեն այստեղ աղոթելու, իսկ աղոթքը չի կարող չլինել առանց ներքին խորը վերլուծման, առանց ներքին ուժեղ ցանկության հաղորդակցվելու Աստծո հետ»,- Մոսկվայի «Սուրբ Պայծառակերպություն» Տաճարի օծման արարողությունից հետո իր խոսքում հայտարարեց Մոսկվայի և Համայն Ռուսիո Պատրիարք Կիրիլը` կարևորելով ռուսաստանաբնակ հայերի համար եկեղեցական համալիրի բացումը:

Պատրիարքը նշեց, որ քրիստոնեությունն այսօր կանգնած է լուրջ մարտահրավերների առջև և ամենավտանգավորն այն է, որ մեզանից փորձում են խլել Աստծուն և դրա փոխարեն այլ «արժեքներ» հրամցնել` փող, հարստություն, հաճույքներ, իշխանություն.

«Այսօր մենք այստեղ ենք, որպեսզի ապացուցենք աշխարհին, որ Աստված ապրում է մեզանում և դրա ապացույցը այն է, ինչ կատարվում է մեր հոգում: Եվ հայկական Տաճարի կառուցումը նաև ապացույցն է Աստծո ներկայության»,- շեշտեց Պատրիարք Կիրիլը` հավելելով, որ Հայ Առաքելական եկեղեցին և ռուս Ուղղափառ եկեղեցին եղբայրական, սերտ համագործակցության մեջ են և հայկական եկեղեցական համալիրը մեծ ներուժ է պարունակում այդ կապի հետագա զարգացման ու ամրապնդման համար:

Օծման հանդիսավոր արարողությունից հետո Ամենայն Հայոց Կաթողիկոսը բարերարներին պարգևատրեց Գրիգոր Լուսավորիչ, «Սուրբ Ներսես Շնորհալի» շքանշաններով:

Մատուցվեց Սուրբ պատարագ:

Նշենք, որ մինչ օրս Մոսկվայում գործել է ընդամենը մեկ հայկական եկեղեցի, իսկ մյուս երկուսը ժամանակի ընթացքում քանդվել են: Այնպես որ Ռուսաստանի և Նոր Նախիջևանի հայոց թեմի առաջնորդանիստ եկեղեցին ու եկեղեցական համալիրը իսկապես սպասված էր հայության համար: Ի դեպ, սա ամենամեծ թեմն է ամբողջ աշխարհի կտրվածքով:

Նախորդիվ`
Մոսկվայի եկեղեցին օծվեց, այն կկրի «Սուրբ Պայծառակերպություն» անունը (լուսանկարներ)

Անիի վարդագույն տուֆը Մոսկվայի կենտրոնում. Մոսկվայի Հայոց առաջնորդանիստ եկեղեցին այսօր կօծվի (լուսանկարներ