Ձեր վստահելի աղբյուրը

Գարունը տարերքի մեջ է: Այսպես այսօրվա ասուլիսը այսպես սկսեց ՀՀ գյուղատնտեսության փոխնախարար Սամվել Գալստյանը` ներկայացնելով նախորդ տարի գյուղատնտեսության ոլորտում իրականացված աշխատանքներն ու այս տարվա ծրագրերը:

Ըստ փոխնախարարի` 2013թ-ի գյուղատնտեսական մթերքների արտադրության բոլոր տեսակների գծով զգալի աճ է արձանագրվել, մասնավորապես, բուսաբուծության ոլորտում աճը կազմել է 6,6%:

Ինչ վերաբերում է ցանքատարածություններին, ապա 2013-ին մշակվող ցանքատարածությունները կազմել են 318.6 հազար հեկտար, ինչը 2012թ-ի համեմատ ավելի է մոտ 14 հազ. հա-ով: Նրա խոսքերով` ՀՀ կառավարության կողմից վերջին տարիներին իրականացվող պետական աջակցության ծրագրերի արդյունքում` վերջին երեք տարիներին հանրապետությունում մշակովի ցանքարատարածությունները ավելացել են շուրջ 35 հազար հա-ով: Եթե 2010 թ-ին մշակվում էր 283.6 հազար հա ցանքարատարծություն, ապա 2013թ-ին` 318.6 հա:

Անդրադառնալով 2014թ-ի գյուղատնտեսության ոլորտում նախատեսվող աշխատանքներին, Ս.Գալստյանը նշեց, որ կառավարությունն արդեն հաստատել է հողօգտագործողներին մատուցվող գարնանացանի համար անհրաժեշտ սերմացու մատակարարելու ծրագիրը:

Այս տարի, ըստ փոխնախարարի, նախատեսվում է ներկրել 2510 տոննա սերմացու: Ներկրման աշխատանքներն արդեն սկսվել են և Արագածոտնի մարզի պահեստարանում արդեն պահեստավորվել է 60 տոննա գարու և 40 տոննա կորնգանի սերմացու, Սյունիքի մարզի պահեստարանում` 58,7 տոննա գարու սերմացու, Գեղարքունիքի մարզում` 60 տոննա սերմացու:

«Նախարարությունը մատարակարարող կազմակերպությունների հետ ունեցած պայմանագրերի համաձայն` սեղմ ժամկետներում հանրապետություն կներկրի պահանջվող սերմացուները, որպեսզի ժամանակին կարողանանք հատկացնել գյուղացիական տնտեսություններին»,- ասաց Ս.Գալստյանը` հավելելով, որ գարնանացանի աշխատանքների համար կներկրվի նաև ազոտական պարարտանյութ:

Բացի այդ, ըստ նրա, նախատեսվում է այս տարի առաջին անգամ Հայաստան ներկրել ֆոսֆորական և կալիումական պարարտանյութեր:

Մասնավորապես, ծրագրով նախատեսվում է ներկրել 33 հազ. 281 տոննա ազոտական պարարտանյութ, 2647 տոննա` ֆոսֆորական պարարտանյութ, 1618 տոննա` կալիումական պարարտանյութ: 50 կգ մեկ պարկ ազոտական պարարտանյութը հողօգտագործողներին կհատկացվի 6000 դրամով, 50 կգ պարկ ֆոսֆորական և կալյումական պարարտանյութերը` 7000 դրամով:

Ս.Գալստյանը նշեց, որ մինչև օրս հողերը պարարտացվում էին միայն ազոտական պարարտանյութով և առաջին անգամ հողօգտագործողները կօգտագործեն ֆոսֆորական և կալիումական պարարտանյութեր` սրանով կփորձեն վերջ դնել հողերի միակողմանի պարարտացման աշխատանքներին: Նշվեց նաև, որ արդեն Արարատի և Արմավիրի մարզերը ստացել են 627 տոննա ազոտական պարարտանյութ:

Հողօգտագործողներին կտրամադրվի նաև դիզելային վառելիք: Այս տարի նախատեսվում է տրամադրել 17 մլն 641 հազ. դիզելային վառելիք:

«Ուզում եմ հողօգտագործողներին տեղեկացնել, որ պարարտանյութը, սերմացուն և դիզելային վառելիքը կմատակարարվի միայն ու միայն նախապես վճարումները կատարելու պայմանով, որպեսզի զերծ մնանք տարբեր շահարկումներից»,- հայտնեց Ս.Գալստյանը:

Հարցին, թե գյուղացիները ինչպես կարող են նախապես վճարումներ կատարել, երբ այսօր նրանք վճարունակ չեն, փոխնախարարը նշեց. «Այս տարի որոշել ենք ոչ թե նախորդ տարվա նման նախապես մատակարարենք ու հետո գյուղացիները գումարները վճարեն, այլ հակառակը` վճարեն ու նոր մատակարարենք: Պատճառն այն է, որ որոշակի գումարների հավաքագրումը ձգձգվում է»:

Ս.Գալստյանի խոսքերով` 1 կգ գարու սերմացուն գյուղացիներին կտրամադրվի 200 դրամով, 1 կգ առվույտը` 1500 դրամով, եգիպտացորենի սերմացուն` 350 դրամով, կորնգանի սերմացուն` 370 դրամով:

«Կառավարությունը 40-45 տոկոսով ներկրված սերմացուների արժեքը սուբսիդավորել է, որպեսզի գյուղացիական տնտեսությունները ավելի մատչելի գներով կարողանան սերմացու ձեռք բերել»,- ասաց փոխնախարարը: