Ձեր վստահելի աղբյուրը

ԱՄՆ Վայոմինգ նահանգի Ներկայացուցիչների պալատը 35 դեմ, 25 կողմ ձայնով մերժել է ադրբեջանամետ HJ 002 բանաձևը: Բանաձևի ընդդիմախոսներն իրենց դիրքորոշումը հիմնավորել են` վկայակոչելով խոսքի ազատության հիմնարար իրավունքի հանդեպ Բաքվի ճնշումներն և կրոնական անհանդուրժողականությունը: Այս մասին տեղեկացնում է «Ասբարեզ» պարբերականը:

«Ադրբեջանը ռեպրեսիվ և բռնապետական կառավարություն ունի, որը ոտնահարում է խոսքի, հավաքների և կրոնական ազատությունները»,- նշել է բանաձևի ընդդիմախոս, կոնգրեսական Նաթան Ուինթերսը:

«Մենք հպարտանում ենք` տեսնելով, որ Վայոմինգի Ներկայացուցիչների պալատը ընդգրկվել է ԱՄՆ այն նահանգների շարքում, որոնք, մերժելով նման արատավոր բանաձևերը, ամուր կանգնած են ժողովրադավարության, խոսքի և կրոնական ազատությունների ամերիկյան հիմնարար սկզբունքների կողքին:

Վայոմինգ նահանգի օրենսդիրները նման քայլով ազդեցիկ ակնարկ են հղել Ադրբեջանի բռնակալ Ալիևին առ այն, որ համագործակցությունը Բաքվի հետ անհնար է, քանի դեռ շարունակվում են վերջինիս ճնշող մարտավարությունը և ատելություն սերմանող արշավները հայերի և առհասարակ բոլոր քրիստոնյաների դեմ»,- նշել է Հայ դատի ԱՄՆ Արևելյան շրջանի հանձնախմբի գործադիր տնօրեն Էլեն Ասատրյանը:

Հիշեցնենք, որ Հավայան կղզիների օրենսդիր մարմինը մերժել էր Ադրբեջանի կողմից նախաձեռնած հակահայկական և ընդդեմ Լեռնային Ղարաբաղի ինքնորոշման հստակ շեշտադրումներով բանաձևը:

Նախորդիվ՝

Հավայան կղզիների օրենսդիր մարմինը մերժել է Ադրբեջանի նախաձեռնած հակահայկական բանաձևը