Ձեր վստահելի աղբյուրը

«ԱՄՆ-ն տարեկան հրապարակում է զեկույց` աշխարհում թրաֆիկինգի իրավիճակի վերաբերյալ և համաձայն դրա Հայաստանը այս տարի երկրորդ անգամ ընդգրկվել է առաջին խմբում, այսինքն այն երկրների շարքում, ովքեր լավագույնս են իրականացնում թրաֆիկինգի դեմ տարվող աշխատանքները. 192 երկրներից միայն 32-ն են դասվել այդ խմբում և Հայաստանը միակն է մեր տարածաշրջանի, ԱՊՀ բոլոր երկրներից, որ ընդգրկված է դրանում»,- լրագրողների հետ հանդիպմանը հայտարարեց ԱԳՆ միջազգային կազմակերպությունների վարչության պետ, թրաֆիկինգի դեմ պայքարի աշխատանքային խմբի ղեկավար Վահրամ Կաժոյանը:

Նա նաև տեղեկացրեց, որ երկար տարիներ Հայաստանում թրաֆիկինգի դեմ պայքար է ընթանում, կա լավ ձևավորված ինստիտուտցիոնալ համակարգ, գործում է թրաֆիկինգի դեմ պայքարի կառավարական խորհուրդը, նաև աշխատանքային խումբ և այլն:

Նշենք, որ ՄԱԿ-ի գլխավոր ասամբլեայի բանաձևի որոշմամբ՝ հուլիսի 30-ը թրաֆիկինգի դեմ պայքարի համաշխարհային օր է հայտարարվել:

Վ.Կաժոյանի խոսքով, Հայաստանի համար շատ արդյունավետ է ոչ միայն համագործակցությունը օտարերկրյա իր գործընկերների հետ, այլև երկրի ներսում` հասարակական կազմակերպությունների, լրատվամիջոցների հետ և այլն, քանի որ թրաֆիկինգի դեմ պայքարի խնդիրը, ըստ բանախոսի, մեկ մարդու, մեկ աշխատանքային խմբի կամ խորհրդի գործունեության արդյունք չէ, այլ այստեղ հարկավոր է ողջ հասարակության ակտիվ մասնակցությունը և քարոզչական բոլոր միջոցների կիրառումը` թրաֆիկինգ-չարիքը լուսաբանելու հարցում:

ՀՀ ոստիկանության գլխավոր վարչության թրաֆիկինգի դեմ պայքարի բաժնի պետ Ռոբերտ Գրիգորյանն էլ տեղեկացրեց, որ վերլուծությունն ընդհանուր առմամբ ցույց է տալիս, որ Հայաստանը թրաֆիկինգի առումով հանդիսանում է սկզբնաղբյուր երկիր, սակայն վերջին տարիներին արձանագրվում են նաև ներքին թրաֆիկինգի դեպքեր, ինչպես նաև Հայաստանը որպես տրանզիտ տարածք օգտագործելու դեպքեր: Վերջին տարիների ընթացքում առավել ուշադրության են արժանանում հարկադիր աշխատանքը և աշխատանքային շահագործումը և բանախոսի խոսքով` այս պահին աշխատանքներ են իրականացվում այդ ուղղության դեպքերի բացահայտմանը:

«2012-2014թ. թրաֆիկինգի հատկանիշներով հարուցվել են 31 քրեական գործեր, այդ գործերով հայտնաբերվել և տուժող են ճանաչվել 39 անձինք, որոնցից 28-ը եղել են կանայք, իսկ 14-ը հանցագործության կատարման ժամանակ եղել են անչափահասներ: Այս քրեական գործերով մեղադրանք է առաջադրվել 29 անձի, նշված գործերից 12-ը վերաբերվել են ՀՀ-ում կանանց պոռնկության շահագործմանը, 5 գործերը վերաբերվել են աշխատանքային շահագործմանը` մուրացկանության մեջ ներգրավելու միջոցով, 4 գործերը վերաբերվել են Արաբական միացյալ էմիրություններում ՀՀ քաղաքացի հանդիսացող կանանց պոռնկության շահագործմանը, 4 գործերը վերաբերվել են կանանց շահագործմանը Թուրքիայում, 3-ը` ՌԴ-ում աշխատանքային շահագործմանը և 2-ը վերաբերվել են օրգաններ և հյուսվածքներ վերցնելուն»,- թվարկեց ՀՀ ոստիկանության ներկայացուցիչը:

Պաշտոնյան նշեց, որ միտումն այնպիսին է, որ բացահայտված դեպքերի քանակը պակասում է, ինչպես նաև պակասում է թրաֆիկինգի զոհերի թիվը: Եվ նաև ուրախալի է, որ եթե նախկինում մեկ գործով հայտնաբերված զոհերի թիվը շատ էր, ապա հիմա մեկ-երկուսն են: Դեպքերի նվազումն էլ նա կապեց ոչ թե հանցագործությունները լավ կոծկելու, այլ այն հանգամանքի հետ, որ մարդիկ այսօր ավելի իրազեկված են և լավ են հասկանում, թե ինչ է թրաֆիկինգը:

Եվս մեկ կարևոր հանգամանք` մարդկանց Հայաստանում չեն առևանգում, բռնի ուժով չեն հավաքագրում կամ տեղափոխում սահման, այլ բուն բռնությունը սկսվում է շահագործման պահին և ներկայումս հասարակության անդամները, իրազեկվածության մակարդակի բարձրացմանը զուգահեռ, արդեն իրենք չեն համաձայնվում մեկնել այլ երկիր աշխատանքի և այլն: