Ձեր վստահելի աղբյուրը

«Սարսափելի ողբերգություն է եղել: Երկու օր առաջ ինձ մոտ էր եկել ռազմակայանի բարձրաստիճան սպաներից մեկը, որին երբեք նման այլայլված վիճակում չէի տեսել: Այսինքն` նրանք նույնպես Գյումրիում տեղի ունեցածից շոկի մեջ են»,- այս մասին այսօր լրագրողների հետ հանդիպման ժամանակ ասաց «Նորավանք» գիտակրթական հիմնադրամի տնօրեն Գագիկ Հարությունյանը` անդրադառնալով հունվարի 12-ին Գյումրիում տեղի ունեցած ոճրագործությանը:

Նրա խոսքերով` նման պարագաներում մի փոքր պետք է ավելի արժանապատիվ լինենք, ինքնասիրություն ունենանք և այս ողբերգությունը չվերածենք քաղաքական շոուների:

«Հնչում են հայտարարություններ, թե Գյումրիի ռազմակայանից պետք է դուրս գան ռուսական զորքերը: Նման դեպք 1920-ականներին եղել է, երբ այնտեղից դուրս եկան ռուսական զորքերը, սակայն դրան հետևեց թուրքական զորքերի մուտքը Գյումրի»,- ասաց Գ. Հարությանյանը` հավելելով, որ այլընտրանքը ռուսական ռազմական բազային թուրքական հենակայանն է:

«Նորավանք» գիտակրթական հիմնադրամի տնօրենը նշեց, որ սա մեծ ողբերգություն է և պետք է արագ պարզել մոտիվները, քանի որ հասկանալի չէ, թե ինչու է կատարվել այդ հանցագործությունը: Ըստ նրա` սա նաև մի զանգակ է, որին պետք է ուշադիր լինել:

«Ժամանակին նման դեպքեր` սպանություններ, բռնություններ եղել են ամերիկյան զորքերի հետ, որոնք տեղակայված էին Ճապոնիայում, Գերմանիայում: Նրանք գտան ինչ-որ ձևեր և սկսեցին աշխատել այդ ռազմակայանների անձնակազմի հետ, որոշակի հարաբերություններ ստեղծեցին այդ տարածքներում տեղակայված բնակիչների հետ: Թեև լավ չէ ասել, բայց գուցե այս ողբերգոթյունը հենք ծառայի, որպեսզի և ռուսական կողմը մտածի անձնակազմի հետ աշխատելու մասին, և մեր հանրությունն էլ մտածի, թե ինչպիսի ձևերով հարաբերվի ռուսական անձնակազմի հետ»,- նշեց Գ. Հարությունյանը:

Ինչ վերաբերում է հունվարի 15-ին Գյումրիում տեղի ունեցած իրադարձություններին, Գ. Հարությունյանը նշեց, որ առավել ցավալի է, որ հավաքի ժամանակ վիրավորվել է 14 մարդ, իսկ ոստիկաններից մեկն էլ գտնվում է ծանր վիճակում:

Հարցին, թե դա կարող է ազդել հայ-ռուսական հարաբերությունների վրա, թեկուզ հասարակական մակարդակով, Գ. Հարությունյանը նկատեց, որ հասարակական մակարդակով արդեն իսկ ազդել է, սա երկար ժամանակ դեռ մնալու է որպես քննարկվող հարց, ինչը բնական է:

«Սա բնական է, անբնական կլիներ, եթե արձագանք չլիներ այդ հանցագործությունը: Միաժամանակ պետք է մտածել հետագայում նման երևույթները կանխելու մասին, մտածել այն հարաբերությունների մասին, որոնք օգտակար են երկու երկրների դաշնակցային հարաբերությունների համար»,-ասաց նա:

Ինչ վերաբերում է այն վարկածին, թե այս հանցագործության հիմքում ադրբեջանական կամ թուրքական հետք կա, Գ. Հարությունյանն ասաց, որ չի կարող բացառել դա, սակայն որևէ հիմք չունի դա պնդելու:

«Առանց հետաքննության տվյալների ոչինչ ասել հնարավոր չէ: Դրանք բոլորը վարկածներ են: Միաժամանակ ակնհայտ է, որ այսօր կան մեթոդներ, որոնք թույլ են տալիս հեռավորության վրա կառավարել մարդու քայլերը, բայց մինչև չիմանանք` ինչ է կատարվել, ոչինչ ասել չենք կարող, քանի որ մոտիվները մինչ այժմ հայտնի չեն»,- ընդգծեց Գ. Հարությունյանը:

Անդրադառնալով հանցագործին հայ իրավապահներին հանձնելու հասարակական պահանջին, «Նորավանք»-ի տնօրենն ասաց, որ գուցե իմաստուն քայլ կլիներ, եթե ընդառաջեր Ռուսաստանն այդ պահանջը, ինչը կմեղմեր այս լարվածությունը: Միաժամանակ, ըստ նրա, այս փուլում ավելի ճիշտ է, եթե ռուսական կողմի հետաքննողների աշխատանքը հայ իրավապահների հետ համատեղ շարունակվի:

Նա նաև նկատեց, որ ինչպես Հայաստանի համար Ռուսաստանն է կարևոր, միևնույն ժամանակ խիստ կարևոր է նաև Հայաստանը Ռուսաստանի համար:

«Սա երկու երկրների շահերի համադրում է, կարևորագույն դեր ենք կատարում նույն Ռուսաստանի անվտանգության համար»,- ասաց Գ.Հարությունյանը: