Ձեր վստահելի աղբյուրը

Մանկապարտեզներում, ճամբարներում, հանրային սննդի օբյեկտներում վերջին ամիսների ընթացքում գրանցված սննդային թունավորումների վերաբերյալ «Իրազեկ և պաշտպանված սպառող» ՀԿ-ն հարցեր է ուղղել Սննդամթերի անվտանգության պետական ծառայությանն ու առողջապահության նախարարությանը:

ՀԿ նախագահ Բաբկեն Պիպոյանը նշեց, որ ծառայությունը չի պատասխանել հարցերին, իսկ առողջապահության նախարարության տրամադրած տեղեկատվության համաձայն, նախորդ տարիների համեմատ սննդային գործոնով պայմանավորված բռնկումների թիվը խիստ ավելացել է, ավելացել է նաև այդ բռնկումների հետևանքով տուժած մարդկանց թիվը:

«Մենք ծառայությանն ուղվված դիմումով հարցրել էինք, թե սննդային թունավորումներից հետո ի՞նչ գործողություններ է իրականացրել Սննդամթերքի անվտանգության պետական ծառայությունը, ի՞նչ կանխարգելիչ միջոցառումներ են իրականցրել մինչև թունավորումները, ելնելով ծառայության լիազորությունների շրջանակից, ի՞նչ միջոցառումներ կարելի էր իրականացնել: Մենք հարցրել էինք նաև, թե սննդային գործոնով քանի՞ բռնկում է գրանցվել: Կա՞ ուսումնասիրություն, ըստ որի կարելի է պնդել, որ սննդի աղտոտվածությունը եղել է կոնկրետ փուլում»,-պատեկան մարմին ուղղված հարցերից մի քանիսը թվարկեց ՀԿ նախագահը:

Նրա խոսքով, ծառայությունից միջանկյալ որևէ գրություն չեն ստացել, ինչն էլ թույլէ տալիս պնդելու, որ ծառայությունը խախտել է օրենքը՝ հնգօրյա ժամկետում չպատասխանելով հարցերին:

Նախորդ տարիների համեմատ սննդային գործոնով պայմանավորված բռնկումների թվի ավելացման պատճառների մասին խոսելիս Պիպոյանը մատնանշեց անվերահսկելիությունն ու կամքի, պրոֆեսիոնալիզմի բացակայությունը:
Ուսումնական տարին նոր է սկսել, հնարավո՞ր է մանկապարտեզների տխուր փորձը կրկնվի դպրոցներում: Պիպոյանն ասաց, որ ՀԿ-ն ահազանգեր չի ստացել, սակայն դա հիմք չի տալիս պնդելու, որ այնտեղ ամեն ինչ լավ է: Ահազանգողներ գրեթե չեն լինում, քանի որ հետագայում հնարավոր է երեխան ու նրա ծնողը խնդիրներ ունենան:

Կազմակերպությունն այցեր է իրականացրել մայրաքաղաքի մի քանի դպրոցներ, հայտնաբերվել են մի շարք խախտումներ, օրինակ դպրոցներում վաճառվում են գազավորված ըմպելիքներ ու չիպսեր, ինչը, ըստ Պիպոյանի, առողջապահության նախարարի հրամանով արգելված է: Չկան սնունդի պահպանման նորմալ պայմաններ:
Դպրոցներում սննդի անվտանգության հարցը ՀԿ նախագահի համոզմամբ կարելի է լուծել ոչ թե ստուգումների, այլ ինքնակարգավորման միջոցով: Պիպոյանը հիշում է, որ ՍԱՊԾ-ում իր աշխատելու ընթացքում՝ 2012-ին ծառայություն են հրավիրվել մայրաքաղաքի բոլոր դպրոցների տնօրենները:

«Իհարկե, ոչ բոլորը եկան, բայց երեք օր լի դահլիճում քննարկեցինք այն խնդիրները, որոնք առավել հաճախ հանդիպում են: Մի քանի հիմնական խնդիրներ կային՝ արգելված սննդի վաճառքը դպրոցներում, սանիտարահիգիենիկ պայմանները, սննդի պահպանման պայմանները»,- թվարկեց Պիպոյանը:

Նա նշեց, որ տնօրենները պետք է անձնակազմից ընտրեին մեկին, ով հսկողություն կսահմաներ սննդի նկատմամբ, ինչ-որ խնդիր նկատելու պարագայում պետք է նա ահազանգեր ծառայություն: Նախատեսվում էր մշակել ու դպրոցներին բաժանել նաև ուղեցույցներ: Սակայն կիսատ մնացած գործը հետագայում ընթացք չի ստացել:

«Մեխանիզմ էր մշակվում, որպեսզի դպրոցն ինքն իրեն հսկեր: Սա համակարգային խնդիր է, իսկ դրան պետք է տրվի համակարգային լուծում, ինչը կարող է անել Սննդամթերքի անվտանգության պետական ծառայությունը»,-ասաց նա:

Հ.Գ. Երբ հրապարակումն արդեն պատրաստ էր, «Իրազեկ և պաշտպանված սպառող» ՀԿ նախագահը զանգարեց ու տեղեկացրեց, որ ՍԱՊԾ-ից ստացել է հարցերի պատասխանը:

«Ձևակերպված 8 հարցերի համար ստացել ենք կես էջից էլ պակաս պատասխան, ինչը ոչինչ չասող բառերի փունջ է: Այս խայտառակ պատասխանի վերաբերյալ մենք խնդրելու ենք պարզաբանում»,-ասաց Պիպոյանը: