Հոլանդիա-Դանիա խաղին ընդառաջ
Եվրոպայի առաջնության 2-րդ օրն առաջինն ասպարեզ դուրս կգան Հոլանդիայի և Դանիայի հավաքականները: Հանդիպումը տեղի կունենա Խարկովի «Մետալիստ» մարզադաշտում: Խաղը կսպասարկի սլովեն մրցավար Դամիր Սկոմինան:
Հոլանդիայի ազգային ընտրանին հարձակման գծում ֆուտբոլիստների մեծ ընտրություն ունի, և պահեստայինների նստարանին ստիպված են մնալ աստղային այնպիսի ֆուտբոլիստներ, ինչպիսիք են Կայտը, Վան դեր Վարտը և Գերմանիայի առաջնության լավագույն ռմբարկու Հունտելարը: Իսկ ահա պաշտպանական գծում որոշակի խնդիրներ կան:
Վերջին շաբաթվա ընթացքում հոլանդացիները խոսում էին միայն այն մասին, թե ով է հանդես գալու աջ պաշտպանի դիրքում: Շարքից դուրս են մնացել մի շարք ֆուտբոլիստներ, և այս դիրքում դանիացիների հետ խաղում հանդես է գալու 18-ամյա Իետրո Վիլեմսը: Նա կդառնա Եվրոպայի առաջնության պատմության մեջ ամենաերիտասարդ ֆուտբոլիստը, ով հանդես կգա հեղինակավոր այս մրցաշարի եզրափակիչ մասում: Վնասվածքի պատճառով առաջին հանդիպումն ստիպված է բաց թողնել նաև Մատեյսենը: Հավաքական վերադարձած վետերան Բոուման ևս առողջական խնդիրներ ունի, ուստի պաշտպանության կենտրոնում Հեյտինգայի հետ կարող է հանդես գալ Վլարը: Մի խոսքով` այս օղակի հետ կապված Բերտ վան Մարվեյկը մտածելու առիթներ ունի:
Դարպասապահ Ստեկելենբուրգի հիմնական կազմ վերադառնալը լավ նորություն էր, սակայն նրա մարզավիճակի մասին դժվար է եզրակացություններ անել: Ամեն ինչ պարզ կդառնա խաղադաշտում:
Ինչպես արդեն նշեցինք, հարձակման գծում Հոլանդիայի հավաքականը խնդիրներ չունի, սակայն գլխավոր մարզչի որոշմամբ` առաջին խաղին պահեստայինների նստարանից կհետևեն Կայտը, Վան դեր Վարտն ու Հունտելարը: Այս փաստը բազմաթիվ խոսակցությունների ու քննարկումների տեղիք է տվել հոլանդական մամուլում, իսկ Հունտելարն անգամ բացահայտ դժգոհել է, որ ընդգրկված չէ հիմնական կազմում:
Դանիայի հավաքականը ևս մեկնարկային խաղում զերծ չի մնացել խնդիրներից: Հիմնական դարպասապահ Սորենսոնը դուրս է մնացել մրցաշարի մասնակիցների հայտացուցակից, և այսօր դանիացիների դարպասը կպաշտպանի Անդերսոնը: Պաշտպանական օղակում և խաղադաշտի կենտրոնական հատվածում կարծես թե ամեն ինչ նորմալ է: Բացառություն է կազմում միայն Զիմլինգը, ով հանդիպման նախօրեին ջարդել է մատն ու տեղափոխվել հիվանդանոց: Ամեն ինչ բարեհաջող է ավարտվել, սակայն առաջին հանդիպումը նա կարող է բաց թողնել:
Ինչ վերաբերում է հարձակման գծին, խաղից մի քանի ժամ առաջ անգամ գլխավոր մարզիչ Մորտեն Օլսենն ինքն էլ չէր կողմնորոշվել, թե ով է դուրս գալու խաղադաշտ: Մի շարք ֆուտբոլիստներ` Կրոն-Դելին, Ռոմեդալը, Շենեն, Սիլբերբաուերը, դեռ չեն կարողացել համոզել մարզչին, որ իրենք լավագույնն են:
Օպտիմալ կազմեր
Հոլանդիա- Ստեկելենբուրգ, Վան դեր Վիլ, Հեյտինգա, Վլար, Վիլեմս, վան Բոմմել, դե Յոնգ, Ռոբբեն, Սնեյդեր, Աֆելայ, վան Պերսի:
Դանիա- Անդերսոն, Յակոբսեն, Կյաեր, Ագգեր, Ս. Պոուլսեն, Կ. Պոուլսեն, Կվիստ, Էրիկսեն, Ռոմեդալ, Բենդտներ, Կրոն-Դելի:
Որակազրկվածներ չկան:
Վնասվածք ունեցողներ` Մատեյսեն (Հոլանդիա):
Բոումայի և Զիմլինգի մասնակցությունը կասկածի տակ է:
Ով ինչ է ասել
Բերտ վան Մարվեյկ (Հոլանդիայի հավաքականի գլխավոր մարզիչ).- Իմ բոլոր մտքերը սևեռված են առաջին հանդիպման վրա: Ամեն ինչ էլ կարող է պատահել: Հեռուն չեմ ցանկանում նայել, դրանում իմաստ չեմ տեսնում: Ես բնույթով նման մարդ չեմ, սովոր եմ մտածել միայն առաջիկա խաղի մասին:
Մարկ Վան Բոմմել (Հոլանդիայի հավաքականի ավագ).- Մեզ միշտ հաճելի է հավաքվել մի վայրում: Այնպիսի տպավորություն է, ասես բոլորս եկել ենք հարազատ տուն: Ֆուտբոլիստներն իրենց հետ բերում են այն առաջնության մշակույթի մի մասնիկը, որում հանդես են եկել: Հիմա մեզ հարկավոր է միացնել այդ փորձը և ստանալ հոլանդական խառնուրդ: Մենք ուզում ենք կրկին խաղալ հոլանդական ոճով:
Մարտեն Օլսեն (Դանիայի հավաքականի գլխավոր մարզիչ).- Իմ կարծիքով` հանդես ենք գալու մրցաշարի ամենաուժեղ հավաքականներից մեկի դեմ: Հոլանդիայի ընտրանուն ես համարում եմ ֆավորիտ: Սակայն դա ամենևին չի նշանակում, որ մենք պետք է սպիտակ դրոշակ պարզենք և խոսենք շանսեր չունենալու մասին: Բնականաբար, կփորձենք 2 ձեռքով որսալ հաջողության հասնելու հնարավորությունը:
Նիկլաս Բենդտներ (Դանիայի հավաքականի հարձակվող).- Մեր հավաքականը շատ լավ տեսք ունի: Հիանալի աշխատել ենք նախապատրաստական շրջանում: Եկել է ժամանակը` կարգավորելու որոշ տեխնիկական և տակտիկական դետալներ, և լիովին պատրաստ կլինենք:
Լրահոս
Տեսանյութեր
Անահիտ աստվածուհու արձանը կցուցադրվի Հայաստանի պատմության թանգարանում պահվող բացառիկ նմուշների հետ