Ձեր վստահելի աղբյուրը

«Սա, իմ կածիքով, ընդդիմության թուլության բավականին վառ դրսևորում է` եթե զրկված ես քաղաքականությանը իրական կերպով մասնակցելու հնարավորությունից, պետք է այլ բան մտածես»,-խորհրդարանական ոչ կոալիցիոն չորս խմբակցությունների՝ ԲՀԿ-ի, ՀՅԴ-ի, «Ժառանգության» և ՀԱԿ-ի` կառավարությանը անվստահություն հայտնելու նախաձեռնության մասին  panorama.am-ի հետ զրույցում կարծիք հայտնեց  քաղաքագետ Ալեքսանդր Իսկանդարյանը:

Նրա խոսքով,  հասկանալու համար կարո՞ղ են նրանք թե՞ ոչ մասնակցել քաղաքական գործընթացներին իրական կերպով` պետք է երկու պարզ բան իմանալ.«Առաջինն այն է, որ հաջորդ ընտրությունները կայանալու են երեք տարի հետո: Երկրորդը պարզ թվաբանությունն է` պետք է հաշվել այս քաղաքական ուժերի ներկայացուցիչների քանակը խորհրդարանում. Ակնհայտ է, որ ոչինչ անել հնարավոր չէ: Իսկ եթե ոչինչ անել հնարավոր չէ, ապա քաղաքական կյանքը պետք ինչ-որ կերպ շարունակվի: Այնուհանդերձ, ես կարծում եմ որ սա լավ նախաձեռնություն է, չնայած նրան, որ այն դժվար թե հասնի իր տրամաբանական ավարտին: ՀՀԿ-ն իրեն չափազանց հանգիստ է զգում այս իրավիճակում:

Ստեղծված իրավիճակում այս քաղաքական ուժերը պետք ինչ-որ կերպ գոյատևեն: Մոտենում է մարտի 1-ը, սպասվում է կուտակայինի հարցով ՍԴ-ի որոշումը: Այս քաղաքական ուժերին շատ դժվար է միավորվել, սակայն նրանք դա անում են հենց այն պատճառով որ հետապնդում են մեկ ընդհանուր նպատակ: Այսպես ասած` հաստատել` կա՞ արդյոք կյանք Մարսի վրա թե` ոչ: Պարզ լեզվով ասաց` ցույց տալ որ իրենք դեռևս կան: Ես դա նշում եմ առանց որևէ հեգնանքի: Իսկ դրանից բացի ի՞նչ պետք է անեն այս ուժերը: Կազմալուծվե՞ն: Եթե մեր մոտ ընդդիմությունը ներկայացնում են այս քաղաքական ուժերը, ապա սա և պետք է անվանել ընդդիմադիր գործունեություն»:

Հիշեցնենք, որ ԱԺ ոչ կոալիցիոն չորս խմբակցությունների՝ ԲՀԿ-ի, ՀՅԴ-ի, «Ժառանգության» և ՀԱԿ-ի ներկայացուցիչները օրերս քննարկել են Կառավարությանն անվստահություն հայտնելու հարցը: Հանդիպմանը մասնակցել են ԱԺ ԲՀԿ խմբակցության քարտուղար Նաիրա Զոհաբյանն ու խմբակցության անդամ Վարդան Օսկանյանը, ԱԺ ՀԱԿ խմբակցության ղեկավար Լևոն Զուրաբյանը, խմբակցության քարտուղար Արամ Մանուկյանը, ՀՅԴ խմբակցության ղեկավար Արմեն Ռուստամյանը, խմբակցության քարտուղար Աղվան Վարդանյանը, ԱԺ «Ժառանգություն» խմբակցության ղեկավար Ռուբեն Հակոբյանը։ Մեկուկես ժամ տևած քննարկման արդյունքում վերջնական որոշում չի ընդունվել: Ռուբեն Հակոբյանը հայտարարել է, որ յուրաքանչյուր խմբակցություն այդ հարցը պետք է քննարկի իր կուսակցության քաղխորհրդում:

Նախորդիվ`

«Կառավարությանն անվստահություն հայտնելու գործընթացը դժվար թե հասնի տրամաբանական ավարտի»

Սերգեյ Մինասյան. Քաղաքական ուժերը պետք է ասեն այն, ինչ իրենցից սպասում են