Ձեր վստահելի աղբյուրը

Հայաստանի փաստաբանների պալատի փաստաբան, նախկին քննիչ Սամվել Շարբաթյանի սպանության փաստի կապակցությամբ հարուցված քրեական գործի նախաքննությունը շարունակվում է, գործով գլխավոր երեք մեղադրյալներն այժմ կալանավորված են:
 
Փաստաբան Շարբաթյանի սպանությունը, հիշեցնենք` տեղի էր ունեցել նոյեմբերի 18-ի գիշերը Լոռու մարզի Շահումյան գյուղի «Մուշ» ռեստորանում: Նրա դին հայտնաբերվել էր դաժան բռնության հետքերով: Դեպքի վայրի զննությամբ գտնվել էր օդամղիչ ատրճանակից կրակելու համար նախատեսված 4,5 մմ տրամաչափի մետաղական 5 գնդակ: Դեպքի հաջորդ օրը` նոյեմբերի 19-ին բաժին մեղայականով ոստիկանություն էր ներկայացել 34-ամյա Արտակ Վերանյանը՝ ներկայացնելով նաև օդամղիչ ատրճանակը: Ռեստորանում Արտակի հետ եղած նրա եղբորը` 31-ամյա Արեն Վերանյանին ու ընկերոջը` 32-ամյա Սամվել Դիլոյանին, որոնք դեպքից հետո գտնվում էին հետախուզման մեջ, հայտնաբերել են ընդամենը վերջերս` փետրվարի 6-ին Երևանի Թումանյան 18 հասցեում: Նրանց երեքին առաջադրվել է ՀՀ Քրեական օրենսգրքի 104-րդ հոդվածի 2-րդ մասի 7-րդ կետի` «մի խումբ անձանց կամ կազմակերպված խմբի կողմից սպանությունը» հատկանիշներով և 258-րդ հոդվածի 4-րդ (1-ին կետով) մասով` «Խուլիգանություն, որը զուգորդվել է անձի նկատմամբ բռնություն գործադրելով»:

«Մուշ» ռեստորանային համալիրում հանցագործների կողմից փաստաբանի դաժան սպանությունը, որն ըստ էության, շատ նման էր բժիշկ Վահե Ավետյանի սպանությանը («Հարսնաքար»), չմիավորեց քաղաքացիական հասարակությանը, հնչեղություն չառաջացրեց, իրավապահ մարմինների առջև գործը բացահայտելու և հանցագործներին խստագույնս պատժելու պահանջ չդրվեց: Ընդհակառակը, դաժան ողբերգությունից անմիջապես հետո տարբեր լրատվամիջոցներ սկսեցին միակողմանի ներկայացնել իրավիճակը, կատարվածի մեղքը բարդելով փաստաբանի վրա: Որոշ հրապարակումներում նկատվեց նաև միտում թեթև ներկայացնել այժմ կալանավորված երեք մեղադրյալների հանցանքը:

Այս ամենին զուգահեռ տարօրինակ էր փետրվարի 5-ին, երկու մեղադրյալների կալանավորումից մեկ օր առաջ, Շարբաթյանի քրոջ որդու` Հայկ Ասլիկյանի հարցազրույց-հարցաքննությունը «Հետք» էլեկտրոնային լրատվամիջոցին: Նկատենք, որ Հայկ Ասլիկյանը դեպքի օրը եղել է քեռու հետ, ռեստորանում և համարվում է հիմնական վկան և որի ցուցմունքները նախաքննական մարմնի համար հանդիսացել են հիմք: Անհասկանալի է` ինչպես է Հայկը բանակից հարցազրույց տվել լրատվամիջոցին, պատմել «Մուշ»-ում կատարվածը ու դեպքի վերաբերյալ պատմությունը ներկայացրել որոշ դրվագների փոփոխություններով: Նկատենք, որ նա իր ցուցմունքում նշել էր, թե ում է տեսել դեպքի վայրում, ովքեր են սպանության հեղինակները, սակայն լրատվամիջոցին ասել է, որ շատ բան չի տեսել և շատ բան չի հիշում: Այս պարագայում հարց է առաջանում` ինչո՞ւ է Հայկը փոխում ցուցմունքը, ովքե՞ր ու ի՞նչ ուժեր են կանգնած այս ամենի հետևում:

Ի՞նչ անցյալ ունեն Շարբաթյանի սպանության մեղավորները

Սպանության մեղադրանքով այժմ կալանքի տակ գտնվող Արեն և Սրտակ Վերանյաններն ու Սամվել Դիլոյանը հանցավոր խմբի ղեկավարներ են համարվում ու նախկինում էլ հանցագործություններ են կատարել, վախեցրել բնակչությանը: Արտակ Վերանյանը նախկինում աշխատել է որպես ոստիկանության օպեր-լիազոր, ոստիկանության ավագ լեյտենանտ: Նա դեռ 2008-ին մեղադրվել էր մաքսանենգության կազմակերպման համար, դատապարտվել 2 տարի ազատազրկման, իսկ հետագայում էլ համաներմամբ ազատ է արձակվել:

Արտակի եղբոր` Արեն Վերանյանի և նույն խմբի անդամ, Վանաձորի ավագանու նախկին անդամ Սամվել Դիլոյանի անունը կապվում է դեռ 2007-ին տեղի ունեցած խորհրդարանական ընտրությունների ընթացքում Վանաձորից դուրս, դեպի Դիլիջան ճանապարհին «Թեժ լեռ» կոչվող տարածքում կատարված Հրանտ Հակոբյանի սպանության հետ. նա մահացել էր 2007-ի ապրիլի 27-ին հիվանդանոցում, ապրիլի 26-ին տեղի ունեցած դաժան ծեծի ու դանակի բազմաթիվ հարվածների հետևանքով:

Հրանտ Հակոբյանի սպանությունն այն ժամանակ մամուլում որակվել էր քաղաքական ենթատեքստ ունեցող սպանություն այն պատճառով, որ խորհրդարանական ընտրություններում առաջադրված թեկնածուներ Վահրամ Բաղդասարյանի ու Վիկտոր Դալլաքյանի թիմերի ներկայացուցիչների միջև պայքարի արդյունք էր եղել: Այդ գործով Դիլոյանը և Վերանյանը ձերբակալվել էին, սակայն Վանաձորի նախկին դատախազի հրամանով ազատ էին արձակվել: