Ձեր վստահելի աղբյուրը

Վանաձորի մանկատան նախկին սաների կյանքը Հայաստանի դատական համակարգի «թեթև ձեռքով» կործանման եզրին է. գողության մեղադրանքով 4 տարի ազատազրկման դատապարտված Ռոման Կուդաշինի կինը՝ 26-ամյա Թագուհին, այլևս պայքարելու ուժ չունի և ծայրահեղ հուսահատ վիճակում է: Սպառվել են ձևերը՝ ապացուցել բոլորին, որ իր ամուսինն այդպիսի հանցանք չի գործել: 

Ռոմանի Կուդաշինի փաստաբան Վահան Ավագյանը Panorama.am-ի թղթակցի հետ զրույցում պնդում է, որ իր պաշտպանյալը հանցագործություն չի կատարել, իսկ իրեն մեղսագրվող արարքում պետք է արդարացվեր: «Ես նման պնդում անում եմ գործում եղած հանգամանքների ու վերլուծությունների գնահատման արդյունքից, քանի որ չկան ապացույցներ, որ Ռոման Կուդաշինը կատարել է այդ հանցագործությունը: Դատաքննության ժամանակ մյուս ամբաստանյալների կողմից մեղադրանքը չի հաստատվել, հակառակը` նրանք պնդել են, որ Կուդաշինը չի մասնակցել հանցագործության կատարմանը: Այնուամենայնիվ, նշված հանգամանքների առկայության պայմաններում դատարանը կայացրել է մեղադրական դատավճիռ», -Լոռու մարզի ընդհանուր իրավասության դատարանի կայացրած վճռի վերաբերյալ իր տեսակետը հայտնեց վանաձորցի փաստաբանը:

Ավելի վաղ Panorama.am-ը ներկայացրել էր Վանաձորի մանկատան նախկին սաների վերաբերյալ այս պատմությունը: 24-ամյա Ռոմանը, ով ազգությամբ ռուս է և վաղ հասակում կորցրել է ծնողներին, մանկատնից դուրս գալուց հետո աշխատել է Վանաձորի ՀԷՑ-ում որպես մոնտյոր ու իրենց աշխատավարձով, ինչպես Թագուհին էր պատմել, կարողացել են նորմալ ապրել: Վանաձորում ապրում են վարձակալած բնակարանում, մինչև պետությունը նրանց բնակարան կհատկացնի: Թագուհին ասել է, որ իրենց պահանջները քիչ են եղել, իսկ ընտանիք մտնող գումարը բավարարել է իրենց ու նորմալ ապրել են, հետևաբար գողություն կատարելու մասին մտքներով անգամ չի անցել:

Վանաձորի մանկատնից 2011-ի հունիսին գողացված երաժշտական կենտրոնը դառնում է պատուհաս այս նորաստեղծ ընտանիքի գլխին: Ըստ նախաքննության տվյալների և այնուհետև` Լոռու մարզի ընդհանուր իրավասության դատարանի դատավոր Մուշեղ Հարությունյանի 2012-ի հուլիսի 13-ին կայացրած վճռով Ռոման Կուդաշինը մանկատան մյուս սաներից մեկի` Արթուր Կիրակոսյանի ու Վանաձորի բնակիչ Տարոն Մելիքջանյանի հետ միասին մուտք են գործել մանկատուն և գողացել մանկատան երաժշտական կենտրոնը: Եվ նույն դատարանի վճռով Արթուրն ու Տարոնը դատապարտվել են հինգ տարի ազատազրկման, իսկ Ռոմանը` 4: Առաջին ատյանի դատարանի վճիռը Վերաքննիչ դատարանը թողել է ուժի մեջ, իսկ Վճռաբեկ դատարանը վարույթ չի ընդունել: Դատական այս քաշքշոցի մեջ Թագուհին երեխա էր կորցրել, իսկ կյանքը վերածվել դժոխքի: Ռոմանն այժմ հետախուզման մեջ է: 

«Դատարանը սխալ է կիրառել օրենքները և կայացրել է անօրինական դատավճիռ: Իմ ուղեղի մեջ չի տեղավորվում ոչ չորս տարին, ոչ նվազագույն պատիժը` երեք ամիս կամ վեց ամիս, ընդհանրապես պատիժ նշանակելու առումով կողմնակից չէի, որովհետև իմ պաշտպանյալը այդ հանցագործությունը չի կատարել, ուստի պատժի ենթակա չէր: Եթե դատարանը գտել էր, թե տղան այդ հանցագործությունը կատարել է, ապա այդ պատիժը իհարկե, շատ խիստ է, քանի որ ինքն ուներ բավականին դրական կողմեր», -հավելեց փաստաբանը:

Նրա խոսքով, իր պաշտպանյալի համար գոնե պայմանական կիրառելու համար մեղմացնող հանգամանք կարող էր դիտվել այն, որ Ռոմանը մանկատնից դուրս գալուց հետո աշխատել է, ընտանիք կազմել ու անցյալի մութ կետեր չունի, միակ կերակրողն է ընտանիքի, աշխատանքի վայրից դրական բնութագիր են տվել:

Թագուհին ասում է, որ այլևս ձև չկա ապացուցելու, որ իր ամուսինը մեղավոր է: «Թող մեզ ապացուցեն, որ Ռոմանը հանցանք է գործել, թող բերեն փաստեր ցույց տան: Ախր ինքը նման բան չի արել», -ասում է Թագուհին:

Կարդացեք նաև՝

Քշվածները. Դատավորի ներքին համոզումն ու մանկատան նախկին սաների խեղված ճակատագրերը